حاطب الليل
امشي وانا محتار وازل واصيب = ومثـّل احوالي كما حاطب الليل
احيان من فكري تجيني مناديب = واحيان افك عنان شقراء مع الخيل
ولو كنت ماني جاهلا واعلم الغيب = كان اتقي شر السنين المقابيل
ولوكنت اعرف مسببات التسابيب = ادل درب الرشد قدام ماعيل
علمني اللي جرب الوقت تجريب = اللي مخاوي قبل من جيلنا جيل
اللي عوارض لحيته كلها شيب = والشيب باللحيه وقار الرجاجيل
يقول لا تنصى ردي المطاليب = ويقول لاتنزل على مدرج السيل
ون كان مشيك في دجا الليل والريب = ارفع نظر عينك الى الجدي وسهيل
ولاتخاوي اللي فيه تسمع عذاريب = ترى الذي به قالو الناس بك قيـــل
تراك تلقى الطيبه مع هل الطيب = وتلقى مع اهل العلم حكمه وتأويل
وتلقى مع اهل الكذب نقصا وتكذيب = وتلقى مع اهل الصدق رفعه وتبجيل
وتعرف مقامك عند قوم المواجيب = اللي لهم في نظرة الرجل تحليل
والنفس دربها على الصبر تدريب = واحذر ترى الدنيا بعد عدلها مـيـــل
وسلامتكم
