عائلة ابو هيثم والدكتور مدحت

بسم الله الرحمن الرحيم


السلام عليكم ورحمة الله بركاته


ياأبوي أنت الونس حزت الضيق *** وأنت الذي يغني عن الناس ظله
الطيب يرفع من مقام المخاليق *** وانت بمقامك ترفع الطيب كله


يا كثر مارددت هذا البيت يوم طاح ابو هيثم مريض هاك النهار وخرعنا الله لا يعود الشر
أليني ياابو هيثم من غيرك ما اسوى شي الله يعديك السيه ويطول بعمرك ويخليك لضعيفينك
والسالفه يا طويلين العمر :
كنت جاي من الدوام يوم الربوع باخر الشهر اللي نقز طفشااااان ماأدني احد يقوللي وجهك زين
نفسي واصله طرف خشمي .. سهران ..وجيعان ومصراني لها طرطره تقل طرطرة جغاتب
بعز القايله ومن يوم دخلت الباب وأنا انادي : ياياااه أقلبي الغدا
ولا جدتي نطحتني أمفوسره عن ذرعانها يد بها سحله ويد بها مشخاله قالت : ابشر
بالغدا يهبا الجوع وانا جدتك اليوم طهيت لك أرزيزات بطسيل ابو أذان على قدي انا وياك
وسويت لك منيقع تلق اصابعك من وراه
اللحم الله يسمي على الفضل دوود بتشبودنا من كثر ما ناكله كل ليله معزومين على فرح والغدا لحم والعشا لحم
قلت : الا قولي راحت عليكن نومه وما صحيتن الا متوخرات ولا لقيتن أسرع من الرز
الا أقول وين الوالده وباقي أفراد الكتيبه ما أسمع لهم حس
فقالت الجده : يا وليدي أبوك من يوم أصبح وهو مهو بالحيل سويت له بالصبيله
سعوط حلتيته ومصت له امريره أسقيته اياه وامك تقل ما طاب لها علاجي وراحت وأعطته
حبوب نوفالجين وقهوته شاي عليه جعده وشوية حزا ومن عقب علاج امك مهو زين يقول
صابته رعده ياخوفي أنه صايبه هشل لو أني سالمه منها كان خروعت بطنه بالمخيط
ترى أتشطط البطن ما ينعلم به عن الهشل
ولا أوفت الجده هرجها غير وصريخ الوالده يلج البيت
وانا اقوم واطيح اساع خثعت بغت تنكصم رجلي ما ادري وش ألبق عليه قلت ان الوالد جرى على
عدوه جاري
ويوم جيت ولنه يتقلب مثل البريص ويجض من بطنه وأخطفه ونركب السياره
ودي أقرب مستشفى
ويوم بحرت ولن جدتي تقول يااااا وليدي ودنا للحرمه اللي بحارة ابو سبعه يقولون تكوي عن الهشل
وحده بوحده
قالت الوالده : أقول أرخي عنا جاي واتشد الوالد يمها ودنا لدكتور محمد عقل العام يوم ودينا خالك
يوم أوجعته بطنه بطه بابره وبارادة الله هونت بطنه عنه بسويعته
والجده تجرها زنفه : وااهمي واسماعي واقماري الغبر!! خاااله متى أنمرض؟ صارهو
مهو ضرس اللي اوجعه وأقلعوه عند دختور السنون
قالت الوالده : الحين نسيتي يوم انه جاب لنا صحن بقصديره يوم سوا العشا لضيوف اللي
جوه من الديره ودهم يحصون للشون أريييه أوجعته شبده الليله هذيتش
الجده : واكوبتي !! يار اللي سوا العشا رحيم الضيوف مهو أخوتش
الوالده : وايتمي رحيم الضيوف منهو !!! يار رحيم الضيوف اخوي
الجده : أااه هو ايات أخوانتش ودتش يا قلب الفلس انا غديت على اخوتش الكبير
هنا قلت لهن : اقول أنزلن وصلنا المستشفى لا تفضحنا بطلايبشن اللي ما لها لا
اول ولا أخر
ويوم وصلنا المستشفى كشف الدكتورمدحت على ابو هيثم قال لازم ترقيد ويظل تحت الملاحظه
عدة ايام وتقدروا تروحوا الحين ووقت الزياره تزوروه بس ترى ممنوع عنه أي اكل خارج
المستشفى
وبعد ما أطمئنينا على صحة ابو هيثم وأن حالته مستقره قلت روحنا يا طيبات الفاال
ومن يوم رجعنا للبيت انا غلمطت راسي ونمت وهن خابرهن لهن لجه أرجعن لسالفتهن
الاولى
ومن قبل يجي موعد الزياره النهار الثاني وهن لهن قرقعه اللي تعجن واللي تطحن قهوه
واللي تمرس مريس وخيني على بكرة ابيهم كلهم متقحوشين بكحيفلتهم ودهم زياره لابو هيثم
تقل ودنا نروح ملاهي الحكير
المهم أني أهترشت البزوره وقعدوا يتصايحون اللي يهلمع واللي يشهم وغدت لهم مناشقه
هنا جت الوالده قالت : يا اوسكاريا وليدي خل بس البنيات الصغيرات يروحن
يشوفن ابوهن تراهن عنده مثل انسمه
قلت : ياالله أمري لله
ويوم بحرت والجده جايبه الباقين تتوسط لهم تقول هذول وش ذنبهم حاشرهم لا يشوفون
ابوهم
قلت : وش رايكم اتجيبون أضعيفين جيرانا بعد معنا !! ترانا رايحين مستشفى محنا
طالعين قيله ياناس تعلموا النظام تعلموا الأتيكيت
قالت الجده : كتكت يا مكتكت أقول اروج عنا ودنا لاتفوتنا الزياره خل عنا الكتكته
المهم ركبنا سيارتنا ورحنا لزيارة ابوهيثم ويوم جينا عند السكيورتي يحاول يحشرنا ويرجع
اللي معنا من اكل ولا وش يحاول من يوم قال وقفوا وحنا نغدي فطاط مثل المسبحه
يوم ينقطع خيطها كل واحد لقى جهه
السكيورتي يطرد من ولا من تلف وهو يركض ورانا عوود قعد وهو يهز راسه ويرمقنا
بنظراته ما أدري هي استغراب هي تعجب هي دهشه هي وشي
المهم وصلنا ابو هيثم ولنه نايم غير المغذيات بيده ولا صحاه غير صعكرتنا عند راسه
ومن يوم شافوه اخواني تناقزوا عليه اللي يربز على رجليه واللي يربز على بطنه الساع
وحده من خياتي عنقش لها حبل المغذي بغت تقطعه
والوالده والجده من الثقافه علقن اعبيهن بعصا المغذي وقامن يدهرن كل وحده أتقهوي
من جهه وفنجان لابو هيثم وفنجان لي والتمر مغفوصه بالحميسه والسمن وشوي ولا الجده مطلعه من حثلها حميش حنه (خبز )
وتقول يا وليدي انا دسيته بحثلي ذليت يمنعونه جليلين الفود وقامت تقٌطع من الحنه
وتعطينا وحنا غطة النمر بتشفه انتغطط بشاهي وناكل
و ما درينا غير لبقة الدكتورمدحت علينا ويخبط ايديه على راسه وينظر لنا نظرة ما أدري هي تعجب
ماأدري هي استغراب ماادري هي وشي وقال : اللــــــــــه أيـه ده أيـه ده دي حاقه
موش معئوله ده زولم ده الراقل تعبان موش نائصه عيى وانتم عاملين هيصه وزمبليطه عند
راسه
ياالله اخرقوا برا ولا أنده لوكم السكيورتي
وحنا نقش اهديماتنا والمبسوط اللي يمسك سيب المستشفى ويروح
ويوم وصلنا البيت قالت الوالده : نزل جدتك وديور بنا على السوق
قلت : خير ألوش السوق ؟
قالت : المدارس أحضبت ودنا انتقضى لها عسى ماهو من عدم اللي يتقضى لنا
قالت الجده : واغرابيلي حتى أنا ودي أتقضى أنتم ناسين أني ادرس بالعصريه
قالت الوالده : ياعمه أنتي وش ناقصش دفاتر واقلام نجيب لتش معنا وارتاحي من هالمشوار
قالت الجده : أنا ما همني الدفاتر والاقلام أنا همي المريول أمس قابلت وحده من خوياتي
بالمدرسه معها مريول يهبل تقول ما اخذته من المحل اللي بالعليا وانا يوم شفته مت من
حره ألين المدرسه زينه لولا كتاب الانكليزي والعلوم
قلت تدرون كلكم أوديكم السوق وقشوا اللي ودكم اياه ونطب السوق ونغدي حوسه
هذا مقاسي وهذا مهو مقاسي وهذا زين وهذا مهو زين ولا طلعنا من السوق غير نص
الليل ويبقى لطلبات المدارس بقيه
وركبت سيارتي وانا اردد
لي جده ما تحب المدرسه ..... راسبه بالانكليزي والعلوم
همها مريولها اللي تلبسه ..... ومالها بباقي الكتب لزوم

