أوسكار وابو هيثم والاكتتاب في .... ينساب

أيصبحكم ويمسيكم الله بالخير يا وجيه الخير




كيف أنتم وش أخباركم صار لي مده منقطع عن المنتدى والنت عموما بسبب ينساب وابو هيثم


والأكتتاب. الناس صابتها خفُه بسبب هالأسهم كل يركض ويحوش بهالكروت وكلن يعد عقبه وعقب عقبه

واللي أول مضيع عدد بزارينه مع الأكتتاب عني أنه وكٌد عدد أضعيفينه

ولي مع ألأكتتاب قصه..........



هذا يا طويلين العمر كنت جالس في أمان الله منسدح بالصاله أتابع مباراه للنصر ومتحضن لي براد

شاي منعنع وماسك كاستي من الغياه بطرف أصابعي وأترشف الشاي تقل أترشف لي مرقه

ورافع رجليني على المركا ولا أسمع الا وحيفة أبو هيثم جاين يركض فحمان ينهت أو سـ.... أوســ..

وده يناديني بس من الفحمه مهو قادر وانا داري أنه يقصدني بس قاعدن أستهبل عليه يعنني ما اني سامعه

ألين قال : أوسكار يا مال العمى الناس روحت بالاسهم وانت دوبك الكوره .... واهدم بيتك علامك

ما علمتني أن الأكتتاب بالاسهم بدأ يا خامد الريح

أوسكار : يا بيي صار أنت ما كل صبح وعصر وانت متقلط عند أهل الشبه اللي ما لهم سالفه الا الاسهم

ابو هيثم : أقول لا يكثر هرجك وقم هالحين بـل راسك ولا ينشف غير بالديره جمع كروت عمانك وان قدرت

تاخذ كروت خوالك خير وبركه واللي كرته من عشر وفوق عطه ألفين ريال وخلك حول ابو حرمتين وثلاث

هم اللي عليهم الكلام

أوسكار : يا بيي يا غناتي ليه ما تطلع أنت ؟ منها أتغير جو ومنها أتسلم على عماني ومنها أتجيب معك

كم أطلي مع أمديهنة سمن وخريطة ثيران ( مريس )أنا عندي مباراه بكره ولو طلعت الديره ما احدن معطيني وجه

وبعدين تعال نسيت عمي أبو ثامر >>>على وزن ابو هيثم .... يومنه سبقنا بأكتتاب البلاد وأشترى الكروت

ولا خلى الا اللي ما به فايده

ابو هيثم : أي والله أنك ذكرتني تدري عاد ..يا الله طلعنا

أوسكار : يا بيي والمباراه ؟


أبو هيثم : أقول يا زيكو الهروف قم حط العزبه بالجيب لا خلي العقال يلعب بك طول وعرض


حبيب هالوالد معودنا من صغرنا على الديمقراطيه وأحترام الراي الأخر ما أدري ليه لا تقابلنا أنا وياه

تقل فيصل القاسم وضيوفه في الاتجاه المعاكس


المهم سرينا بهالليل وبهالبرد كل واحد فينا داقن اللطمه ومسرحين وكل ما نوَدت وغفت عيني مسك ابو هيثم

فرمل ثم راسي صقع بالطبلون وعلى هالحال الين وصلنا ديرتنا ولن جبهتي من الصقع وارمه ومايله على جنب

وانا كلي صرت أمشي على جنب تقل ددسن مكسور بها عمود التوازن

ومن فجر العالمين وحنا ما غير أنلوب من بيت الى بيت أنجمع هالكروت لكن البدو هالمره ما حولك بدو

كلن ماسك كرته ويحرج عليه بخمس الاف واللي ما يدفع دربن جابه يرجع معه

المهم جبنا لنا كم كرت وجينا راجعين ويوم وازنا بمركز المعظم نطحنا راعي بل سوداني قلت يا بو هيثم

وش رايك أنريح عند هالزول ونتقهوى ونعين من الله خير وثم نمشي

قال : تم يا الله نسمع شورك هالمره لا تقول عقبين ابوي ديكتاتوري >>>>>> لا أبد من يقول

والله وننزل ونسلم على الزول وساعه وهو يجمع الحطب وساعه وهو يشب النار وساعتن ثالثه وهو

يسوي الشاي وأخرتها عطاني بيبسي فقلت فيه :


يا ما حلا البيبسي على شبة النار ............................. وأبريق شاي باردن مثل راعيه

يا زول ما تعرف مقدار ضيفك أوسكار .......................... اللي مع الديره ابو هيثم أمعنيه

مقفي ومقبل تقل مفساح مقطار ................................ عزا الله أن راعي الاسهم ربي مشقيه

المهم وصلنا تبوك يوم الأربعا العصر وعطاني ابو هيثم الاوراق وقال لي بكره مع ذرة الشمس

وانت عند البنك عب الاستمارات وسلمها قبل ما ينتهي الاكتتاب ترى بكره الخميس أخر موعد

لا تنام لا أدعيك بنومة الريح

قلت : يصير خير

وأنا من التعب نمت ويوم صحيت ون الساعه تسع ونص وانا من الذله من ابو هيثم نقزت من فراشي

بثوب النوم والكشه طايره وحفيان و..... وينك يا البنك

وأجي ولا الناس ماسكه سرا وأصف معهم ويوم جاء دوري قالوا عفوا أنتهى التسجيل

لا واحلالاه عليك يا أوسكار رحت ضحية بين ينساب وابو هيثم

الليله مراحي برا البيت ما أقدر أواجه ابو هيثم الا والجده معي تستخدم الفيتو لنقض أي قرار ضدي

مصدره ابو هيثم

ما يستفاد من هالقصه :

1- القناعه كنز لا يفنى

2- كرتك بيدك خير من كروت الديره

3- لا تؤجل أكتتاب اليوم الى الغد

4- من فاته ينساب لا يفوته بدريس الأكتتاب





مع تحيات أخوكم أوسكار الهرفي

السلام عليكم ورحمة الله وبركاته
اوسكار الله يعطيك العافية ودمت لنا يامبدع

اوسكار الله يعينك

بين الديموقراطيه و الديكتاتوريه


سالفه رهيبه

اوسكار الله يعطيك العافيه.

الرائع اوسكار

من طول الغيبات جاب الدراهم



سالفه سجيت معها وابي ارجع اقراها مره ثاني

اما الفيتو لحاااااااال

لك القلب ياوسكار

السلام عليكم

اوسكار.. انا متابع كل كتاباتك

.. الى الامام

..وعطنا جديدك

محبك

أهلا بأوسكار عوداً حميداً

كعادتك تتحفنا بالمواضيع الممتعة .