تـحـدي مـالفرق بين ( حريم زمان ) وبين ( حريم هالزمـن)....!

يعطيك العافيه فكره ذكيه ورائعه ولكن اعطني وقت لعل احد يسعفني عجز الحاره كلهن عند امي اليوم بنشب لهن واجيب كم وحده من الجيل الجديد وشعل النار بينهم واكتب النتائج والله يستر لا ينسفن الجبهه

بتنـشبين لهــم أيـه هيـن ...!

تشعلين النار بينهم أو فيهـم ..؟ ( كيدهن عـظيم ) ...!


عليك أختي شروق بتغطية الجبهه أذا خـوف من القصف

لكاسات بادريق أو ثلاجات السيف الي يقولون ماهي أصليه

لكن وقعها على الجبهه أصلي و( مجرب ) ...!


أتمنى لك فتنـه موفقه بينهن ...

ياخوفي تعودين لنا بخفي حنين ..!

ياجماعه زمان مثل مانسمع كان الزوج

يصـك ( يصقع ) ( يضرب ) زوجته تـدرون بأيش ..؟

مـو كف لااا ولا بعقال ياليت ولا بكاسه ياعيني

تـدرون بأيش ..؟


بـعــــامود البيت وبنص الجبهه وتمـر مرور الكرام ولا تكبر الموضوع


تجلس فبيتها ولا بعـد تسوي لها عشاء اذا رجع للبيت ....!



الحين مو محتاجه عـامود بيت ولا عقال ولا كـف ولا شي


الحين بس خـذ جوالها منها وشوف

الله لا يوريك يسمعون صياحها كل الحاره وتتصل على

القوات المسلحه ( اخوانها ) ولا بعـد تكلم وزارة

الدفاع ( امها ) ولا يدري الراس الكبيره ابوها

الا وهـي جايته للبيت طـامح والسبب ..؟

بس اخـذ جوالها ...!



ولكم التعليق ..!

حريم اول تصبر على ضرب زوجها .. ولا تشتكي لابوها .. لأن ابوها يجلدها جلد

حريم اليوم تقول :
انا راتبي مكفيني والف واحد يتمناني .. جمال ومااال .. اللهم صلي على النبي
طلقني والقى مليون واحد ازين منك ..
انا اصلاً دعت علي امي يوم اخذتك ...




:d :d :d

اغلب نساء اليوم وصلن لدرجه عاليه من العلم وفي الاخير كلهن خير وبركه ,,,, شكرا جزيلا على هذا الموضوع عبداللطيف

حريم الماضي

(راعية الغنم )

تصحو من الفجر وبعدها تقوم ترضع البهم وتحلب الغنم وترج للبيت وتسوى الفطور خبز صاج ولا جمريه مع اللبن والزبد وبعدها تجهز البدرة والسفرة ومكونات السفرة(سكر وشاي ورز وملح وبرادي صغير وقدر صغير)
وتتح للغنم وتسرح ومعها ألشبانه الى الظهر وبعدها تقيل الغنم بالطلح او بالطيران وتشب نارها وتركب البرادي والقدر وتسوى غداها والوغيره
وتقيل الى العصر تتح للغنم وتعشيها الى قبل
المغرب تروح للمراح وتطلق البهم على الغنم وترضع وتحلب وترجع لبيتها.

( الى جالسه بالبيت )

الى بالبيت عليها شغل البيت تصحى الصباح تسوى الفطور وتشيل الفرش وتمد سدوها وتنطاه وتمخض اللبن بالصميل.
وتستخرج الزبده وتميعها وتضع السمن بالمدهنه وتخلص اشغال البيت من تنظيف وغيره وترد بالقرب وتجيب الماء .
وتستعد لعمل الغداء وتسوى غداها وتغديى عويلتها وبعدها تشوف اذا فيه غسيل تغسل او تطلق البهم الى عندهم او تروح للمحطاب تحطب الى العصير وبعدها تساعدهم بالحليب وتجهز العشاء وتعشى عويلتها وتكون مجهزه لهم النومسيه ينامون بها وبعدها ينامون وهم مستعدين لليوم التالي

حريم اليوم

( الموظفه )

تصحى قبل الدوام بساعتين وهاتك شغل من مكياج واستشوار وماتسمع غير صوت الاستشوار كانه ددسن
وتقول للشغاله انتبهى للبزوره واذا بابا راح قفلى الباب وتاخذ معها القهوه وصينيه حلا للدوام واذا وصلت سواليف عن الامس القريب وقهوه وفطور وسواليف لين مايخلص الدوام وترجع للبيت وتحصل الشغاله مجهزه الغداء وتدق على زوجها وينك مطول ابى اتغدا وانام ويقول لها تغدي انا راح اتئخر ودق الغداء هى وعيالها ونومه الى العصر او المغرب واذا صحت لفت على الجوال او اقرب مسيار للجيران او اقرب سوق الى اخر الليل وتنام وهى تفكره بكره كيف تكون التسريحه والاستشوار ينتظر ههههههههههه .

( ربه المنزل )

عاد هذى اشوى منها فايده
تصحى من الفجر وتسوى الفطور والشى للطلاب وتصحيها ويافلان قم ويافلانه قومي وتفطرهم وتمشط بنياتها وتلبسهم وتعطيهم الفسحه وبعدها ترتب البيت وتاخذ لها نومه للضحى واذا عندها غسيل تخلصه ولا فطور عند جارتها وترجع البيت وتجهز الغداء وعند وصول اولادها تبدل ملابسهم وتعلقها وتسئلهم ايش اخذو وتغديهم وتاخذ لها نومه للعصر وتصحى واكيد مواعده جارتها بتسير الى قبل المغرب وترجع وتجلس مع ابو عيالها وعيالها وتسوى لهم العشاء وتعشيهم وتنومهم وتصبحون على خير

.

و الله حريم قبل .,. تحس فيهن روح الدعاابه .,. وحريم الحين ع الخفيف.,. بس أناا أفضل حريم زماان .,. ويااازين أسااميهن .,.