اولا السلام عليكم ورحمة الله وبركاته
واسمحوا لي بهذه المشاركه ..
وحين يُعمل الشاعر خياله كانت هذه القصيده
ياطيور الجو لك عندي وصاه =تاخذي مني سلام ٍ للحبيب
مقصدي طير ٍ شهر ولاّ القطاه = تبحص وتخمر ومغزاها قريب
ياحمام ٍ زاجل ٍ يبعد مداه = خذ سلامي واوصله ذاك الصحيب
شوف قرص الشمس واعرف ماوراه= واعرف إن العصر يتلاه المغيب
قل تراني من سنين ٍ في رجاه =مثل طفل ٍ ينتظر امه تطيب
وماتت امه قبل لا ييبس جماه = قام يزهمها وعيّت لا تجيب
طفل ٍ ألتغ له ثلاث ٍ بمحياه = طفل يعرف بس امه والحبيب
صاح ما يدري معاني ما يراه =يوم شاف الكل يصرخ بالنحيب
صاح يمه ثم يمه ثم ياااااااه =كل من حوله بكى حتى الطبيب
عاد يمه والبكا قطّع حشاه = زاد بصياحه .. وأيّس من مجيب
وسلامتكم .. حمدان عبدالرحمن الفريعي ( واسمي المستعار ماقدرت اغيره من لوحة التحكم ..
ولا عندي غير ايميل واحد والشكوى لله )
