للشاعر حمود بن خشيبان العرادي
هذه القصيده للشاعر حمود بن خشيبان العرادي يمدح فيها الأخ عوض بن مرزوق بن فضل العرادي
سر يا قلم وأكتب سلام وتحية = تحية مني من القلب مهداه
تاصل لأبو ناصر عزيزاً عليه = تلقاه بالنابع قصوره مبناه
قصدي عوض مرزوق مذكور ليه = أبوه طيب بأطيب الاسم سماه
نفسه لمن زاره تراها صخيه = كريم سبلى تفعل الطيب يمناه
تلقى دلاله عندها النار حيه = ماهو بشاوي حطها عند معزاه
إن جيت تال الليل ولا العشية = في مجلسة جالس وربعه حويلاه
مجتمعبن وربعته صيرميه = كلا يبي الفزعه إلا جيت تنخاه
أهل اللوازم والقلوب الرضية = مافيهم اللي جاه لازم وخلاه
يالله أنا طالبك جزل العطيه = تسيل لنا النابع بمزناً تغشاه
وتسقي لنا حديبا وتسقي طفيه = مساكن الجدان ما عاد ننساه
مساكن الجدان بالجاهلية = واليوم من فضل الكريم امتلكناه
ويا ربعنا يا أهل الشرف والحميه = الحسد ما ينفع ولا عاد نبغاه
كل البلاد لنا ولكم بالسويه = واللي يفرق بيننا كيف نرضاه
وختامها صلوا على اشرف نبيه = إعداد من كبر لفرض ٍ وصلاه
