هنا ما قيل في رثاء الراحل ( صياف الحربي )

جاني خبر زلزل كياني ونيت
ونيت ونة من فقد شخص غالي
قالو توفى شاعر العز والصيت
صياف ابن عواد راع الكمالي
وسرحبي الهاجوس لحضه وسجيت
وهلت عيوني دمعها ثم سالي
وبكيت انا والله ياناس وبكيت
كل الذي عندي وحولي بكالي
مرحوم يلي للمراجل لهن بيت
تجمعن وسطه من اول وتالي
ومرحوم يلي للملاعب اليا جيت
تصرفلها صرف الذهب ماتبالي
كم طايشاً بالراي رديت رديت
رديت طيشه بالمعاني الجزالي
عن ماقفك مايوم والله تخليت
في كل مارد لك حبالً طوالي
ويالله ياغفار ياحامي البيت
ترحم ابو مفلح كريم السبالي
ويالله يامعبود يامحيي الميـت
ظلـه بظلك ياعزيـز الجلالي

للشاعر / ساهر الشمال

لا عـاده الله علـمً اليـوم ذاعـوه
زلزل بـه الساحـة مـع الأطـراف
صاح الحجاز وجاوبت نجـد ياهـوه
من يسمع القلطة بعد غـاب صيـاف
عزولي الجمهـور والصـف عـزوه
وعزولي الشعار فـي كـل محـراف
ضلعً رسا بالشعر والنـاس سمعـوه
ماينطق الهزله ولا بيوتـه ضعـاف
شامخ بوجه الريـح مايـوم هـزوه
ورفع مقام الشعر عن بعض الأسفاف
وأن قامـوا الشعـار وإلا تـحـدوه
وقف لهم بالقاف ثـم أردفـه قـاف
وأن قـام للصفيـن والبيـت خَلـوه
جـاب الحقايـق ماتزلـف تـزلاف
يامـا علمنـا بيـن الأعـلام رزوه
وسط المحافل بين الأعـلام ينشـاف
طوع عسيـرات المعانـي وسمـوه
الشاعـر الأول علـى كـل ميقـاف
حتى قضى الله فيه حكمـه وشالـوه
على النعش محمول من فوق الأكتاف
ادعي من الله يـوم فالقبـر حطـوه
يغفـر لـه الـزلات والـرب رواف
والعلـم عنـي بأخـر الهـرج ردوه
الملعبه مـن بعـده اليـوم تنعـاف

للشاعر / عبدالله السليمي

يحسن عزانا يالربع مات صياف
اح الزعيم اللـي علينـا فقيـده
ستين عامن يحتمي كل ميقـاف
يبيـن فعلـه بالمواقـف وليـده
ستين عامن والعلم فوق مشراف
اسـم القبيلـه رافعـه ميكيـده
يحير خصمه منه في صنعة القاف
فتل وينقض كـل معنـن يجيـده
شجيع ماهو بالمواقـف خـواف
لبه على خصمه سوات الحديـده
الشعربعـده يرجـيـل ينـعـاف
اح البطل راع العلـوم المجيـده
سطر فعوله بالمهمـات تنشـاف
حل لكن الطيـب بعـده رصيـده
يالله يالي تدبل الحسنه اضعـاف
واحـدان يعلـم بنيـة عبـيـده
ياخلقن ذا الناس من كل الاصناف
الفرق عندك باختـلاف العقيـده
ياللي عبيدك تستعيلـك وتطـاف
امحييـن درالعضـام الهمـيـده
طالبك يالله تجعل ذنوبه اخفـاف
انـك تمـده بالثـواب وتزيـده
واتبعه درب الصحابه والاسلاف
وجعل الشهاده يوم يحشر تفيـده

ممدوح البدراني

يارب يامنزل سحايب قنوفه
.... علي البسيطه تحيي النبت وزهور
عفوك وغفرانك ورحمة ومروفه
.... علي قبر صياف وتعمّه بنور
اللي علينا موته أكبر حسوفه
....ذي قدرتك والعبد لو عاش مقبور
ينعاه شعر الملعبه مع صفوفه
.... ياكبر فرجة غيبته بعين جمهور
ينعاه مجد ٍ صافحه في كفوفه
.... شاعر كبير وله مكانه ومشهور
كن الشعر عينه عليه مخطوفه
.... الله من ليل ٍ سري الشعر مسرور
ولا احد ٍ يلومه كانه اعلن عزوفه
.... الفرق بيّن دون حقران وقصور
ياربنا المعبود رازق ضعوفه
.... العبد في حكمتك منهي ومامور
عسي علي قبره تخالف قنوفه
.... ومثواه للجنه وترزقه بالحور

