رسالة رثاء بالمرحوم الشيخ محمد بن عوده الرقيقيص شيخ الرقاقصه رحمه الله موجهه الى ابنه

جاني خبر من فجعته يصدع الراس= قالوا توفى الشيخ عل البقالك
حسيت كل الكون مشحون بالياس= ماني مصدق قلت ياشين فالك
ساعة تيقنته وانا البال منحـاس= واقول انا ياعم ليتي بدالك
محمد بن عوده لك الطيب مقباس= الطيب بذراعك ملكته وجالك
سج القدر يمك بخطواته وداس= ليته خطى الغيرك وعف وصفالك
عزيت بك نفسي قبل يدرو الناس= ياعز منهو محتمي في ضلالك
وعزيت روحي فيك ياطيب الساس =عزيت عمري قبل اعزي عيالك
يبكيك نجر يصدح بهجعة الناس= ويبكيك طيب الهيل وتبكي دلالك
ويبكيك بيت ماافترق عنه محماس= دايم بريح البن يفخر بحالك
بيت بنيته للكرم صار نبراس =عاش اليتامى فيه من حر مالك
ياما لفوه اجواد يبغون الاوناس= وياماجلس به من شيوخ قبالك
ياما لفوهاضعاف يشكون الافلاس= من ضاق به ملفاه جاك ولجالك
تقابل صغير السن في طيب الانفاس= لكل البشر ياطيب صوتك وفالك
في نظرتك صحيت من صابه اعماس= كن الحضور جموع وانته الحالك
يالله ياالمعبوديازايل الباس= ياواحد يامنفرد في كمالك
ترحم فقيد وسط قبره بالادماس= ياغافر لعبدك اليامن شكالك
وبرحمتكتغفرذنوبه والادناس= وتوسع بقبره ياكريم بوصالك
ياعيد منهومات قرم وقرناس =خلف وراه الرجال وحنا رجالك
وانتم عوضنا فيه والطيب له ساس= تخطون خطوه في جميع المسالك
من عرق طيب وادري العرق دساس= الله يكافيكم شرور المهالك
ويجبرعزاكم فيه ياعل لاباس= والموت مهما عنه صديت طالك
يحميك الله من لباليب الانجاس= وعسى الحسود يموت بالغبن هالك
وياعزوتي ياعل مايعيش بلاس= وانتم لنا عزوه ومكن حبالك
من هاجسي قلت الحقيقةبالاحساس= وماني موصي والوصيه لمالك
بعض العرب لومات مايشيب له راس= لوتفقده ماعد شي غدالك
وبعض العرب موته كما هدمت الساس= تبكيه كل مامر طيفه ببالك
ولوتذكره وقت التهاني والاعراس= دايم خياله مايفارق خيالك
ياالله عسى مثواه جنات ووناس= داني ثمرها ياعظيم بجلالك
وصلاة ربي عد ماهب نسناس =وعد الزهر واعداد ذرة رمالك
على نبي مامشى درب الادناس= محمد شفيع الناس وقت المهالك