حـمـيدان الـتركـي .......

ساره * تقول أتصبرو ياحميدان = وحنا نقول أصبر كما قول ساره
الصبر طيب مالقينا له أثمان = ولا بد تجني يابو تركي ثماره
مادام قلبك ممتلي كله إيمان = صبرك بتال الوقت ماهو خساره
يفرج لك اللي فارضاً خمس الأركان= منجي نبيه / وابو بكر .. بغاره
مابيننا قربه ولا عيال جيران = ايضا ولا حنا سكنا بحاره
لكننا في شرع رب الملا أخوان = أخوان في حلو الدهر والمراره
عز الله إني ياحميدان زعلان = وأوجس بقلبي يابو تركي حراره
ومالي محايل يابو تركي ولا شان = اليد قصيره والمصايب كباره
لكنني دايم معك قلب ولسان = لو إنني ماقدر لكم بالزياره
وبعد الولي ننخا سلايل كحيلان = مطوعين اللي براسه سطاره
حكام نجد مطوعة كل غلطان = اللي يعاديهم يدور دماره
تكفى يابو متعب نبي نظرة إنسان = يامزبن اللي قل معه اقتداره
وتكفى يابو خالد يابا الخير سلطان = سموك باسم الخير ضو المناره
أنتم سعد للشعب في طول الازمان = البدو واللي ساكنين الحضاره
ياللي لكم في قمة المجد عنوان = أنتم ذرا للشعب وأنتم استاره
يحفظكم الرحمن من كل عدوان = لمكه وطيبه والمواطن وداره
وصلاة ربي عد ماهل ودان = على نبي الخلق راع البشاره

.........................
* ساره .. كاتبه بجريدة الجزيره كتبت مقال بعنوان تصبرو ياحميدان ..
( وحنا نقول اصبر كما قول ساره )