عندما يطول الغياب ويشعر المرء بالتقصير

يحاول أن يقدم مايشفع له ذلك الغياب

كلــــــــــــي لهــــــــــــــا

الوردة اللّي روح روحي شذاها = زرعتها بذرة غلا وأزهرت ليّ
سقيتها لهفة خفوقاً ظماها = وأشعلت في عتمة دياجيرها ضيّ
على الأمل مرت سنين برجاها = عيني عليها شمس ورموشها فيّ
قلت الوعد باكر..وباكر خذاها = تبعثرت وأيّست منها وأنا حيّ
في غفلتي مر الخريف وجناها = وأنا جنيت من الوله كثر ما فيّ
المشكلة قلبي فقدته معاها = من عقبها ماني حريصاً على شيّ
أحيان أسافر في خيالي وراها = وأحيان أقلّب دونها راحة إيديّ
مثل اليتيم أحس روحي بلاها = بعض الفراق أصعب من الموت بشويّ
وإن جيت أسلّي خافقي عن هواها = أعذر وقال ارتاح لاتكثر الكيّ
والله مالي خاطراً في سواها = كلي لها والود كله لها هيّ
مهما السنين تمر يبقى غلاها = عبر الزمن يطوى على مهجتي طيّ

أخوكم / إبراهـــــــــيم عـــــواد التلفيــــــــه