1 مرفق
[رسالة]طريقتي في تصفح المنتدى فضايح × فضايح
بسم الله الرحمن الرحيم
س1
أبي اوصف لكم كيف اتصفح منتدى بلي وعلى قدر الامكان أوصف لكم حالتي واوصف لكم المكان
طبعا الجهاز في مكتب تقريبا خمس امتار في خمسةالجهاز على طاوله طولها تقريبا مترين ونصف أو يزيد شوي ماقستها بس شبرتها بيوم كنت فاضي فيه
المهم الطاولة مكونة من دور واحد مسافة متر ونصف تقريبا ثم يأتي متر مكون من ثلاثة أدور في الدور الاول الطابعة والسكانر في الدور الثاني الفاكس والهاتف ومودم هوائي في الدور الثالث الرسيفر وجهاز ديفي دي وجهاز فيديو
الان باقي المتر والنصف وهذا سلمكم الله فيه الكمبيوتر والشاشة ولوحة المفاتيح والفارة ولوحة رسم الكترونية وكوب قهوة طوله شبر تقريبا وعرضه اربع اصابع وركوة وفنجال بدون عروة ( هذا الفنجال مايحلى شرب القهوة إلا فيه ) وجوال وقراطيس مشخبط عليها أوذتني عليه أم رناد تقول اشيلهن اقولها لا إلا هذي القراطيس فيها اشياء مهمة .
تحت الطاولة استريو وسماعتين كبار ومنظم للكهرباء وأربع توصيلات كهرباء وهاديسك اضافي.
كل اللذي ذكرته سابقا باستثناء كوب القهوة والركوة والقراطيس والفنجال مشبوك بالكمبيوتر يمكن تقولون كيف ؟؟
أقول لا تسألوني كيف جربوا وان يأستم علموني وابشروا بالفزعة لكن انا غير مسئول لو جهاز احدكم قعد يكح ولا جته سكته مباغته
المهم
نجي خلف الكرسي اللي أنا جالس عليه فيه تدرون وش وراه ؟!!!!
طبعا وراه
جدار بس
نجي على يمين المكتب في كنبة طولها مترين لاتقولون ليش الكنبة تدرون ليش علشان أنام عليها طبعا لاني اكتشفت أن النوم على الكنبه نوم ذيابه تنام بأحدى مقلتيك واللي ماهو مصدق يجرب بس انا ماني مسؤول عن اللي يتقلبون وهم نايمين
الان ماذا امام المكتب أمام المكتب سلمكم الله دولابين للكتب قطعت علاقتي بها منذ عرفت الانترنت وأحس انها مضيقة على المكان لكن ذكرياتي معها تمنعني من ازاحتها وعلشان مايقولون لي إني قليل خاتمة ( وحتى ابين لكم أني مطلع ومثقف وحتى لو دخل احد مكتبي من العمال اللي اجيبهم بين فترة واخرى يشيكون على الكهرب يقول هذا انسان مطلع )
المهم الان نجي الى أهم نقطة وهي لما افتح الجهاز وادخل موقع بلي وش اسوي
أول شيء اشيل العقال وارميه على الكنبة والحقه بالشماغ والطاقية وبعدين افتح باب الدولاب واعلق عليه الثوب واروح لغرفة النوم والبس ثوب النوم اللي معلق على المعلاق ( شفتوا وشلون أنا ضلالي على قولة أخوانا المصريين )
وبعدها اجلس على الكرسي وأقول يافتاح ياعليم وفتحنا الموقع وقبل مايفتح انادي على أم العيال القهووووووة لحظات وتجي أم رناد قد تقدر اللحظة ببرهة وقد تقدر بدهر حسب مقياس اللحظة العربية وتأخذ الركوة اللي شربتها من نص ساعة تقريبا وتاخذ معها العقال والشماغ والثوب والطاقية وتروح تعلقها بالمعلاق اللي أنا أخذت منه ثوب النوم عرفتوا الحين ليش أنا ضلالي !!!!!
الان دخلنا على منتدى بلي اخوكم يتمقله زين يمين يسار ومايخلي موضوع مايفتحه على قدر المستطاع والياخلصت من فتح المواضيع الجديدة وكانت على مايرام تحمدت الله ونسيت القهوة خير شر ماعاد اسأل فيها أبد رحت بعدها افتح البرامج الثانية وانا رايق واولها الفوتو شوب ومن بعدها امج ردي والفرونت بيج وميكروميديا سي بلس وهكذا بقية البرامج السنعة اللي تثمرعن شيء في النهاية
لكن...
إن شفت لي موضوع ماهو يم جادة موضوع يسد النفس موضوع يغث ولا رد يغث ....
على طول فتحت 4 نوافذ للمتصفح واحد للمنتدى وواحد للوحة التحكم وواحد للاي بي وواحد للمتواجدين الان أون لاين وصرخت القهووووووووة بسرعه ( قوي صح )
طبعا ألان انا في وضع الاستعداد حتى في الجلسة يعني ظهري مايلامس الكرسي وعلى اعصابي ولساني يردد سلم يارب سلم
المهم لا خلصت المشكلة وحلوها الاخوان ولا انا سبقتهم عليها احمد ربي على شيء واحد فقط
إني فسخت الشماغ والعقال والطاقية ولبست ثوب النوم لأني أجد ان معظم مشاكلنا في هذا المنتدى مع نوعين لا ثالث لهم وهي متعلقة أولا وآخرا باللبس
الأول: من يتصفح المنتدى وهو لابس ثوب مكوي ولابش شماغ مكوي وحاط العقال ويمكن بعد لابس بشت وجزمة ململعة أكرمكم الله وماسك بيده مفتاح ريون ( نوع من انواع الهونداي ) وميدالية علي علامة بورش وكأنه في مركز تجاري ولا مدير شركة وتلقاه فاتح صفحتين منتدى بلي وقوقل وكل مالقى موضوع في المنتدى رفع يده على هيئة منقار طائر أبو منجل وقال إيش المواضيع القرف هذي لا لا الظاهر انهم ما يعرفون من أنا ؟؟!!!!
والثاني اللي يتصفح المنتدى ولابس شورت وتي شيرت عليه صورة توم كروز وقاص كابوريا والسوالف متدلية اليا اسفل الحنك وحاف الشارب خط منزله الى اسفل من الدقن ولابس اكرمكم الله بوت أبو كفرات وقدامه كوب ايسكريم بينت بتر من باسكن روبنز وكوب موكا بالفانيلا يمزمز عليه وباذانه سماعات وحاط اغنية شعبولا أنا بكره اسرائيل وفاتح متصفحه على منتدى بلي والصفحة الثانية على شات ميمي وكل ماشاف موضوع قال ايش التخلف هذا ياماااااااااما أو لالا بلييييز نو نو نهي نهي سي سي .
لذلك اقترح على إدارة المنتدى منع تصفح المنتدى إلا بثوب النوم أو البيجاما حتى تقل مشاكلنا ونصير كلنا واحد وشكل واحد وبمستوى واحد وحتى نحس فعلا اننا في بيوتنا اما على الضوابط فالنوعين السابقين أنا متأكد انهم ولاشافوها أصلا وحتى نريح المشرفين من الشد العصبي والساعات الطوال اللي يقضونها على الانترنت لدعم مسيرة هذا المنتدى ولا إيش رايكم ؟؟؟؟
