إبداع بلا حدود مع الشاعر محمد الشهري
بسم الله الرحمن الرحيم
السلام عليكم و رحمه الله و بركاته
صباح/ مساء الخير
حبيت أقدم لكم قصيدتين للشاعر المبدع محمد الشهري
وإن شاء الله تحوز على رضاكم ..
أبد .. ما جيت أبارك ولكن جيـت باوصّيـك
على الله ناوي ٍ تدخل بهـا الليلـه .. مُعذبْتـي
ترى لولا الظروف اللي عطتْك وحدّت محاكيك
قسم بالله ما تدخـل عليهـا لـو علـى رْقبْتـي
ولكنّ النصيب اقوى ولا ادري ويش اسوّي فيك
نعم .. صارت معزّبتك .. ولا صارت معزّبْتي
كذا شاءت بنا الأقدار تحرمني لأجـل تعطيـك
كذا لازم عشان تفوز إنت .. أخسـر بتجربْتـي
تراها غاليه جـداً .. وتكفـى .. والله يخليـك
تـدللها .. تدلعهـا .. تنسّيـهـا مصاحبْـتـي
أنا من كثر ما اغليها أحس اني بديـت اغليـك
ولا تسـأل بأيّـة حـق ولا ّ وش مناسبْـتـي
لإنك لو بتسألني بتسمع شـيء مـا يرضيـك
لـذا ياخـوي لا تسـأل ولا تسمـع لأجوبْتـي
أبيك تحطها في داخل عيونـك وبيـن ايديـك
وهي دلوعه اعتـادت علـى كثـرة مداعبْتـي
فداعبها شوي شوي حتـى تشتهـي طاريـك
وشاغبها إليـن تقـول لـك: بطّـل مشاغبْتـي
واذا هي مالها خلقك..ولا تضحك ولا تسلّيـك
تحمّلها وإسألهـا: يـا عمـري ليـه عصّبْتـي
وبالك اسمع انّك يوم تضربها وهـي تشكيـك
ما يحتاج اورّي لـك بفـن الضـرب موهبْتـي
صحيح انك بتملكها ومعك العقد بالتمليـك
وانا عارف حـدود الله ومـن حقـك معاقبْتـي
ولكن قلّها المجنـون وصّانـي وهـو يعنيـك
يقـول انّـه بينتظـرك ولـو شيّـب وشيّبْتـي
وانا مجنونها اللي ما نساها وانت مـا يمديـك
تغطّي ذكرياتي في هواهـا.. وربْـع تجربْتـي
أحس اني تماديت بكلامي.. والغضب حاديـك
ولو انّك في مكاني مـا تفكّـر في محاسبْتي
كفاك اني تركت الليله اشغالي عشـان اجيـك
دخلت القاعه برجلي ولا ادري ويش عاقبْتـي
انا ما جيت اخرّب عرسك الليلـه ولا آذّيـك
أنا جيتك عشان اخاطبـك واسمـع مخاطبْتـي
توصّى..وانتبه..واحرص عليهـا والله يهنّيـك
ترى كل الكلام اللي طلَع مـن ضيقـيَ وكبْتـي
ولكن ما قدرت انّي أقوله وانـت مـا يخفيـك
أخـاف انّـي إذا قلتـه تقـوم وتقطـع رقبتي
القصيدة الثانية ايضاً لا تقل جمال عن سابقتها
ليقول فيها عن العيد ..
صدقيني العيد نفسـه مـا تغيـر مـن سنين
فرحة أطفال وتلاقي.. لمّة أحباب وقرايـب
والأغاني والكروت وقولـة (مْـن العايديـن)
والتمام الشمل يوم العيد .. وانسـام الهبايب
والتهانـي والهدايـا وحـب روس الوالدين
والمواصل للعمام .. وللخـوال .. وللنسايـب
كل حاجه مثل ماهي بس أنا حالـف يمين
إن لا غبتي باسجّل نفسي في هالعيـد غايـب
وارجعي بالذاكرة يابنـت وأنتي تعرفين
ليه أحس العيد عقبـك جيّتـه جيّـة مصايب
ليه لا طالعت (كرت العيد) اكفكـف دمعتين
من ذكرت أعيادنا وأيام كان الوضـع طايب
اذكر إني من (مصلى العيد) وانتـي تذكريـن
كنت أسابق خطوتينـي متّجـه يمّـك وذايـب
لأجل أكون الشخص الأول لأجل مني تسمعيـن
في صباح العيد .. جملة (كل عام إحنا حبايب)
لأجل نكتب خلف (كرت العيد) ذيـك الكلمتين
كنت اجيك بقلب طفل وطيش شاب وثقل شايب
كنت أنا أعايد وحالي حـال باقـي العاشقين
وما معاي إلا خفوقي وذي عيوني لك وهايب
وإنتي في أجمل ثيابك كاشخه والزيـن زين
تثبتين إنك عجيبة غيـر عـن كـل العجايـب
فرحة العيد .. بلقانا كانـت أصـلاً فرحتــين
مثل ضحكات الورود ومثل زخّات السحايـب
ما ليوم العيد طعم وما لهـا الذكـرى حنين
وكل منّا في مكان وكل واحـد لـه طلايب
الرجا في عيد الأضحى يمكن انـك ترجعيـن
ما أقول إلا عسى الله يجزي من كان السبايـب
وإن رجعتي وشفتيَ إني فـي عـداد الميّتيـن
ذا أنا بوصيك حاجة قبـل تنحـط النصايـب
طالبك في كل عيدٍ .. بعـد موتـي .. تكتبيـن
خلف كرت العيد جملة (كل عام إحنا حبايب)
يعني بالله شرايكم...؟
رد مع اقتباس
المفضلات