وين مايروح الاخضر انا وياه

بسم الله الرحمن الرحيم
السلام عليكم ورحمة الله وبركاته



لعب بي وليفي لعب كوره لعبها بيليه ..... وسجل بها فوز البرازيل بالدوره
وصفق له الجمهور يابيليه عاش بيليه .... وعشرين ألف متفرج خذوا للبطل صوره
أيه ياكاس العالم وأحداثه وش أده يصير فيها

على العموم نحن يا عائلة أبو هيثم بدأت عندنا حمى كاس العالم من هالحين
العلم سلامتكم هذا ياطيبين الفال كنت جالس أنا والجده الله يحفظها قدام التلفزيون نحتري المسلسل
الكرتوني توم وجيري فانا والجده من أشد المعجبين به وإذا بدعايه تلفزيونيه
عن كاس العالم
فقالت الجده : يازين هالجرس لولا كبره ألينه يصلح بحلق نعجتي زرعه
وانا أعتدل من مجضعي وابحر بهالجرس اللي جدتي تمنته لنعجتها ولنه صورة
كاس العالم
فقلت : ياجده هذا مهو جرس ودش أتعلقينه يدندن بحلق أنعجتش !!! هذا كاس مصنوع
من الذهب والعالم تدفع ملايين حتى أنها تفوز به
قالت : واهمي !! هالسربوط هذا كله ذهب !!!
قلت : أيه كله ذهب وذهب خالص بعد وأنا كان الله قسم محزم شناطي ورايح
لالمانيا
الجده : وانا خويتك
قلت : وين اتخاويني الله يهديش !! أنتي عارفه وين هي ألمانيا
الجده : وين يعني ؟ يا بحسما يا بهالساحل يا بالديسه أنا نيتي جدك الله يرحمه يقول
مره أشترى له بندق اماني من عربان هالديار
قلت : اقول يا طويلة العمر ألمانيا بينك وبينها دول وبحور لكن اللي ودي منتش
أتقنعين أبو هيثم يعطيني جوازي اللي من رجعتي من الاسكندريه العام وهو
مسكر عليه بصندوقه والمفتاح حاط له كرار بمخباته مايرميه
فدخل ابو هيثم علينا وقال : أيه مسكر عليه وأن ما هجعت وخبطت الارض
سكرت عليك معه
أنت هالحين لا مع الحفالين ولا مع الرقاصين
لا أنت لاعب ولا مشجع بس مع الخيل ياشقرا
قالت الجده : لا يابو هيثم ألينه لاعب من يوم أنه صغير وهو متعلق بهالكوره الغبرا
ولا كصم مواعينا غير كورته الرملا اللي كان ينقز بها بشق البيت
قلت : ياابوي المثل يقول لاكبر ولدك خاوه وانا ودي أتخاويني لكاس العالم
وتذكرتك علي
قال الوالد : اقول يا أرسطو الهروف أنت ما تخلي عنك الفلسفه وكان بك هبة
ريح تروح اتقري اخوانك اللي مغير أمك ادرسهم وليتهم يسلمون من تدريسها
لهم يوم جيت وهي ادرس اخوك قواعد وتقول الفعل الماضي قو .. طا .. را
قوطرا
وأخوك يقول : يايمه مااخذنا قوطرا
وهي بهالجموع على ظهره وتقول أنت هالحين أبخص مني !!
أنا الى هالحين وكلمة الابله ترن براسي يوم كنت أدرس بالعصريه
فقال الوالد لها : أقول تراكِ غثتينا بهالابله الفعل ذهب مهو قوطر
فقالت الجده : ودك الصحيح يا ابو هيثم الينها حتى انا عالتن شبدي
بابلتها كان ماحد اخذ سادسه غير هي
ماكني أنا درست معها عصريه بس أني فصلت بأخر سنه تقعدت لي مدرسة
الاملا كل ما جتنا وهي طلعتني أول وحده على السبوره وقالت لي اكتبي
ضرب زيد عمر
عاد انا يا وليدي قلت لها : هو مافيه وجه فليح يفك عمر من زيد
وزميلاتي ايطخن بالضحك والابله تزعل وتحط لي خمسه من خمس وثلاثين
عاد أنا زعلت وقلت : وانا خيت خيي اني ما اطب مدرستش حتى لو حطتيني عريفه
على الفصل
فقلت لها انا يا اوسكار: الله يهديش ياجده أنتي وش دخلتش بزيد وعمر
كان كتبتي اللي الابله قالته وبس كان هالحين معلقه شهادة سادسه
بغرفتش
فقال أبو هيثم : أقول أنت وجدتك مثل أم عليه وعليان أي شي يلهيكم
قم درس أخوانك لا سطك لك بكف أخليك من صيد أمس
فتدخلت الجده وقالت : وأن درسهم تسمح له يشوف الكوره اللي بالمانيا
ابو هيثم : الكوره يشوفها بالتلفزيون
فقلت : منين اشوفها وهي مشفره
فقال أبو هيثم : أنت عليك من منتخبك وجاي وش عليك من الباقي
فقلت : أنا ودي أشوف رونالدينو , ورنالدو , وهنري , وبيكهام
وهم يتفننون بالأهداف
قال أبو هيثم : خل عنك رونالدينو وجماعته مالك الا هالتلفزيون اللي قدامك
واللا ترى الأستراحات ملي الارض
فقالت الجده : أقول أصصصص فضختوا راسي بلجتكم
البس والفار بدت لا احد يهرج عندي

