صارت الخوة مصالح والصداقه مصلحه

حظي المنكوب واهموم الليالي والدهر = والظروف اللي ليامن جات جتك مطفحه
والزمان اللي بطيء يمر في لمحة بصر = يجبرك لامن بنيت الحلم ترجع تمسحه
حدني في جال ناس كلها كذب وغدر = تضحك السن وشبابيك القلوب مصفحه
والله لوّ انك تجيهم مثل همّال المطر = ما نفع فيهم جميلك قابلوك بنحنحه
من كبير ليا صغير(ن) ما نفع معهم عذر = الحسد فيهم طبيعه والوجيه مشفّحه
لا لقوبك عيب واحد قالوا الحق انتصر = ينشرونه في ثواني يا حمام واجنحه
اختفى حتى الصديق بعز جرحك مايمر = صارت الخوه مصالح والصداقه مصلحه
آه من جور الليالي آه يا ظلم البشر = آه من طعنة صديق بالضماير جارحه
ودي اصبر بس ما اقدر مابقى فيني صبر = الحقايق بانت وشين النوايا واضحه
وينه اللي لا لفيته ضمني فوق الصدر = وقال ذا مفتاح قلبي يا حبيبي وافتحه
ودي ابكي فوق صدره واتبعثر وانتثر = واشتكي له من همومي واحضنه واصارحه
في عيونه موج عطف وفي دفا انفاسه عطر = همسته بلسم يداوي كل طعنه مبرحه
والله اني لا ذكرته قلت يا حكم القدر = ربي يسّهل طريقه وبخطاه يسامحه

/
اعزائي اعضاء وزوار منتدى بلي الكرام لهذه القصيدة مناسبة خاصة ومحتواها يعبر عن مناسبتها اتمنى ان تحوز على اعجابكم وتقبلوا خالص شكري وتقديري
اخوكم ابراهيم عايد الوابصي