ديـوان ( هـامـة نـجـد ) أحمد الـنـاصـر الأحـمـد .

(1 )

ســـدرة الـقـلب

الجمرصمتي واللهب بعض بوحي=والشاعرالمسكون بالوعي مصباح
ياسدرة في داخل القلـب فوحـي=هدي جدارالصمت يكفيك مـاراح
لوطال دربـي مايقصّرطموحـي=الله خلق في هقوتي عـدّة ارواح
احمل سلاحي مابعد بعت روحي=في هالزمن مافيه عاقل بلاسـلاح
اكبرعذاريبي بـراءة وضوحـي=واصعب عيوبي إني إنسان لمّـاح
لاجيت افتش في ثنايا جروحـي=كني احس بشي مثل الأمل طـاح
الله يازيف الزمـان الشحوحـي=اللي مزج لون الحقايق بالأشبـاح
باقولها في صدق والناس توحـي=معقول به شاعربهالوقت مرتاح؟!!

.


(2 )

عــابــر

عابر وخطواتي مواقـع للأزهـار=عابـر خيالاتـي مواسـم سحابـة
عابر وابهدي للزمن كل الأشعـار=نزف القلم هـم الـورق والكتابـة
عابر وابنسف في شراييني اعصار=جربت انا الغربة وشفت الغرابـة
عابـر بلاتفكير..مليـت الأفكـار=ومليت من طـول الشقـا والكآبـه
عابر بدون اسرار..هوباقي اسرار؟=حتى الألم صارت دروبه تشابـه!
عابر وزادي بالسفر حب الأسفـار=عابر طريقي بين صحـرا وغابـة
عابر وابنهي مرحلة نضجي الحار=عابر وابلغي مـن عذابـي عذابـه
في تربة الغربة نبت عندي اصرار=وعما يقول الناس مااملـك اجابـة
عابر واذا قررت مااحب الأعـذار=ويكفين وصف البعض بإنسان نابه

.

.


.