للشاعر / صالح مصلح الحربي

امن العياضي وجهـت لـي رسالـه
سطرين بس امن الخبر طحت مفجوع

كنت اتقهـوى ثـم جدعـت البيالـه
موضوعها ذلحين عن غير موضوع

موضوعها ضيـق خفوقـي وهالـه
حتى عيوني من حزن سالت دمـوع

تبكي علـى راع الوفـا والجمالـه
اللي توفـى ثانـي ايـام الاسبـوع

مرحوم ياللي ما امهلت لـه ليالـه
عدة عوام من المرض طاح موجوع

تبكيه حرب وكل من هو بكـى لـه
يبكي بدمعٍ صدق ماهوب مصنـوع

اليـا تذكـر دون ربـعـه فعـالـه
دون القبيله كامله صوت مسمـوع

صياف ابو مفلـح كريمـه خصالـه
في هامة العليا له المجـد مطبـوع

شاعر ويحسـن فالمواقـف مقالـه
الشاعر اللي كل صعب لـه يطـوع

اعـزي انفسنـا واعـزي عيـالـه
وانا ادري ان الموت للعبد مشـروع

لكـن يارحمـان عنـدك عسـالـه
في جنتـك يـارب منـزال مرفـوع

وترسل علـى قبـره بنـو ٍ خيالـه
صادق وقبره كنـه بـورد مـزروع

ويالله يالمعبـود تحـسـن مـألـه
لاجاء نهارن فيه شافـع ومشفـوع

للشاعر / محمد عبد المحسن الجميلي

نبكيـك ياصيـاف والنـاس تبكيـك
وتبكيك ربعك حرب في كـل ديـره
ويبكونك أهل الشعر واللي سمع فيك
وكل الخليج ومن سكـن فالجزيـره
وتبيكيـك قيفانـك وقـوة معانيـك
وتبكيك قلطاتن بوسط المحافل خطيره
لكن هـذا المـوت مافيـه تشكيـك
أمرن مـن الله مـا يبـدل بغيـره
وما نقول غير الله يصبـر أهاليـك
ويجبر عزاهم والبقـاء فالعشيـره
وندعي لك الجنـة مـن الله واليـك
وينجيك ربي مـن لواهـب سعيـره

للشاعر / حمدي العوفي

بغيبة عميد الشعر وعمة وراعيـه
ثالث اسود(ن)راحوا0اليوم رحـال
وشلون يعززي من يبي من يعزيه
وشلون ينطق حرف من حدة الجال
مامات ابن عـواد حي(ن)بطاريـه
لومات0ذكره باقي(ن)عبر الاجيـال
راح الجسد والروح راحت لباريـه
يالله عسى الفردوس مسكن ومنزال
منزال درع(ن)دون ربعة بماضيـه
وبغيبتة دورن لنا حفـظ الامثـال
مرحوم ياملجم عظيـم المشاريـه
كم شارهن يبي السلامة ولا طـال
في غيبتة ماستنكر دمـوع تبكيـه
ولاستنكر دموع(ن)على خد رجـال
برجوى نجم يسطع وياصل حراويه
نبي البديـل وحزننـا مابعـد زال
ولو تمتلي الساحة بمنهـو يحاليـه
والله ماننساه فـي كـل الاحـوال
يالله يالمعبـود بالخيـر تجـزيـه
وتبدل السيـات حسنات(ن)اجـزال
يالله يارحمـن ظاعـف حسانيـه
واجبرعزانـا بالصناديـد الابطـال
وصلاة ربي عد رمل(ن) وذاريـه
على النبي الصادق اقوال وافعـال

الشاعر محمد الفالح

الله يعظم أجر بيـت القصيـده
ويحسن عزانا في بديع الفرايـد
يشكي ويبكي من موادع فقيـده
ماله شبيهٍ في جميـع البدايـد
إمن المثايل ما يخلص رصيـده
ماهن هزال وكلبوهـن جدايـد
الشعر عقبه بات ينزف وريـده
وأصبح عليه الصبح هالك وبايد
في ساحة المعنى قرينه نديـده
عن جيله إمن الغير فارق وزايد
طلاسمه مضمون جمله مفيـده
مدفونةٍ في لغز بالحيـل كايـد
في ظاهر المغزى تصنّف زهيده
دهاء ذيب وحسن تصريف قايد
لا جيت أبذكرها المزايا عديـده
تاريخ ما توفيه غـر القصايـد
أنا أشهد إنـه فاجعتنـا وليـده
عساه للجنـه بديـع الفرايـد

