ديــوان / مـارد الشـعـر ...( الحميدي الثقـفي ) .

.



موجـــة حمام

.

رفرفت في بالي اوراق بيضا مهملـة

__________ واشتهى صمت ابيض الجوع تفاح الكلام

مثل طفل ٍ كان يبنـي ويهـدم منزلـه

__________ في هديل البحر واصطادته موجة حمام

جيت لاسهم ٍ تناسـى ولاجـرح ٍ دلـه

__________ عن هوى اللي ينزعون الجروح من السهام

جيت للدنيا قمر وجه صوتـي حنظلـه

__________ تحت جلدي ذاكرة خبت من رمل .. وعظام

لي سما عالي وحفنة سديم و.. وسنبله

__________ سبحت فيها وغنت عصافيـر الغمـام

كن من روّع ضبى خبت دمي واجفلـه

__________ وارتبك في حانة الصيف طاروق الصرام

كلمـا قربـت للريـح نـار ٍ مشعلـه

__________ فوق صدري زادني جمرها برد وسلام

كيف خيلت آخر الوقت قـاع ٍ ممحلـه

__________ كيف خيلت آخر القـاع وقـت ٍ للهدام

وش هو آخر دربنا .. آخر الدرب اوله

__________ لاهمزنا مهرة الوقت وانـزاح اللثـام

كل درب ٍ تعرفه حـاول انـك تجهلـه

__________ الدروب لصمت وجهي .. مجاهيل وظلام

قميص الليل


دخيل ركض الوجـع والآه والضمـه

_________ ومتابع الركض .. لاتكّلف على شاني

خلاص مني ومنك الحب في الذمـه

_________ تضاعفت من جروحك قـوة ايمانـي

محسوبك ان جيت وان ماجيت ماهمه

_________ وش ياخذ الدمع من تغميضة اجفاني

انام وادخل قميص الليل مـع كمـه

_________ واخرج صلاة الفجر مع كمه الثانـي

اتنفس الفجـر الاول عاقـد الهمـه

_________ واركض مع الناس .. والعن خيّر احزاني

كرامة النفس عندي فوق في القمـه

_________ وتثور من دونها .. ناري ، ودخانـي

ذبحت خيل الهوى .. واسقيتها دمـه

_________ خليتها غصب تحمل جثة ( الجانـي )

ياحالمه في دروب العشـق مهتمـه

_________ عمري مهو لك رصيف احلام واشجاني

عمري قصيده ( ردية حال ) منسمه

_________ مافيني اوراق يامحبوبـة اغصانـي

أسئلة للبياض



يومك ابيض

قلبك ابيض

( دا نهارك زي زهر الفل أبيض )

صفحتك بيضا ..

وهمْ هذا البياض الواضح الفاتح شهيتنا ..

ونغرق في الكلام ..

وفي الكتابه !

ياترى فعلاً ..

تكلمنا .. كتبنا .. في البياض ؟!

ياترى ..

هذا الورق أبيض كما يظهر لنا .؟!

ياترى ..

هذا القلم أول قلم يحرث بكارة تربته ..؟!

ياترى . محد ٍ كتبني ؟!

قبل هذا البياض ..؟!

والكلام اللي نثرته

باترى محد ٍ سبقني .؟!

وحدي اللي في بكارة تربة الصوت ابتذرته ..؟!

ياترى ..

محد ٍ نطقني ..؟!

أعتقد مهما توهمت الكلام ابيض ..

وصوتي والورق أبيض

فالابيض صمتكم وانصاتكم ..

وانتم الأكثر بياض ..!!

شجرة شجرة



وحدها تجلس على كرسيّ عرش الليل ..

هذا الاسود الفواح لمَّن ينكسر غصن النهار

وتنفطر من مكسره !!

وحدها تخرج ونبع انفاسها ينساب من

فستانها الكحلي..

ومن شال البنفسج ..

كان الاسود شف عن ليلك ..

وشف الليلكي عن ساقها الكحلي ..

وشف الكحلي المعتم عن الازرق ..

والازرق شف عن هذا السديم !!

وشف عن .. ..

عن ..

وجهشت في كرنفال اللون زهرة !!

إسمها ..!!

وتسابقت داخل فمي الاسما .. تباهي في

في سما وجه ( المليكه ) ..!

إسمها بلقيس ..؟!

لا..

زنوبيا ..؟!

لا ..

كليوبترا ..؟!

لا

ملكة الليل ..؟!

هذا ماتقول الناس ..

لكني اسميها :

( حزن زهر البنفسج ..

ضحكة النرجس ..

خجل ورده ..

غرور الياسمين

الفل متواضع .. أسميها ..

واسميها دفا الريحان ..

والشيح النفور ..

وطيبة النعناع ..

أسميها حكاية ( سرْ ) وافشاها النسيم !!

.

رفيف
.




أكتب رفيف وتطيح اربع نجوم وسنا ..

_________ من فوقها نجمتين وتحتها نجمتين .

كتبتها ف ( اول الصفحه ) تساقط جنا ..

_________ كتبتها ف ( آخر الصفحه ) نبت ياسمين .

كتبت فوق السطر مال السطر وانثنى ..

_________ يميل يم اليسار وينحني لليمين

كتبت ( تحت السطر ) وارخيت عيني وانا :

_________ أكتب وتسأل رفيف الشعر هذا لمين .؟!!

.


ماجـــده

تبكي وتضحك على المسرح كما طفله ..!

كما ..؟!

كما ليش هي طفله كما هيه .!!

كما بعد ليش ..؟! عصفور ٍ ترفرف له ..

في بال الاغصان حالة صمت محكيه !!

من صوتها يرجع الغايب على غفله ..

وتطل قمرا ليالي صيف شرقيه .!!

-----------

صيحة


صحت في ( سمع الفراغ )

بالـ( فم المليان ) ..

صيحه ..!!

ياإلهي ..!!

كل ذا الأخطا .. صحيحه ..؟!!



-----------

حــلم

أرى في مايرى النايم ..

سفينة نوح ..!!

وساطور السما ريح ٍ تشق ال ( فوق ) ..

تنهب زرقة المالح ..

وتحت تخيط اساميها الذوات..

الروح ..+

تتكور جسد عايم ..!!

______

بــوح

ياموطني ..

دام الحياه أخذ وعطا ..

خذ واعطني ..!!

---------

جــــواب

انا الآتي

حياتي ..

في ال ( بقيه من حياتي ) !!

________

حــيــرة

مدري أي كتاب ب ( اقرا ) !

مدري الليله !!

انا عن أي شي ب ( اكتب ) ؟!

عن زرافات ( الحريم ) الشاحبات

عن ( ! ) ..

عن العصيان .. أبكتب ؟!

آه .. ي ( أسراب الأفاعي ) !

واليمامات الحزينه !

من يقول ( العقل زينه