ديــوان / مـارد الشـعـر ...( الحميدي الثقـفي ) .

هل سمعتم عن

غبااااااااااااار الشمس

لو صرخت. النار لاتحطب ضلوعـك
__________ زادهـا وزنادهـا مـنـي وفـيِّـه
وان صرخت.. النور لاتوقد شموعك

_________ في عيوني من غبار الشمـس فيَّـه

وان صرخت.. الموت لاتنزف دموعك

_________ مانـزف طاهـر كمـا دم الضحيـه

ليه تبني فوق رعش احلام جوعـك

_________ عرش عـراف المسافـات القصيـه

وانت دايم سلمـك يرقـى طلوعـك

_________ ماستـوى طينـك لتوطينـك هويـه

كل منفـي داخلـك ملفـي ربوعـك

__________ وانقطاعاتـك لطاعاتـك عصـيـه

اعص .. ولاّطيع عصيانك بطوعـك

__________ لاتطفـي جمـرة آلمـا فـي يديـه

هاك نار القلب لاتحطـب ضلوعـك

_________ تحطب ضلوعك ونار القلب حيه ..!!

زيف الصحاري


ياصاحبي وقف لزيف الصحاري

_________ وبشر هجير الشمس عن موعد السيل

حاول تغير في ملامـح نهـاري

____________ واعط القمر مفتاح بوابة الليـل

مدري لشنهو موعدي وانتظاري

____________ مادامت أيامي قليلـة محاصيـل

في داخلي نزعة خفوق انتحاري

_____________ حلم تكسر في ثنايـا التفاصيـل

واثر انكسار الحلم يعني انكساري

___________ بغيت اكمل وانكسر فيني الحيـل

مالك بن الريب


يا مالك أبن الريب .. يا ريـب مالـك

____________ لا تعترف لاحـدٍ .. ولا يعتـرف لـك

صمتك ضجيج .. وضجتك صمت حالك

__________ صاح السكون أبمن تكون وهتف لـك

من بعت شمسك واشتريت بضلالـك

___________في صفحة الماء نجمةٍ ترتجـف لـك

هذا أنت .! في قاع المدينـة لحالـك

_____________ مالك بها ممشى ولا ينو قف .. لـك

ما دو زنت وقـع الخطـاوي نعالـك

___________ ولا مدى هذا الغموض أنكشـف لـك

والظبية اللـي فـي مفالـي خيالـك

_____________ دارت وحارت دمعتـك تنـذرف لـك

حتى الوجع جمر وهجع فـي رمالـك

_____________ وأنبـت ورودٌ ذابلـة تنقطـف لــك

غيمة

جتني مع الريح غيمه وارحلت غيمه= وماكل غيمه حملها الريح تغرقنـي
اموت عطشان ضامي والمطر ديمه= وارحل وانا ماخضعت لغير خالقنـي
استثني امي وابوي اخضع لهم شيمه =على رضاهم جناح الـذل يسرقنـي
يستاهلون العمر ويهـون تقديمـه =امشي لهم بالقدم والروح تسبقنـي
اما على غيرهم ماللحـزن قيمـه= وان كنت كذاب سألوهـا تصدقنـي
تملا عروقي حزن والكون تجهيمـه= تلقاني اطلب دفـا والنـار تحرقنـي
بعيونها يعتقـل وجهـي تقاسيمـه= وانـا لحريتـي ذكـرى تشوقنـي
ماني بمن تعتقلني في السما غيمـه= ولاكل غيمه حملها الريح تغرقنـي

فاقد الشي يعطيه

من قال مالك شي من فاقد الشي= ماهو صحيح وفاقد الشي يعطيه
مثل الشجر يعطي لنا بارد الفـي= يعطي الظلال ولاهب القيظ يكويه
مثل القمر يعطي لنا برزخ الضي= يعطي الضيا ومايندرى وش يغطيه
مثل العذاري تسقي النازح المي= تسقي البعيد ونخلهـا ماتسقيـه
مثل الطبيب اللي يداوي عن العي= لكنّ ماهولاقـي احـدٍ يداويـه
عطيتك التحنان من خافقٍ حـي= يعني عطيتك شي انا منحرم فيه
أرويتك ابعضي وانا فاقد الـري= مخفي ظماي وقلبي الحزن طاويه
لي في عيونك لاح مستقبلٍ جـي= حلمٍ بعيد ٍ .. ساهر الليل يرجيه

فاقد الشي يعطيه

من قال مالك شي من فاقد الشي= ماهو صحيح وفاقد الشي يعطيه
مثل الشجر يعطي لنا بارد الفـي= يعطي الظلال ولاهب القيظ يكويه
مثل القمر يعطي لنا برزخ الضي= يعطي الضيا ومايندرى وش يغطيه
مثل العذاري تسقي النازح المي= تسقي البعيد ونخلهـا ماتسقيـه
مثل الطبيب اللي يداوي عن العي= لكنّ ماهولاقـي احـدٍ يداويـه
عطيتك التحنان من خافقٍ حـي= يعني عطيتك شي انا منحرم فيه
أرويتك ابعضي وانا فاقد الـري= مخفي ظماي وقلبي الحزن طاويه
لي في عيونك لاح مستقبلٍ جـي= حلمٍ بعيد ٍ .. ساهر الليل يرجيه