قصيدة ابراهيم محمد الحمري البلوي في الأمير فهد بن نايف

الملف الشخصي · 03-09-2010, 12:40 PM

السلام علكيم ورحمة الله وبركاتة

هذاي قصيدة الوالد مهداه الى صاحب السمو الملكي \ فهد بن نايف بن عبدالعزيز ال سعود اثناء تواجدهم في مقناص الجزائر لعام 2009

قال الذي سطر بيوتن جدادي = متحرصن لايصير في قافه ثلوم
من يمدح اهل المدح ماهو بغادي = الغادي اللي يمدح انذال ورخوم
امدح هل العوجا كرام الايادي= تاريخهم مشهود بالفعل ماسوم
امدح فهد واقول مدحن وكادي = تنشر له البيضا على راس مزموم
فهد ولد نايف كعام المعادي = لاعدوا الشيخان يكسب له نعوم
عانز على جدين يرقى سنادي = ابوه نايف علمه افخر سلوم
ياسيدي فوق السنام الشدادي = هذا مكانك ياذرى كل مضيوم
حلياك حر في طويل المبادي = في ماكرن له فوق والا ادرج الحوم
مايذبح من الصيد كود النوادي = صاد الحباري فرخ من غير تعلوم
من يوم طرح وفك عنه المهادي = منصاه نايف ياصله في زمن يوم
ماهو من اللي ينعرض للمزادي= ماحافه الدلال والا من يسوم
متفهق الجنحان بارز ثنادي = مع قصر ساقه جبر كنه به عثوم
بكر خلوي لاطار رمعة سوادي= له مدهلن مابين ضلعان ورجوم
القحف واسع والنواضر حدادي = أشوف من اللي تجذب البعد بالزوم
سبحان من ميز وصوفه واجادي = كنه على رغبة هل الصنف مرسوم
حلياك حرن غايتك والمرادي = مقداد ماضي له براهين وعلوم
خرش الحباري منه شافت زهادي= ماشاف منهن موتها صار محتوم
لاجا المعاند في ليالي الهدادي = كنه عديمن يعتزي في نحر قوم
والا عقيدن في نهار الطرادي =أرخص حياته خوف لايلحقه لوم
كابتن حرار يعد ويقود نادي = نادي فريقه كلهم كفو ونجوم
فهد على المقناص دايم ريادي= مع الهواية يمتلك صبر وعزوم
يقطع جراهيد السهل والبيادي = فوق الجيوب اللي تهوم الوطا هوم
معه نشامى تجتلد باجتهادي = على اختياره وانتقى كل شغموم
جولن عثابه بشره بالنفادي = عابي له من المندره كل صاروم
خنق الجهاز وقام كلن ينادي = صارت التنده راجمه ترسل سهوم
ماطار طاح وصار حسبة جمادي = واللي تكبر واسد القاع مايقوم
حاموا عليهن في زراج الحمادي = عشرة دقايق واصبح الوضع محسوم
لحظات اثاره وضعها غير عادي= تحفظ بذاكرة القنص دايم الدوم
هذي طراةالعمر قبل النفادي = نفنى وغير الله ماواحد يدوم
واقبل تحية صادقه من فؤادي= ومعطرة باطياب كادي ويشموم

الشاعر \ إبراهيم بن محمد الحمري البلوي