السلام عليكم ورحمة الله وبركاته
الفنجال الاول
الوقت لا اقبل والغضب فـي محيـاه
وفي ايده من انواع المصايب مصيبه
ما يمنـع انـك اتواجهـه واتحـداه
واللي يجيبه والـي امـرك يجيبـه
مـا فيـه مخلـوق معافـاً بدنيـاه
كـلٍ لـه بدنيـاه مـا يشتقـي بـه
والناس فيها آحاد واضـداد واشبـاه
الشكـل واحـد والفـوراق عجيبـه
فـي النـاس رجـالٍ بعيـد نهايـاه
ابعد محاذيـف العـرب مـا تجيبـه
ما يشتكي وقته ولو جـاه مـا جـاه
من دون ما يخفي .. سدودٍ قطيبـه
وفي الناس رجـالٍ قريـب معشـاه
لاحسته جرد السنيـن العصيبـه
قـام يتشكّـى بيـن هـذا وهــذاه
وقـام يتظاهـر بالغبـن والغليـبـه
ولا ترحم الا اللـي طروقـه مخـلاه
و روابعـه فـوق النجـوم الرقيبـه
وحظه على ما قيل .. عرج مطايـاه
لاهوب لا يغزي .. ولا ينغـزي بـه
وأنا .. حصل لي ما حصل واحمد الله
الادمـي مـا يـأخـذ الا نصيـبـه
حتى ولو حده زمانه علـى اقصـاه
لابد ما يصبـر علـى مـا يصيبـه
وجميع ما صار استفدته ولا انسـاه
اثبت لي اشياء مـن جهلهـا تعبـه
اثبت لي ان الصدق للرجـل منجـاه
ينطّحـه دهـم الفجـوج الرحيـبـه
واثبت لي ان الكذب للرجـل مهـواه
ينطّحـه مليـون خيـبـه وخيـبـه
واثبت لي ان الحكي للرجـل ملهـاه
لا صار ما يطري عليه .. يحكي بـه
واثبت لي ان الرجل لا ضاع مبـداه
قامت طواغيت الهـوى تلتقـي بـه
واثبت لي ان الحب لا ضاع معنـاه
ما جمّلـه شـوق المحـب لحبيبـه
واثبت لي ان الكفو لو كثروا عـداه
يقلـط ويغلبهـم بفعـلـه وطيـبـه
واثبت لي ان اللاش لو طاب مجنـاه
ما يستـره مجنـاه لا بـان عيبـه
واثبت لي ان الشيخ لا ضاعت ارياه
ما طـق بابـه واحـدٍ ينتخـي بـه
واثبت لي ان الضلع راميه ما اخطاه
واثبت لي ان الجـد كبـره مصيبـه
واثبت لي ان الليـل لا زان مسـراه
يسريـه ذيـبٍ مـا يغـرك قنيبـه
واثبت لي ان المال للنـاس مشهـاه
مافيـه لا شكـه ولا فيـه ريـبـه
فلا صار في كف من الجود معطـاه
بشّر به اللي ضيقتـه تلتـوي بـه
ولا صار في كف من الجود مخطـاه
كف البخيل اللـي شبوحـه قريبـه
يـا عزتـي للـي لفـاه ايتعـطّـاه
لو كان مفتاح الغنـى وسـط جيبـه
واثبت لي ان العمر يطوي بنا رشاه
والعاقل اللي من قبـل ينتحـي بـه
لا صبّـوا الفنجـال الاول تقهـواه
فلا عقب صافي الكيـف الا سريبـه
ومن لا يفيد المرجله بـأول صبـاه
ماهوب فايدهـا ليـا اقبـل مشيبـه
منقول
