بالمقبره .. او بين نفسي وبيني ..مصافحه اولى

من عادتي لاغاب عني عزيزين= ماسأل واقول : ( اللي يبيني يجيني )
ماقد سألت : لـ وين ؟ من وين ؟ أو وين ؟= حتى لنفسي مااذكر ان قلت : ويني ؟؟
تصدق اني مره امسيت بالصين ..!= واصبحت أحَسُب اني مع الناس صيني ..! ؟
وأحيان ازور المقبره يوم الاثنين= ويوم الثلووث اعزي ابوي فيني ..!
مدري غبا ؟ ولاّ صحاوة مجانييييين ؟=ولاّ شعور الوصل مايحتويني ! ؟
مافارقت عندي .. مِقـِبـْلين ... مِقـْـفيين ..= اهم حاجه : ريح تصفق جبيني ..!!
ويوم انت جيت : أصبح خلل بالموازين=غيّرت حتى شكل تركيب جيني ..!
رح بشّر امي .. صرت عارف انا فين= وآعـَرْف انا مين ؟ ومع الناس فيني !
وصرت أدري ان الصين حول الفلبين= شرق الخريطه / غرب قبضة يميني
وان غبت ! أعرف اسأل عليك العناوين= معقول ابنسى نور قلبي وعيني ؟؟
وآعـَرْف وين القاك ؟ وألقاك مع مين ؟= بالمقبره ... او .. بين نفسي وبيني ..!