اخر قصيده للشاعر طلال الرشيد رحمه الله

%%% (( أخر قصائده قبل وفاته بشهر(رحمه الله))) %%%

أسلحتنا في المصاحف

يا زمان الذل

.. زل..

ما بقى في الناس شيمه

وما بقى للعدل خِل

ومن كثر ما حنا صغرنا

صرنا حتى بدون ظِل

صرنا ما نملا المحِل

صرنا أمه تحتقرنا

كل أرذال الأمم

لاتصدق ياعزيزي

بالعروبه والقيم


يا زمان الشيخ بوش
يكفي هزأت المبادىء

يكفي أحرجت العروش

الكرامه يا طويل العمر ما تكفي النعوش


يا زمان البيت الابيض
إنت مالك أمر يرفض

تبغى هذا الدين أطول

تبغى هذا الشرع أعرض

إنت إكتب وإحنا نحفظ

مو غريب

لو نَحَسْب الخبث طيب

ومو غريب

نصرخ ولا من مجيب

ومو غريب

لو يكثر أعداد الأرامل

فبلاد ما ترضى الهوان

وحكومة ما تعرف تجامل

ومو غريب

لو تعتبر حتى عصا الكهل العجوز

أسلحة دمار شامل


يا زمن نهب المتاحف
جانا جيش الحقد زاحف

جتنا لعلوج الزواحف

فتشوا حتى العقول

وأسلحتنا في المصاحف!!


يا زمن أمريكا شكراً
أنتزعت الأقنعه

إنت ازلت الأقنعه

وانكشف وجه النوايا

واتجاه الاشرعه

ما نصدقهم خلاص

وما بقى من نسمعه

كل ذولا إمعه


بس خلك مستريح
الصحيح

يوم هب الحقد من واشنطن ولندن

كذب باسم المسيح

الكل فضل ينحني

وبغداد اختارت تطيح


يا زمان الازمنه خليك شاهد
إحنا مو ناقصنا واحد

هو صلاح الدين

احنا ألف مليون واحد

هم صلاح الدين

حنا بس بعيب واحد

هو.. فساد الدين

يا زمان الذِل

حِــل

قلت لك مالك حِل

************************************************

السلام عليكم ورحمة الله وبركاته

قصيده اخرى للشاعر طلال الرشيد رحمه الله

جتني

جتني وشافتها عيون حايرات
ذا شعاع الشمس او هذا سناها
ضاعوا اللي جوا معاها مسيرات
واقبلت تمشي تقل محدٍ معاها
ياسنا الفضه وياجيد المهات
ياشذى نبت الخزامى في وطاها
قلت كن بوجنتك زهر النبات
قالت ان الرمش يجرح لي صفاها
تجرح الظلما عيون ناعسات
سلهمت وأغضت تغطرس في بهاها
حققوا بالشوف في لون الشفاة
هو خذا منها الشفق والا عطاها
ولو ظلام الليل يعطينا ثبات
فيه من لون الشعر والا كساها
كيف أباصف زين كاملة الصفات
كيف أباصل في حروفي منتهاها

السلام عليكم ورحمة الله وبركاته

وقصيده اخرى للشاعر الامير طلال الرشيد رحمه الله


يا طاهره



يا بنت أنا ماني كذا وظنونك تكذب عليك
كلي عيوب وما قوت تخجلني ظنونك واتوب
اكذب عليك ودوم اخونك والبس الابيض واجيك
واعشق معك الفين وجه ويمتلي صدري قلوب
احلى الكلام اقوله لك لوقلته البارح لذيك
يوقف على شفاهي معك مراهق صب لعوب
اكذب ولا ادري ليه اكذب اعشقك ما ارتجيك
اخاف من صدق الحقيقه في الهروب من الهروب
والله احبك واعشقك واعرف زمان اني ابيك
ولكنها هـذي الحياة تعلمت من الذنوب
العين عجزت تعتقك القلب عيا يـشـتريك
في السجن خيال وفي في الصدر رجال كذوب
هذي الحقيقه ما يجي في الكون اطهر من يديك
وانا الذي انقظ وضوء الغيم والماء والهبوب
انقل عيوبي فوق متني وانتي لعيبك شريك
وباكر تبسملي وجيه لك يعبسها الشحوب
يا طاهرة حنا كذا.. والمظهر يكذب عليك
يمكن يجي يوم يجي نخجل من ظنوك.. نتوب

وقصيده اخرى للشاعر الامير طلال الرشيد رحمه الله


محتاج لك

انتي بكف وباقي الخلق في كف

متعليه في وسط قلبي ولك شان


في غير وصلك مالقلبي ترى شف

محتاج لك يانور عيني وشفقان


لا جابوا اسمك صرت انا تقل مختف

مالي على نفسي الى اطروك سلطان


من غير حبك غضت عيوني الطرف

ياللي جمالك صار للزين عنوان


اريد انا قربك ترى ياغذا الحرف

وان ماحصل موتي ودنياي سيان

وقصيده اخرى للراحل طلال الرشيد رحمه الله

علمتني

علمتني وشلون احب
علمني كيف انسى
يا بحر ضايع فيه
الشط والمرسى
علمتني وشلون احن
علمني كيف اقسى
سير على
بس امسح دموعي وروح
سير على
جبلي معك قلب وروح
سير على
اذا تذكرت الجروح
ياطاغي النظره خطاء
تجزى بها البخل العطاء
وانا الي اعطيتك
امن عين وجفن
هذي فراش
وذا غطاء
يا جرح من وين ابتدي
وانت معي من مولدي
وعيت يدي على وداعك تهتدي
بس انت علمني الجفاء
دامي عجزت
اعلمك كيف الوفاء
علمتني كيف السهر
ونسيتني الممسى
علمتني كيف احب
علمني كيف انسى

وقصيده اخرى للشاعر الملتاع طلال الرشيد رحمه الله

مكانك مكانك

أموت من فرقاك .. و أموت بلقاك
وأموت من جورك .. و أموت بحنانك
كلٍ قضاه يموت مرّه .. و يفداك
و أنا أموت ألفين مرّه .. عشانك
أذكرك.. لا مني نسيت إني نسيتك
أنساك .. لامني ذكرت نسيانك
رضيت أنا بالهم لرضاك مرضاك
و ارخصت لك قلبٍ جرحته .. وصانك
أجيك في صدري عتاب .. و أبجفاك
و أرجع ألوم الوقت و أقول خانك
أحب فيك .. احساسي إني بلاماك
في عز خوفي منك أحس بأمانك
عجزت أفرق بين وصلك و فرقاك
ياللي عطيت الناس بيدك عنانك
مر تجــــيــــني لين أقول إنـــي إيـاك
و مر تروح بعــــيـــــد و انسى أوانك
أقبل و تقفي .. و اعتذر عن خطاياك
و أقول ما عييت .. عيا زمانك
و إن خانتك دنياك .. أو خنت دنياك
إرجع و تلقابي .. مكانك.. مكانك