يابوي..لا تزعل

أحبابي أعضاء منتدى بلي
استاذنكم جميعاً با الخروج بقلب أبيض واقسم لكم با الله على ذلك
ومع الف سلامه

لبارحه للضيق حدبي معازيب=والقلب نار دلاال بن الشكاير
والنوم شافن به عيو ني عذاريب=عن مارده يابوي جفل زعاير
من وقتي اللي ماصفت به مشاريب=بيضه يجني مثل سوده ضراير
عن شف قلبي جن لياله مغاريب=با العكس جني با الرزايا خطاير
يامابه احلاماً بعوج السراديب=ان نمت مانامت بليلي ساهاير
اسهرتها يابوي لجل المطاليب=اللي توصينا عليها صغاير
واليوم شوفك فوق كتفه مصاويب=الله من وقتاً با الاحلام جاير
وقتاً خذلنا في بطون النواجيب=كم هقوتاً نصفق عليها الحساير
ياما رفعنا به هل الروس ونخيب=من عقب ماهم لثقيله ذخاير
وياما تتبعنا النسب من نواسيب=وياما لقينا باخر العرق باير
وياما وقفنا في دروب الحواسيب=على بقايا محتمين العشاير
وياما دخل قلبي من الشك والريب=ولاني بمليوماً اذا قلت حاير
لاصارسيني وين نسل الضواريب=ما شوف كله عن نسبهم مغاير
ان ذيلوجيمه بسود الغرابيب=ما الحقتهن با الصدق مني هزاير
والله لولا الناريضرب بها الطيب=لا قول ما ولدن وكانن عقاير
على الاصابع محتمين المواجيب=ماقول مابه من على السلم ساير
كم صيرمي(ن) زم نفسه عن العيب=حاش المراجل واعتلا كل ناير
لكن بلايه من وجيه(ن) عواقيب=وعلى رماد النار هدم الزباير
اللي بهذا الوقت لحيه واشانيب=هي فرقهم عن نا سعات الظفاير
لاشفتهم قلت الرجال الذواريب=فرسانها يوم اشهب الملح ثاير
وليا بخصناهم هياكل اخاشيب=مسنده في روس موتى ضماير
حياتهم تشبه حياة الدغاليب=مرهونت(ن) بقواع سود الحفاير
زانت لهم دنيا وجونا با ساليب=با سم الحضاره جالبين النكاير
يابوي لاتزعل على ديرة الذيب=ترضى عليها لو سكنت العماير
لو من مفاليها تجي لك مناويب=خسارتك يابوي ماهي خساير
يابوي حنا الحضر حنا الذواهيب=لاتخدعك فينا وجيهاً نضاير
يابوي ثارت با الصدور المزاهيب=وصرنا بحر من دون شط وجزاير
ياكثرما حناعليها مغاليب=راضينها في وجه ماهو سفاير
لاشك خلك با البداوه على الطيب=عن عولمة يا بوي عمي البصاير
يابوي لك منزال حضن المراقيب=أخير من قصراً به الحوش داير
ومنامك اللي فوق هاك الجراعيب=الذ من نوم الغرف والسراير
وصبحاً يفجه صوت نجر المحاديب=ماهو عوضبه صبح صمت الحضاير
يابوي والله منصفتنا المواريب=هذا وحنا با الوجيه البراير
ياما صبرنا والزعل شالح الجيب=وياما أنكسرنا والعزوم الجباير
لاشك يالي تعلم الجهر والغيب=يامرسلاً ليوب نذر البشاير
تجعل لنا في يوم حشرك مكاتيب=فيها نماري يوم كشف الستاير
يارب جعل أيماننا للمكاتيب=با الساعه اللي با الشمال الخساير