.... كـُـــؤوس الطـِــــلا ....

وسهيل ( مايمطر) ولاحوله كسوف=لكنّ له قبله وله موقع وشان
( والنور) لو يحرج من الظلمة طيوف=مردِّه يقدِّي _ على الدرب _ الاعيان

عد كم ( مالم ترد) وشوف كم مرَّة ذكرتك=لم ترد / ولم ترد / ولم ترد/ ومانسيتك
يارفيقي ما أمنّ ليا تعذَّرت وعذرتك=بس كم ( مالم ترد) وكم اود انّي لقيتك
ليتني ممَّا شريت من النشاما (ماخسرتك)=وليتني ممَّا خسرت من النشاما (ماشريتك)

يالطيِّب اللي ماعليه وعلينا=غير السلام وياهلا مرحبابه
ماهو كذا نسمع إذا ماحكينا =وماهو كذا تحكي ب(لاينحكابه)
البارحة نضحك معك ( وش علينا) =الوضع طيّب> والغضب في نصابه
لكن يزلّ لسانك ويبتلينا= ماهو غلا .. هذا بَلى نبتلابه ..!

إن ماعرفت انشد هَلَ العرف عنَّا=وان ماجَهَلت اذكر نسبنا و وطنَّا
حنَّا البويَّات وأحَدنا البويَّا=صدر العلا المعمور أوَّل سكنَّا
الوِثر وسْيَيْد ورويعي وزوغان=والمدعم المعروف فينا ومنَّا

أيَهيــه يالحبر الذي ماهو حبر =وايهَيـــه يا هذا البياض الأسودا
أشخاص رقمية على (واحد صفر) =واطياف رمزيَّة تغمَّ المنتدى
عصري ذهب مدري ذهب مدري تبر= ولا ندا بعد الغياب الاَّ الندى

مشعل وش رايك بالكون
بدر يطل
وبدر يفل

ونجم يغيب
ورجم يصيب

وليلك يا مشعل مجنون







وش رايك في كوكب (نِبتن)
ذاك الأقصى الـ وَمض الخالي
داير في درب التبَّانه
حاير في حرب الأفلاك


كيف يجيب لظلّه شمس
وليل وبدر وصبغة دَمس


وعنصر هدروجين النار
وعنصر أوكسوجين المي

(ونبتن) خصبة
والطين اللازب والضي
وكائن حي .. !






قلّي وش رايك يامشعل
يا قـَبـَس الأقصى المقدام القادم من خلف الأجرام

قلّي وش رايك بالكون ؟

بدر يطل

وبدر يفل

ونجم يغيب

ورجم يصيب

وليلك يا مشعل مجنووون