وسلامتكم مع تمنياتي لمنتخبنا بالتوفيق
ووين ما يروح الأخضر أنا وياه

مع تحيات أخوكم أوسكار الهرفي

[MOVE="left"]
اخي / اوسكار

قم درس أخوانك لا سطك لك بكف أخليك من صيد أمس


سلمت يمناك
[/MOVE]

اوسكار الهرفي
مبدع والله مبدع ويخلي لك ابو هيثم وجدتك
والله حقا انك مبدع الله يوفقك والي الامام ان شاءالله
انت همك انك تروح الي كاس العالم في المانيا
وانا تعرف ايش همي خاصة يوم حطيت (فتي ابوراكة)
والله ثم والله ماتركت احد الا سالته
























همي ياطويل العمر هو:
انت مين
تكفا ياوسكار
رد علية على ايميلي saudb1400@hotmail.com
وانت كيفك بس تكفا


مبدع والله مبدع
ولك مني خالص الاحترام والتقدير

(هالسربوط هذا كله ذهب)
وانا اقول وين شايف حاجة تشبه كاس العالم
اثريه صربوط المكيمن
اوسكار شكرا لك على هذه القصة الشيقة والطريفة
دمت بخير وتمنياتنا بالتوفيق للاخضر

اكتبي
ضرب زيد عمر
عاد انا يا وليدي قلت لها : هو مافيه وجه فليح يفك عمر من زيد
وزميلاتي ايطخن بالضحك والابله تزعل وتحط لي خمسه من خمس وثلاثين

ههههههههههههههههههههههههههههههه

اوسكااااااااااار
مرحبا بك بعد طول الغيبات

بصراحه اسعدتنا واضحكتنا بهالمواقف الطريفه والله يخلي جدتك صاحبه المواقف المضحكه...
مبدع يا اوسكار



في خبر سار لك:::
ترى ابشرك الغينا المزاد على ددسن ابو هيثم وقوله يقدر يجي يمرنا ويستلمها والحرامي راح نمسكه ونسلمه لمك عشان تعطيه من الجموع الطيبه.. :d

اوسكار
تسلم صراحه جدتك هذي رهيبه
المهم ان سافرت المانيا لاتخليها خذها معك


تسلم يمينك
حقيقه انت مبدع
ولديك اسلوب اكثر من رائع
والله يعطيك العافيه


عبدالله