السلام عليكم,
صراحة الموضوع طريف واحترت وين احطه في منتدى الاشبال بس خفت انى اسبب لهم عقدة
واكسب ذنوبهم. المهم هالموضوع يهم الشباب الصغار "رجال المستقبل" وايضا للي عاشو
في معزل عن عادات اهلهم لاسباب لا مجال لذكرها.
احب ان اذكر ان العادات والسلوم شئ يميزنا ونكسبها عن طريق التربية اما القراءة قد تساعد بس ماتكفي.
طيب ليش انا ودي اكتب عن هالموضوع؟!! قبل اسبوع الله يسلمكم صارت قصة قد تكون
مضحكة ومخجلة في نفس الوقت وهو ان فيه دورية عشا في الشهر مرة نجمع فيها الشباب
لان المدينه اللي حنا فيها ما فيه احد من الجماعة...مالكم بطولة الحكي...واحد من الشباب جا دوره الاسبوع اللي طاف وسوا العشا...وترا خوينا ماتعرف وش جنسه الا من اسم قبيلته..تقدر تقول اذا اول مره تشوفه حضري وجداوي وكل شي في نفس الوقت.
الزبده خوينا قال بالمره مادام متجمعين ليش ما اعزم جاري وفعل. جاره هذا عنده ابوه مسير
وحضر العشا مع ولده.
كلها سهالات لين حط خوينا العشا وقلطنا. حلفنا على المعزب الا يتعشا معنا مادام ان مافيه ضيوف. ايه حنا خلصنا من العشا وطبعا ننتظر الشايب يقوم...عيب نعجله وهو اكبر. لكن
الشايب كان بعد ينتظر و لكن اخر شي حس وطالع في المعزب اللي هو خوينا وقاله" هي محفوفة" طبعا خوينا فتح فمه مع شويت احراج لانه مافهم وشو القصد وعطا الشايب
ماء...وقمز واحد من الشباب علشان ينقذ الموقف وقال للشايب " الله الله يا ابو فلان..تعش ولا عطنا مجال"...
محفوفة يقصد الشايب فيه ضيف او اجنبي ولا اقوم اولكم....والرد الثاني معناه كلامك صحيح وقم.
حنا اعتبرنا الموضوع بسيط لكن صراحة كان له وقع كبير على خوينا الى البارح وهو مازال
يسولف كيف انه انحرج وحس بنوع من النقص قدام جيرانه واخوياه.
لذلك قررت ان اثير موضوع حبي يتبرع فيه الاخوة الاعضاء بشرح العادات والسلوم لتثقيف
وفائدة الشباب البعيدين عن الديره و الذي لابد ان يمرو في مثل هالمواقف اللتي تبدو صغيرة
لكن قد توقعهم في الاحراج امام مجتمع رجال اجناب.
ابو فهد العصباني
