هذه قصيدة نشرت بإحد المواقع / لـ الشاعر عبيد البديري

وهي تهجم وسب لـ منصور البلوي

اليكم القصيده

ورد الشاعر الكفو : محمد عوده القويعاني البلوي


يا محمد الفيصل سلايل كحيلان=يا بن الشيوخ اهل الوفاء والكرامه
حفيد مجد (ن) مايقدر بالاثمان=المجد مجدك وأنت قمة سنامه
ابوك وثق منسبك عند سلطان=تاج الملوك اللي رفيع(ن) مقامه
سيد وابن سيد على مر الازمان= سادات بالدنيا ليوم القيامه
المسأله ياسيدي جالها شان=قامت تناهشنا فروخ النعامه
شتان بين الامس واليوم شتان=يامير ياراع الوفاء والشهامه
لامن سكتنا زان وضع الردي زان=سفيه مايخشى كلام الملامه
خلفه حثال المجتمع حقدهم بان=اطيبهم اللي مايقدر كلامه
خسران لو انه من المال شبعان=المال مايرفع رجال الرخامه
كبرت اجنوبه يوم خير الوطن حان=هو مادرى انه صفر لولا عمامه
هذا ليامن الزمن شان ثم شان=تحت ظلالك يهتني في منامه
وانته لك التاريخ والمجد عنوان= وهلالنا يبقا زعيم الزعامه
واختامها يامير ياطير حوران=عزك يدوم وعز غيرك ندامه


رد
الشاعر : محمد عوده القويعاني البلوي

يا عبيد يا راع القوافي والألحان=بديت لك في علم واسمع تمامه
كلام واضح مادخل فيه بهتان=ولا سوّقه راعيه واخلف نظامه
بالمختصر ياعبيد وش فيك بلشان=والسالفه مابين قامه وقامه
محمد الفيصل غني عنك يافلان=مجموع مدحك مايزيده علامه
موثق الجدين في كل ميدان=له منصب وقيمه وجاه وفخامه
ومنصور شيخ ويعتبر ضمن الأعيان=يمناه ما تقصر وذخره حزامه
اللي عطاه الله بلا منّة انسان=واللي تشيله بالمواقف عظامه
ربعه بلي عز ومعزه وشجعان=وقت الرخا ولاّ نهار العسامه
شيوخ جاه وبالميادين فرسان=والعز لاحفاد الصحابه وسامه
واليوم حنا بحكم ذربين الايمان=والامر كله في يديهم زمامه
ال السعود وكل علمٍ فـ برهان=موحدين الصف بعد انقسامه
بين الاكارم ودك تصير شيطان=لا تود خير ولا تمنا سلامه
ياعبيد بعض الهرج للرجل نقصان=خزاه يبقى بوجه راعيه شامه
والاختلاف اللي حصل بين الاخوان=سلطان حلّه باعتدال وصرامه
السالفه هانت وكل امرها هان=وانت بمحلك في طعوس الثمامه
في غيبتك ما احد فقد شيخ فهمان=وفي جيتك ما احد عطاك اهتمامه
ياعبيد رايك مايغيّر بالاوزان=والعلم مسكه يالبديري ختامه
ان جيت ضمن الخيل ما تحسب حصان=ولافيه لك بمزاحم الروس هامه
غلطان في فزعتك هذي وخسران=وكلن يسجلها عليك انهزامه
ليه اشتريت وبعت والدين الاحسان=اتبع حلال الشرع واترك حرامه
خليتها خارج نطاقات الالوان=مدري خباثة قلب ولا غشامه
غلطان باللي قلت غلطان غلطان=لا تزعل المسلم و تجرح صيامه
وكان الطمع جابك ومضمونك لسان=عسا حصل لك ثوب ولاّ عمامه