#كلمتين#

الصباح اقبل يجّر من الدلال أنواره= يبتسم والليل كنّه خيمةٍ مطويّه
والقلم يآخذ على صدر الورق مشواره = بينه وبين البيوت مداعب وحنيّه
والكلام اللي عليه من الغُموض ستاره = زارني في روحته ويزورني فـ الجيّه
صاحبي لاتشتكي, كلاً يشيل أوزاره = حاسدك صار الحسد في جبهته ماريّه
شفت هذا اللي يقّرض فيك مثل الفاره = لو"جنان الخٌلد" بيده مادخلها خيّه
مايحطّك في يمينه لاتجي بيساره = فيه أوادم عن علوم المرجله معفيّه
إن سمع بك خير, لايمكن يذيع أخباره = وإن سمع بك سٌوّ , تسمع نشرته يوميّه
يلقف الهرجه لسانٍ كنّه السنّاره= "كلمتين" يزيد فيهن من كلامه ميّه
وينقل العلم الردي لو يرتحل عن داره = أسرع من الطايره وأسرع من البرقيّه
والله إنه لو رمى دون الكلام حجاره = اليهود يسلّمون الضفّه الغربيّه
لا تراعي له وخذ من خبرة البحّاره = مايشدّون الشراع وريحهم عكسيّه
يقلع الله من على الغافل سحب منشاره = اللسان من العسل والريق ريق الحيّه
ومن يشب النار ويزيد الحطب في ناره = قِلّه يخاف الله بحق اللحوم النَيّه
قِلّه المقدار قبل نبيعه ومقداره = وقِلّه الأعمال تحبط مع فساد النِيّه
حّز في نفسٍ على كثر الغبن صبّاره = العدو مامون , والأصحاب عدوانيّه
العدو تدري منين تجيك منه الغاره = والصديق يدٌّك فيك البنيه التحتيّه
مثله ومثل الذي فوق القرون غباره = لاتجيه ولا يجيك ولا تماشي زيّه
نعرف الطيّب وعرف الطيبّين تجاره = ناس نصرفها وناسٍ مالها صرفيّه
الكريم اللي يجيك بنفسه وديناره = والبخيل اللي يبيك تسوق له جاهيّه
وفيه ذيبٍ ما يخاف من البوايق جاره = إن لقيت الخير وألاّ مالقيت السيّه
انتقيه من الرجال وفوز به واختاره = لاتفّرط في حبيبٍ عشرته حبيّه
الشجر من تربته, والماء, تزين أثماره = والوفا مايثمر إلاّ بالقلوب الحيّه
ولا يلوم الناس منهو باحهم بأسراره = يوم صدره ضاق عنها بانت المخفيّه
هاكها مني مثل ما شالت المحّاره = وعدها عني وهي من قلتها مرويّه

الشاعر عبدالله بن محمود المعيقلي البلوي