أنفلونزا الأسهم

بسم الله الرحمن الرحيم


السلام عليكم ورحمة الله وبركاته




كيفكم وش علومكم وكيف الحال وش الاخبار>>> ورا ما تخلص >>> زين لا تعصب


الحاله هاليومين وعلى وجه الدقه من يوم الخميس كسيفه وأنا يا خواني ما ادري وين ألقي

ووين أروح أبو هيثم واقفن لي بالجانب الايمن والجده يساري والأسهم والجماز أمامي

القصه هاهي من بدايتها خذوها >>> لا خلوها ..... يسمع بالمحاوره :


في يوم من الأيام قدًر الله علي وأشتريت لي كم سهم قلت أطقطق فيها وأجمع لي تحويشه

تسمح لي بتحقيق أحلامي اللي ما هي بسيطه نوعا ما ولا من زود الحظ قلت للجده :

وش رايك يا جديدتي اتخاشريني ؟

الجده : والوعتي !! وش اخاشرك به

قلت : بالاسهم يا جده يعني تعطيني صراف الضمان وذهيباتكِ اللي عندكِ وانا أطقطق بهن

والكسب بيني وبينكِ هاف أند هاف

قالت : يا مبرطمتن عليك أنت ليه ما تهرج زين وأنت بس لك نغترا وشي هفهفته هاذي

قلت : يعني النص بالنص هاه وش تقولين

قالت : أرا تزلقطت عليك أوسكار وش دراك عن ذهبي .أنا كل اللي عندي اجلاده بها عشرين

جنيه وست مطاوي ذهب أبو منشار وأربع فتاخ وجريرين ما بهن غير الأميه

قلت : تصدقين يا جده ذهبكِ هذا قيمته يفتح لي محفظه في البنك الأمريكي

قالت : أسمعني زين وخل عنك المطابحه أنا ودي أعطيك ياهن ولوانهن غاليت عندي يا شين

بس يا الله ودنا انطب بالاسهم اللي انت تقول وشوف اخرتها معك يا شوحان

وش لكم بكثر الهرج اخذت ذهب جدتي ووين أنت يا رميزان وأبيعه وركضه على البنك

وأشتري كم سهم بالمواشي والكهرب ................

طبعا أبو هيثم والوالده ما دروا عن تجارتنا أنا والجده مغير يشوفونا متقابلين

كل ضحويه وعصريه متسمرين على قناة العربيه مبروك المكيرش أرتفع

واهمي يا وليدي الكهرب غدا لونه أحمر >>> مفهم الجده على أنه اللون الأخضر ربحان

واللون الأحمر خسران


وأبو هيثم بعد مهو هين مشتري بالجماعي واللجين ولا يعلم يعنني ما اعرف بالأسهم

ولا دريت غير الوالده جايبتن ذهبها بكحيفلته واطشه علي وهي زعلانه والوجه مكفهر

وتقول : لا واخسارة تعبي معك يا دوحان اركض أشمام اشتري لي اسهم بالمكارش

اللي انت وجدتك مشترينها أخفس يا مخيولك اللي نفعك قصر عني

قلت : أبشري باللي تطلبين بس ودي اعرف شغله واحده كيف عرفتي وهو سر بيني انا والجده؟

قالت : دريت من عماتك يوم سيرنً علينا وجدتك قامت توزع عليهن وعلى عقبهن من هالفلوس

وتحمد الله وتقول البارح قفل المكيرش على نسبه وانا يا غافل لك الله الى ما علمتني

بالسالفه من أولها الى أخرها

وهكذا أستمرت الحال والأسهم بأرتفاع واللي انحوشه أنحطه بهالأسهم وزانت لنا اللعبه

وزاد لنا الطمع مما جعلنا نبيع الأرض المنحه اللي لي واللي للجده وحتى أبو هيثم باع

الجيب ومن هوس الأسهم بغى يلحقها العماره بس الله ستر

وأتى يوم الخميس الموافق 24/ 1/1427هـ ...............


