.. محاسبه للنفس ..
.
.
.
يا نفس أشوف العام .. يمضي .. ورا العام=وأنتي على دروب الخطايا تمادين
أرخاني التسويف .. وأيامي حسام=يا نفس .. وصدوف الليالي سكاكين ..
توبي هنا .. مليت من قول .. قدام=الموت .. وقته يمكن يكون هالحين
لا تغرك الدنيا وتغويك الأوهام=التوبه .. التوبه .. قبل ما تموتين
يا نفس ما ينفع بعَد .. لفّة الخام=إلا عمل صالح .. ودعوه .. واثر زين
وش الندم والحسره وعض الإبهام=والمال والجاه ودموع المحبين ..؟
اللي تميّز بين باني وهدام ..؟=أعمال ترفع فالخميس و فالاثنين
تزودي في زاد من حظهم .. قام=العابدين الخاشعين التقيين
هذا السفر يمضي مثل غُبش الأحلام=وجميع الإحياء في طريقه مقفّين
العمر .. مهما طال تفنيه الأيام=ما يدوم غير الله .. والخلق ماضين
وين الرسل والأنبياء ..؟ وين الأقوام ..؟=وين الملوك ..؟ وّين سلطانهم وين..؟
راحوا عُبَر للناس .. مثل أهل الأهرام=ولا أُسكنوا في قبر فوقه حصاتين
الكون هذا كله بوصفه العام=والعلم عند الله .. (برزخ ودارين )
الدار الأولى .. دار تكليف وإلزام=والعيش مهله .. والخيارات نجدين
أما هدى وتقوى على دين الإسلام=نعيم فالبرزخ وتتويج بعدين ..
ولاّ ظلال نهايته .. ما هي إعدام ..!=نارِ حطبها الفاسقين المظلين
فيها الطغاة ومن يواليهم .. أقزام=حيين لكن في عذاب .. ومهانين
جميع من تحت الثرى صاروا عظام=يبعثهم الله .. خالق ادم من الطين
أرواحنا يعيدها بنفس الأجسام=وننساق للمحشر من يسار ويمين
في يوم موعود .. وتفاصيله إجسام=فيه الرضيع يشيب والقاسي يلين
ويصيروا الأحباب من هوله أخصام=ويصيروا الاقراب ما هم قريبين
الملك لله وحده ... وكل الإحكام=وهو القوي وكل خلقه ضعيفين
المزهب أعمال ... بموازين وأرقام=ما فيه جاه ملوك ... وإمرة سلاطين
سبحان من .. ما غاب عنا ولا نام=واشهد علينا اليد والرجل والعين
استغفره وأتوب له سر وإعلام=واحذّر اللي زل عن منهج الدين
لا تشغله دنياه في حمر الإنعام=يتبع هوى النفس ويطيع الشياطين
أبيه يغنمها قبل رفع الأقلام=يتوب قبل الموت .. ( توبة نصوحين )
يربط على قلبه من ( الخشيه حزام )=ويلزم طريق الحق ويعيش ما بين ..
ذكر وصلاة مودع ونسك وصيام=في واجب وسنه ونهج وقوانين
وانا مدامي حي تجري بي أنسام=يا رب أغثني في هدايه وتمكين
ابعث لقلبي نور .. من نورك التام=واجعل لي القران منهج وتحصين
اجعل لي القدوة شفيعي والإمام=اشرف بني ادم ختام النبيين
أوزعني أخشاك ... ولطاعتك مقدام=واجعلني بأول صفوف المصلين
ارزقني إخلاص ونقاء قلب وقيام=في جوف ليلي لا مضى منه ثلثين
وأكرمني بحب الفقارى والأيتام=لا تجعل أتباعي من الناس غاوين
واغفر لي وّفقني بوصل الأرحام=وأدخلني وّالديني .. الجنه ... آمين
.
.
تحيه للجميع
و
عيد سعيد وعمل متقبل
.
رد مع اقتباس
المفضلات