مدري ليه البارحه كنتي حزينه
هو طرالك من زمان العمر طاري



ليه خان البحر فشراع السفينه
ليه ضاق الصدر من كثر الطواري



وش بلاك الليل دايم تسهرينه
بسهر الليله معك وأشب ناري



وكل سر عن عيوني تسترينه
تفضحه عينك ولو كانت تداري



سولفيلي واطلبي شلي تبينه
بسمعك للصبح ..لقدوم العصاري


اضحكي قلبي تعب لا تشغلينه
لا يخون الوقت ساعات انتظاري



عاشقك يشتاقلك وانتي بيدينه
كيف لو يبعد مسارك عن مساري



ينتفض جسمي غلا ساعة تجينه
تبرد اعظامي وانا فعز الظهاري



من قبل يومين والاحوال زينه
اجمل الضحكات عدت بيت جاري



ليه تطفين الغرام وتشعلينه
ليه ماهمك في هاللحظه دماري



ليه يبرى الجرح ساعه تلمسينه
ليه إلا غبتي يضيق اجدار داري



وش بلاي اليوم كل اخطاي شينه
يولد الحلم ويموت الحلم عاري



لعنبو حظ تخاطفني يدينه
لعنبو جرح تمادى بانكساري



هي متى تظهر منارات المدينه
هو متى يشرق على الدنيا نهاري