كنت نايم ولا صحاني غير الوغطره أي صياح الوالده وجدتي وينادن علي

وانا انقز من منامي اقوم واطيح ما تشيلني عظامي واتوشع حدى هالخيين الله يصلحهم

واثرني وطيته على بطنه وانا ماشفته ولا صحيت زين غير يوم أمي دفتني وقالت :

فرثنت شبد اخوك فرثن الله شبدك ولا الجده تشر لي وتقول يا اوسكار البليه كله أحمر

وأنا أنزل للصاله ولا ابو هيثم معيصب راسه وقدامه علبة بنادول وله قربطه ويقول

الله يخلف علينا الله يخلف علينا وأناظر وانه حاطن على العربيه وعلى ما قالت الجده

السوق كله غادين أحمر نازل نسب وأفتح الاب توب أدور علمن زين يرفع من معنوياتنا

ولا لقيت الخبر اللي يسر والوضع بالبيت أصبح كئيبا ً ما احد يكلم الثاني وبالذات أنا !!الوالده

والجده ما يدنني أهرج ولا يريدن شوفي كل ما قلت شي قالن كلها سبايبك يا هامور القشل

مع أنه يوم كانن يربحن ما يجيبن لي طاري وكل هذا يهون ولا أني أشوف أبو هيثم بهالحال

كل يوم يطالع الأسهم ويتحسر وبس متكدر ومتغلمط بفروته ومنسدح بالصاله ومقابل

التلفزيون وكل ما سمع كلمة( طلع) وهو فر لو أنه نص الليل أثرت عليه هالأسهم الله يغربلها

من يوم تشبق فيها راحت الضحكه والوناسه أن ربح ما نام من الفرحه وأن خسر أكلنا

وأصبح خوفنا من أستمرار هبوط الأسهم أشد من خوفنا من أنفلونزا الطيور التي أصابت

مناطق قريبه منا ولكن وقع الهبوط كان أشد على أبو هيثم وعائلته منها

وبهالمناسبه قلت :

الأسهم طاحت والسبه هوامير ........... زعلوا على الجماز يوم حدد الأسعار

هوت من الاعلى كما يهوي الطير .......... وضمن الضحايا الجده وحفيدها اوسكار

اسبوع الاول ودي من الفرحه أطير ........... واليوم ضغط وصداع ولا أطلع من الدار


ما يستفاد من اللي صار :

1- الصبر زين يا جده أنت وأبو هيثم

2- ما طار سهم وارتفع الا ويجيه يوم ويقع

3- لا تخاشر احد ويغثك بقولة ضاعت دراهمي كل مشروك ماهو مبروك

4- الطمع ضيع ما جمع

5- لا تعطي سرك للحريم تراها مقيوله قالها قبلنا حكيم


الله يلطف بنا ولا يجعل الدنيا أكبر همنا ولا مبلغ علمنا

مع تحيات أخوكم أوسكار الهرفي

الأخ /[blink] اوســـــــــــــــــكـــــــــار[/blink]
................................
تصدق حبيت جدتك :صدق من قال العجائزخيروبركه
................................
[blink]
والله يعطيك العافية
[/blink]

اوسكار السلام عليكم واللة يعطيك العافية وهذي حال الدنيا يوم عليك ويوم لك ويوم اللة يكفيك شرة بس على كلامك شكلة هالاسبوع كل الايام عليك بس عليك بالصبر والجدة طلعها على الربيع وفتك او سو هروب من الديرة حتى ترجع الاسهم زي وضعها الطبيعي واللة هالعجيز انتبة منها لا تذكيك اخر الليل خاصة اذا دحدرت الاسهم .. عمرك تراة وداعة معك انتبة انتبة انتبة ....... ومشكور على المقال واللة من جد انة روعة وبالتوفيق اوسكار الهرفي

هههههههههههههههههههههههههههههههههههههههههههههههههه هههههههههه

اثري جدتك ماااااااهي بسيطه راعيه اسهم
ههههههههههههههههههههه

صدقت الاسهم صارت ماخذه عقول النااااس السوالف راح طعمها والسبايب هالاسهم

المتميز اوسكااااااااااااااار
ضحكتنا وامتعتنا وسليتنا وانسيتنا هموم طيحه السوووووووووق

اوسكار
دائم مبدع ومتميز
دمت بخير

هههههههههههههههههههههههههه
هههههههههههههههههههه

الله يعطيك العافيه على الموضوع الفكاهي

هذي حال الناس اليوم مع الاسهم

مشكور اوسكار