رد الــوفــا ..

السلام عليكم ورحمة الله وبركاته
هذه القصيدة مشاركة مني في حفل تكريم الشاعر سعود بن كايد العصباني
للشاعر حمود بن سلمان السميري في محافظة حفر الباطن
بتاريخ 27/7/1429 هـ

عديت بالمرقاب و القلب به شوق=شوق (أ)بدوي لمرزميات المخايل
اشفى على حد الشفا خايل بروق=ومزناً يرفرف حط غيثه همايل
جاله مع الغربي على داره يسوق=واسقى مرابيعه وذيك الخمايل
وغنى طرب وافراح له راعي النوق=و من خال برقه شد يمه رحايل
واقفت مزونه ترتزم واوجه شروق=وهلت مطرها فوق بيضا نثايل
وصبوحها جاب الخبر شخص موثوق=قال المزون ارخت على ديار حايل
يا زين حايل وان طلع كل زملوق=وقامت غصون النبت فيها تمايل
يدله بها العاشق و لو كان محروق=سبت عناه منقضات الجدايل
وعلى الحفر هلت من الغيث شملوق=شرق و جنوب وغرب وايضا شمايل
ديرة بها صاحب لنا هرجته ذوق=ينقى الكلام الزين نقو الاصايل
يرقى السنود وهمته للعلا فوق=للمرجلة و علوم الأجواد طايل
لسعود بن كايد تهيضت طاروق=من خافقي بين الضلوع النحايل
ساس الكرم و الطيب مع حسن منطوق=وردّ الوفا بانت عليه الدلايل
سابق على العلم الوفي غير مسبوق=للعلم وكبار الصعيبات شايل
ساس المساوي ما تخلي لها حقوق=للضد ضد و للجمايل جمايل
ذباحة اللي هزعت كل معلوق=و حلو النبا متوارثينه سلايل
ما همهم لو شاطها السعر بالسوق=ترخص لضيف الليل والا القوايل
ويا الله يا رازق وانا العبد مرزوق=يا رب يا سامع ندا كل سايل
تحفظ بلدنا من بلى كل مطفوق=و تنصر حكومتنا على كل عايل
وختامها صلوا على خير مخلوق=اللي نهار الهول للشفع نايل

* فالح عايض السميري