قصيدة رثاء الشهيد : لــ الشاعر سلطان سعد الوثر البلوي

مرثيه بالعميد الشهيد /عودة معوض البلوي


قام الفجر سمّا وفسّر ذراعة
وضا وصلى في خشوع ومذله

لله وحده سجدته وانصياعه
هذا هدى الاسلام مذهب ومله

مايدري ان العمر حان انقطاعه
في يومه اللي تو مازال ظله

يالله تلهمني من الصبر ساعة
على الفقيد اللي رحل عن محله

لاشك خلقك .. وهْبتك .. والوداعة
لكن حزني _ ضمن خلقك _ جبلّه

هذا الكريم السبع نسل السباعة
هذا الكرم والجود كاره وحلّه

منخا العزاز اهل الكرام والقناعة
ياقف معك بالعون دقه وجله

سمح اللقا .. وانقى الطبايع طباعه
لا شي عن فعل المكارم يشله

هذا العرادي من بلي من قضاعة
وسمٍ على التاريخ كلن يجلّه

عميد ركن معمّدينه قطاعه
اقصى شمال المملكة قايدٍله

قالوا مهمة قال سمعٍ وطاعة
الخوف ماعقّب رخا وامن .. لـّـله

حرٍ على العسرات ياطول باعه
اليا دخل ميدانها يستحله

لايامحمد جعلها لك شفاعة
ابوك عينه بالرضا مسفهلّة

يقول _ خير الخلق جود وشجاعة
من لانطق الا بوحيٍ من الله _

: ( المسلم ان صلى الفجر في جماعة
فــهو بذمة ربـــه اليـــوم كلــه )

أو مثل ماقال وتواتر سماعه
رواه مسلم واخرجه في سجلّه

قصيدة الشاعر / سلطان سعد الوثر البلوي

الله يرحم العميدالشهيدعوده معوض البلوي وجميع شهداء الوطن