السلام عليكم ورحمه الله وبركاته
اقدم لكم هذه القصيده وهي للشاعر/رجاء مناور الربيلي العنزي
وألقيت هالقصيده قبل سنتين عند حضور الشاعر واقربائه في منزل المغفور له بأذن
الله تعالى الشيخ/سنيان بن علي بن مظهر
وأقدمها لكم اليوم في ليله الجمعه في هذا الشهر الفضيل طمعا في كل
من مر من هنا
دعوه للفقيد بالرحمه والمغفره,,,, نسأل الله سبحانه تعالى ان
يتغمده بواسع رحمته
السالم والجمعان نعم السلاله___ابناء فزع ذربين الايمان واكرام
فيهم صلابه رأي فيهم جزاله___قوما عوايدهم يضدون الاخصام
يوم اللقاء والهوش فيهم صعاله___رجالهم في ساعه الحرب مقدام
ياجيدهم شجعان في كل قاله____أن جاء نهارا فيه عركات وزحام
يحلفون اللي بقلبه دغاله___ياشوق من بخدودها دق الاوشام
والطيب فيهم والكرم والرجاله___مع النباء اللي يشرح البال بشمام
خويهم والجار محدن يناله___طلابهم مايدرك القصد لو زام
من دونهم حدب السيوف النحاله___اللي يقصن عوج الارقاب ياغلام
والمظهر اهل المرجله والشكاله___وافين في كل المواجيب وحشام
أشيوخ ماعن مشيختهم جهاله___ماهي جديده توها من امس والعام
أن جاء نهار الكون فيهم بساله___يوم البنادق صوتهن يرزم ارزام
صميد عيه كاسبين النفاله___أقسامهم بالطيب من خير الأقسام
علي ابن مهنا شيخ والمجد ناله___عطب الضرايب يوم هي عج وكتام
عقيد ضاري للسرا والدلاله___ذيب الغداري يسري الليل مانام
يوم الحرايب كل مقصود طاله ___فوق النضا اللي يقطعن كل مخرام
وانتم على طريقته ياعياله___لو الدعاوي مثلها ذيك الايام
عدوكم بالحرب ياشين فاله___نهاره اسود وان هرب قلت مايلام
أما الصديق مكرمين سباله___في كل وقت وهو على خير مايرام
واللي يضده حالت البؤس حاله___متعرضن لاأكبر خطر يابن الاكرام
مستدخلا سوء البلا في طحاله___شم الفتيل وشاح بالرجل درهام
مايلتفت منحاش مشدوه باله___عاف المراجل كلها شاف عزام
يأهل الوفاء ياطيبين الأصاله___من ساسكم وافين في رد الاعلام
سنيان شيخ أوافياتن خصاله ___رجل كريم وباللقاء تقل ضرغام
حلحيل في كل الامور الثقاله___اللي تكيد العارفه واهل الاقلام
يحلها في حكمته واحتياله___يسقط على الحل المناسب ليا قام
وأخوه مثله شيخ كلن دراله___عبدربه اللي للمعادين لطام
كريم للجيران واللي عناله___فهيم في كل الدعاوي والاحكام
ينظر بعيد ليا طرا ماطراله___ماهو من اللي نظرته تحت الاقدام
ياأخوان كسبه بالقسا والسهاله___لكم على العليا شهادات ووسام
انتم هل الميقاف واهل الجماله___غصبا على اللي داخله شك واوهام
الطيب فيكم ساس ماهو دخاله___متوارثينه من قديمات الايام
وصلو على محمد رسول العداله___عداد من زار الحرم لا بس أحرام
طبعا القصيده موثقه بمقطع فيديو وشيله بصوت الشاعر واعتذر منكم لوجود المرحوم في المقطع
امل منكم الدعوه للمرحوم بالرحمه والمغفره وشكرا لكم,,,,
قدمها لكم اخوكم/علي عبدربه بن مظهر