للشاعر / عبد الملك الرحيلي

ليا راحـت الاحـزان ردت بلاميعـاد
واذا جيت اجنبها تدربت على دربـي
لفانا نبأ وفـاة صيـاف بـن عـواد
اثرني من الاحزان مابعـدت ياقربـي
ولاعاد فيها شك جات العلـوم جـداد
بكينا وحنا مـن عبيـده وهوحربـي
جلست اكتم العبـرات لكنهـا تـزداد
لياقلت بحبسها بصدري بـدت تربـي
يقولون هذا الزاد واقـول مابـي زاد
تراني مابي زادي تراني مابي شربـي
تراني مابي روحه تراني مابي مقعـاد
تراني مابي بعدي تراني مابي قربـي
ولاعاد ابي سمره ولا عاد ابي مرقـاد
بعد مافقدت الشاعر الطيـب الذربـي
وفاته حدث هجري وفاته حدث ميـلاد
عسى الله يبيحه كل ما ذعذع الغربـي
وعسى الله يعوضه في بلاده بخير بلاد
بساتين جنات تمايـل وهـو طربـي
هذا ماحصل في موت صياف بن عواد
بكينا وحنا من عبيده وهـو حربـي

للشاعر / مناحي المسردي القحطاني

يولد سلف ويموت في عصره اسلاف
دنيا الفنـى ماربّحـت مـن شراهـا
مافيه زرع الا ورى الزرع قصّـاف
ولافيـه نفـس الا تـواري ثراهـا
مابه وليف الا فقد شـوف ميـلاف
راحـت بـه الدنيـا ودارت رحاهـا
والموت حق وياخذ اشكال واصنـاف
ولايفـقـد الا الطيبـيـن بوفـاهـا
قلته بعد جاني نبـا مـوت صيـاف
عبرالوكالـة يـوم بـثـت نبـاهـا
شيخٍ وقف في منبرالطيـب ميقـاف
رقـى لـراس النايفـه واعتلاهـا
نجم ٍ لمع ضوءه على كـل الاطـراف
غطى النجوم الساريـه فـي سماهـا
عن ما بصدري يعجز النظـم بالقـاف
لوبآتمـادهـا طـويــلٍ مـداهــا
يالله يامن بامـره النـون والكـاف
تجعـل جنـان الخلـد دار لفـاهـا
يالله ماغيـرك رحــوم ٍ ولـطـاف
وانك قبيلة حـرب تحسـن عزاهـا

للشاعر / عيسى العوفي

البارحـه تنشـر عمـوم القـنـوات
كلن يعزي حرب فـي فقـد صيـاف
تدعي له الرحمـه جميـع المسجّـات
من حرب ولأ من بعيديـن لاطيـاف
فقيدته ماهـي علـى حـرب بـالذات
فقيدتـه يشعـر بهـا كـل عـراف
أربع عقود ومنهجـه لـه بصمـات
في رفعت المعنى وتفجيـر الاهـداف
ينقض وفتله مـن جزيـل العبـارات
وبحارته يفهـى بهـا كـل مزهـاف
سيفٍ مرصـع مقبضـه بالجنيهـات
من وين مادرته عديـمٍ بالاوصـاف
لو مات يبقا له لقب حـي مـا مـات
((المعجزه ))من بين شعار الاسـلاف
ولا حازه الا عقـب عـدة بطـولات
فيهن مصادم رؤس ومداحـم أكتـاف
وعز الله انه جـاد زبـن المهمـات
وأنه تسمـا مدرسـة بـادع القـاف
ياما صعد فيهـا بـرؤس المنيفـات
وطرب أسموع الجمع من كل الاطراف
شاعر وجمهوره على قولـي أثبـات
شهد له اللي ماذكر عنـه الانصـاف
له شهرةٍ عبـر الـدول والمحيطـات
شهرت علم ماهي دعيـات ورجـاف
من طبعه العفـه وحسـن العلاقـات
ألا اليا خبـث الغـا والنبـاء حـاف
يقدر يحـط منافسـه فـي متاهـات
ويشوفهـا بالعيـن ويعـود أعيـاف

للشاعر / غازي الزغيبي