[BLINK]هذا الموضوع أهداء خاص لأبو هيثم الغالي[/BLINK]

المتألق دوما .. اوسكار الهرفي

اسم على مسمى

اشتقنا لك و لمواضيعك الفريدة و خاصة اللهجة البدوية

أوسكار مبدع دائما فلما الانقطاع عزيزي الغالي
الزاد

ابدااااااع
متوااااصل
اخوي اوسكااااااار
الله يخليلك الجدهـ وابوهيثم

سويت له بالصبيله سعوط حلتيته ومصت له امريره أسقيته اياه وامك راحت وأعطته
حبوب نوفالجين وقهوته شاي عليه جعده وشوية حزا .

مسكين يا ابو هيثم
بعذرة قليل عليه نزله معويه من الادوية الشعبيه .

-------------------------

المبدع أوسكار

لهجه متقنه ما شاء الله عليك

الله يعطيك العافيه على السالفه

ويبعد عن ابو هيثم كل مكروه .

اوسكار تكفى لا تبخل على العجيز ودها مريول الحر تستاهل .:

p

كاتب القرون الوسطى

المبدع / اوسكار

ابدعت وتـــــفــــــنـــــــنت واتـــــــــقـــــــنــــــــــت وصغة احلى الكلام في رواية المواقف

لشريحه عريضه من الناس في قالب رائع ومتميز .....

اوسكار الهرفي كاتب متمكن بمعنى الكلمه لعله يروي العطشان من حرقة الظمأ..

فلننتظر ابداع جديد ...