يا طائره لا تطيري مظنون عيني مسافر

بسم الله الرحمن الرحيم
السلام عليكم ورحمة الله وبركاته

لي فتره وأنا متغيب بسبب أبو هيثم الله يهديه والعلم سلامتكم

هذا يا طويلن العمر في عصريه من العصريات كالعاده لابس لي
رياضه ودي أروح الملعب معنا مباراه عند مركز سلطان الحضاري
ومن عادتي قبل ما أروح غير أصطبي على أبو هيثم والوالده والجده وأشوف
علومهم لأن هم ماشاالله عليهم الأحداث عندهم متتاليه ومتلاحقه
يعجز مراسل الجزيره عن مجاراتهم ويوم أصطبيت ولنه الوالده
والجده متراكيات ويسولفن عن الزواجات اللي ودها تصير بالعطله
الجايه ومختلفات على عمر وحده من العرايس هي منهي سنينته من أخواني
الجده تقول : أنا أخبرها يوم السيل اخذ ابو راكه وهي
جذيعه فيها ست سنين سبع سنين
الوالده : يعني على كلامتش هاه أنها هي واوسكار بهم سنه
الجده : لا لا بالله اوسكار أكبر منها جبتيه بقصَير يوم مات الملك خالد
الله يرحمه وهي أمها جبتها بالصفري يوم أنا نازلين برجوم عقيل
هنا تدخلت وجذبت أطراف الحديث غصب منهن ولا هن منسجمات
مع حديثهن هالحريم يشرقن ويغربن يبدن بسالفه فيتفرع منها مية
سالفه فقلت : أقول بدري على سوالف الزيجات لكن أنتن تبغن شي قبل
ما أمشي
طبعا الوالده قالت : لا يا وليدي ما ودنا غير سلامتك بس لا تجيني بعدين
تضلع ترى الحلبه غلقت وانا كل ليله وانا أصبخ على رجليك
ونطت الجده وقالت : يا وليدي وانت جاي هاتي لي معك اللي هاك
الليله جبته
فقلت : وشو يا جده
قالت : هذاك اللي به حبتين عنب وشلخة تفاحه وشلخة ماادري وش
قلت : بس بس عرفته ودش كوكتيل شقف أبشري
وأنا أطالع طول الوقت ولن أبو هيثم ما هو حولنا يقرا له جريده
وعلى نفس الصفحه ما قلبها نوب يتبسم ونوب يسرح كأن ما حد
حوله أهرج عليه مهو يمي عودت مشيت
وعلى المغرب رجعت ولن ابو هيثم على محله اللي انا خابر
وجريدته قدامه على نفس الصفحه
فتوغوش فكري وقلت : خير يا الحبيب وش هالخبر
اللي من العصر وأنت تقرا به.. شيه عطني خلني أقراه
وهو يخطف الجريده قبلي وقال : ما ودك تنقلع عن وجهي
لا أنجمك بهالثلاجه بين عيونك اخليها كثحة الذرور>>حبيب الوالد

المهم قعدت أحلوص عنده الى ما قريت الجريده ولن الخبر
مقاله عن زواج المسيار وزواج الفرند
هنا زانت لي الجلسه وقلت خلني ألعب على ابو هيثم
فقلت : شكلك ناوي لك على شي يا ابو هيثم
فقال ابو هيثم : اقول يا وليدي أنت لي واللا لذيب ؟
قلت : أفااا لك يا الحبيب بس نوبات الذيب ينتش مني شوي
قال : أرا شانت هالسمقان اللي تقل سمقان اسمق ألينك
يا هالوليده ما ينتحيزم بك :
قلت : خلاص ولا تزعل كلي لك بس قول وش انت ناوي عليه
قال : شف يا اوسكار أنا ناوي أتزوج بس ما ودي أحد يدري
هنا نقزت وقلت : أهاه يعني ودك بالمسيار
قال : يا مال الركفه اللي دايم وانت مطيور أنت ليه ما تنثبر
وتركد وتسمع السالفه زين
أنا ما بغى زواج المسيار لا من بعيد ولا من قريب انا واحد من عمالنا
جايب أخته بتاشيرة عمره وسيرت عليه وشفتها واعجبتني ومزحت
عليه وقلت ما تزوجني أياها قال : أنت بس تأمر يابيه هو حنا انطول
وده يزوجني اياها وانا بوقتها ما أعطيت الموضوع بالي مار يوم قريت الجريده حسيت بالوحده والفراغ مثل ما أنت
شايف مغير مقابل التلفزيون واقرا بهالجرايد لكن ودي أعطي فريد
أخو فريده أجازه وأسافر معهم وهناك نكتب الكتاب على قولتهم
ونعلي الجواب >>> أشوف الوالد من الحين قلب اللهجه
وأتركها عند أهلها وكل ما صحت لي فرصه رحت لهم
فقلت لابو هيثم : شوف يا طويل العمر أذا انك مصمل على
الزواج فالأحسن أنك تاخذ من عربانا مرداهم منا وفينا وتكاليف
زواجك علي ولا بعد بجيب منيف وتركي 2 يحيون حفلك
الميمون وأحجز لك سويت بفندق ميسلون
قال : أنا مهو خافيني بس أنا ودي أسوي سواة جارنا أبو عوده
اللي من يوم تزوج من برا رجع شباب حتى مركوعه طشه
قلت : أقول يابوهيثم لا يغرك أبو عوده وطشته لمركوعه
تراه أول يلف الحاره على رجليه والحين يوم يجي وده
يقوم غير يحبي حبويان ولو انه بكيفه كان قعد على مركوعه
بس وش تقول حكم القوي على الضعيف
هنا الجده جت تسأل عن عصيرها وقالت : أما أنت طولت
هي وش هالنجاوي اللي أنطلقت عليك انت وابوك الليله
لا يكون وده يخطب لك
قلت : لا بالله أنا اللي ودي أخطب لولدش
الجده نست عصيرها وجلست وبصوت منخفض وبفرحه وتلتفت
وقالت : يا وليدي عساه مبروك أنت صادق ولا تمزح
قلت : صجن مهي هذروه أبو هيثم ناوي يجيب لنا خاله
الجده بأبتسامه عريضه وحاطه يدها على فمها حتى الوالده لاتسمعها
رحيمكم منهو ؟
قلت : رحيمنا فريد أخو فريده
الجده بصوت عالي وشالت يدها عن فمها وحطتها على رأسها
وقالت : واهمي !! وش فريد لا فردتكم قومة الغنا
طبعاً أبو هيثم ينظر لي بحقد على شوية غل وقال : أه أنا قلت
من الاول أنك ما يتحيزم بك بس رصتني عليك العازه
الجده مازالت لها قرمطه ونغتره وافريدي الأقشر لا بالله يا وليدي
ياابو هيثم اذا انك مصمل أنا أخطب لك لكن قصة أنك تزوج
من برا وتجيب لنا وحده تصير علينا هم لا تعرف طبعنا ولا
نعرف طبعها هاذا اللي ما وافقك الراي عليه
أبو هيثم : أقول دوحان لا يهج عليش بصفيره مهنيا من
العلوم هذه شي
وبعد كم يوم سافر فريد وأخته فريده وعندما درى أبو هيثم بسفرهم
رجع لجريدته وهو يغني :

