::دام البكا يا ريم ما فيه تحريم::
قصه وقصيدة
كان الشاعرمسجون
ماراً من أحد الممرات وفي ذلك الممر كانت
( ريم وأمها ) داخلين لزيارة سجينهم
والشاعر سمع صوت الأطفال فتذكر أبنائه
فدمعت عينيه
فرأته ( ريم ) فقالت ريم لأمها :
( يمّه الرجال يبكي !! ،، فقالت أمها زاجرة : ريم !!! )
عندها ،، كتب الشاعر هذه القصيدة
::
أبكي وعيني تسهر الليل يـا ريـم
مدري بلاها الشوق والا الظليمـه
يا ريم دمع العين مدري على الريم
والا على قلبـن تواكـل صميمـه
تقول لاطمني علـى نونهـا سيـم
أبكي وعندي لأزرق الدمع قيمـه
ويمكن يكون الدمع للعيـن تكريـم
ويمكن يكون إلها عذاب وحريمـه
والله يا لولا دمعتـن كنهـا الديـم
راحت ضلوعي من عذابي حطيمه
ودام البكا يا ريم ما فيـه تحريـم
يا عنك والله لأرخص الدمع شيمه
وابكي على حالي من الوجد وآهيم
لين الزمن يخلـف عليّـه نسيمـه
أبكي حياتن صافيه ما بهـا غيـم
وين المحبـة والقلـوب السليمـه
أبكي قهر وابكي من الغبن والضيم
وابكي من طعونن بقلبـي قديمـه
غدر الزمن خلّى بوجهي مراسيـم
وما يذبح الرجال مثـل الهزيمـه
بعض المصايب شرها ياكل الهيـم
وشلون بكبود الرجـال الكريمـه
وبعض المصايب يخلفن المفاهيـم
تبغى على ما قيل صبر وعزيمـه
مظلوم بالدنيـا وغيـري مظاليـم
من عرض ناسن لبسوهم جريمـه
ما عاد أبي من سود الأيام تعليـم
عقب العذاب اللي كلاني جحيمـه
ولو تصفي الدنيا علـيّ الملازيـم
ما عاد أدور من وراهـا غنيمـه
رد: ::دام البكا يا ريم ما فيه تحريم::
أبو عبدالله
أنا المكان بتواجدك
رد: ::دام البكا يا ريم ما فيه تحريم::
صح لسانك يابو عبد الله
قصيده عصما من واقع اليم وشاعر فهيم
اشكرك على شاعريتك الفذه و عساك تسلم من كل شر
وتقبل
سلامي
رد: ::دام البكا يا ريم ما فيه تحريم::
شكراً لك و قصيدة محزنة .
كنت أتمنى أن تكتب قائل هذه القصيدة .
رد: ::دام البكا يا ريم ما فيه تحريم::
يا مرحبا يا ابو صالح يا عساك طيب المكان منور بأهلـــه
كــــــــل ـآلود
رد: ::دام البكا يا ريم ما فيه تحريم::
اقتباس:
المشاركة الأصلية كتبت بواسطة عيد بن قيضي الوابصي البلوي
صح لسانك يابو عبد الله
قصيده عصما من واقع اليم وشاعر فهيم
اشكرك على شاعريتك الفذه و عساك تسلم من كل شر
وتقبل
سلامي
يا مرحبا ويا هلا فيك أخوي عيد وصح بدنك
رد: ::دام البكا يا ريم ما فيه تحريم::
اقتباس:
المشاركة الأصلية كتبت بواسطة موسى بن ربيع البلوي
شكراً لك و قصيدة محزنة .
كنت أتمنى أن تكتب قائل هذه القصيدة .
هلا فيك اخوي العزيز موسى , بالنسبة للقائل بذلت جهدي للحصول على اسمه لكن دون جدوى , وتقبل تحياتي
كل الود
رد: ::دام البكا يا ريم ما فيه تحريم::
تسلم يابو عبدالله
قصيده رايعه
رد: ::دام البكا يا ريم ما فيه تحريم::
اقتباس:
المشاركة الأصلية كتبت بواسطة علي دويهيس
تسلم يابو عبدالله
قصيده رايعه
هلا بك اخوي علي , والله يسلمك
كــــل ـآلود
