بين كبرالهقاوي واختلاف الزمان=ارتكيت بشموخي للحمول الثقال
صرت الاعب زماني لعبة الصولجان=لاعطاني مجال ولاعطيته مجال
احتميت برصيدي عن خفايا المكان=واحتمى بالتلوي والطروق الطوال
المعرفه سلاحي والكرامه حصان=والنقى رأس مالي يوم لي رأس مال
قلتها للعزيز اللي رضا بالهوان=راحت أيام عمره بين روح وتعال
قام يندب زمانه من مكان إل مكان=نوب يكتب قصيد ونوب يكتب مقال
مالحقني ملامه من عريض البطان=من ترخت حباله لايدور حبال
عارفين اللوازم بالخفى والبيان=ونعرف أهل الدروب العوج والاحتيال
مانجي بالسوالف والعلوم السمان=علمتنا النشيفه كل طرق الرجال
علمتنا طريق العز والآتزان=لين صرنا لكل الناس مضرب مثال
ودام مثلي شعارك بالله المستعان=لاتلفت يمين ولاتلفت شمال
سوقها للنقى وامسك بيدك العنان=لاتروم السهل طالع لروس الجبال
صيت الآجداد لاترميه وسط الدفان=احترص مثل حرصي عن كلاماً يقال
صيتنا مجدنا عند اللوازم يبان=مايضاهيه مجد ولايثمن بمال
والليالي شواهد للرجال الذهان=والقصور العوالي في ذراها ظلال
والزمن يكسراعزوم الضعيف الجبان=ولايغير قناعاته كريم السبال
قلتها لجل أسمعها فلان وفلان=يمكن احروفها تشرح جواب السؤال