طايره طارت وفيها نور عيني .. ليتني طيارها واللا المساعد
يوم طارت وأرتفعت بالحنيني .. قلت بعدها يا هلي ماني بقاعد

اوسكار
اذا رجع فريد اخو فريده علمنا
فيه ثنين يبغون زواج المسيار على طريقة ابو هيثم
كل شلتهم تزوجو للمرة الثانية ما بقى غير هم

واحد من عمالنا
جايب أخته بتاشيرة عمره وسيرت عليه وشفتها واعجبتني ومزحت
عليه وقلت ما تزوجني أياها قال : أنت بس تأمر يابيه هو حنا انطول



البعض مايصدق احد يمزح عليه ويوافق ويورطه






الجده بأبتسامه عريضه وحاطه يدها على فمها حتى الوالده لاتسمعها
رحيمكم منهو ؟
قلت : رحيمنا فريد أخو فريده

امحق رحيم



اوسكاااااااااااااااار

أوسكار المبدع أسال الله أن يوفقك
الحق فريد وخله يجيب فريده
ودنا نزوجها لأبو هيثم عسا ما يزعل عليك
وأنت مركوف ومستعجل خلهم يتهنون ويتزوجون بالحلال
الله يوفقك أوسكار


مقاله عن زواج المسيار وزواج الفرند
هنا زانت لي الجلسه وقلت خلني ألعب على ابو هيثم
فقلت : شكلك ناوي لك على شي يا ابو هيثم
فقال ابو هيثم : اقول يا وليدي أنت لي واللا لذيب ؟
قلت : أفااا لك يا الحبيب بس نوبات الذيب ينتش مني شوي
قال : أرا شانت هالسمقان اللي تقل سمقان اسمق ألينك
يا هالوليده ما ينتحيزم بك :
قلت : خلاص ولا تزعل كلي لك بس قول وش انت ناوي عليه
قال : شف يا اوسكار أنا ناوي أتزوج بس ما ودي أحد يدري
هنا نقزت وقلت : أهاه يعني ودك بالمسيار
قال : يا مال الركفه اللي دايم وانت مطيور أنت ليه ما تنثبر
وتركد وتسمع السالفه زين
أنا ما بغى زواج المسيار لا من بعيد ولا من قريب انا واحد من عمالنا
جايب أخته بتاشيرة عمره وسيرت عليه وشفتها واعجبتني ومزحت
عليه وقلت ما تزوجني أياها قال : أنت بس تأمر يابيه هو حنا انطول
وده يزوجني اياها وانا بوقتها ما أعطيت الموضوع بالي مار يوم قريت الجريده حسيت بالوحده والفراغ مثل ما أنت
شايف مغير مقابل التلفزيون واقرا بهالجرايد لكن ودي أعطي فريد
أخو فريده أجازه وأسافر معهم وهناك نكتب الكتاب على قولتهم
ونعلي الجواب >>> أشوف الوالد من الحين قلب اللهجه
وأتركها عند أهلها وكل ما صحت لي فرصه رحت لهم




وأسكار الهرفي







ضيعت أجمل فرصة على أبو هيثم
طايره طارت وفيها نور عيني .. ليتني طيارها واللا المساعد
يوم طارت وأرتفعت بالحنيني .. قلت بعدها يا هلي ماني بقاعد



تقبل تحياتي أخوك الزاد

اصطبى /جذيعه/بهم السنه/لآنجمك/كثحه الذرور/احلوص

/ اوسكار مفردات لم اجدها بموضوع سابق لك مشكور والله من سنين ماسمعتها سجل اعجابى فيك

صالح مرزوق السرحانى البلوي
اصطبى /جذيعه/بهم السنه/لآنجمك/كثحه الذرور/ أحلوص / اوسكار مفردات لم اجدها بموضوع سابق مشكور والله من سنين ماسمعتها سجل اعجابى فيك

رائع / وجميل / وممتع / ولطيف / ومفرح
هذا المرور منك أخي صالح مرزوق السرحاني
دمت دائما بخير وسعاده