*على مبدا الرجال اللي تسمى باللزوم رجال /

هذه القصيده إهداء الى الشاعر الكبير / حمود بن سلمان بن مخيلي
السميري ( ابو رايد )

على مبدا الرجال اللي تسمى باللزوم رجال= ســلام الله ســلامٍ يـبتدى قــصه وينهــيها
سلامٍ من ضمير الشاعر اللي له سنه ماقال = ولا بيت وهـــجوسه عـــافت الدنيا وما فيها
سلامٍ يوم أسـوقه ريح هـيل وكنه الفـنجال =لينّه سيق روس أهل الضرم والكيف يصـحيها
اســـوقه للكــريم اللي فعـوله ماعليها جـدال =كــريمٍ مـــايحــســبها ولا يحــسّــب تواليــها
لبو رايد اســوقه وافتخر دام الـرجال أفـعال =صــدق من قالـها والطـيبه من حــظ راعــيها
تقهو يابو رايد جـاك شعري والمشاعر فال=ويتلاها الـعــقـال وتـسـلم ونسـلم ونوفــيـــها
ياشيخٍ لك بمـنزال الكـرم والمرجـله مـنزال =عـلى السـاس الـجـويد مـن أول الدنيا لتالـيـها
أبوك إبن مـخيلي شيخته ماهي بجـمع المال =تشـيــخ بالفعـول اللي لنا الشــياب ترويـهــا
وخالك من جهل بفعول خالك ياعريب الخال =عـبيد ابو خــشــيم ويكـفي الفـريس أســامـيها
حــقايق والحــقايق ثابته تبـقى مــع الأجــيال =ولا خــير برجالٍ ما تناقل طــيب ماضـيـها
ولا ابالغ اليا قلت انت فيك من الثنين خصال =كرم مع معرفه مع طيب واشياء صعب نحصيها
وشاعــر لك بمــيدان الجزاله مــطلع ومـدخال =تصــيد الشـــرّد وبندقــك يامــبعـد مــرامــيهـا
تحيه لك يابو رايد ولك ناقف قـدر واجـلال = لانك لك معــي وقــفــه وانا مــاني بناسـيها

* عايد السميري
1 / 9 / 1429 هــ




وهذا رد الشاعر / حمود ابن مخيلي

على مبدا الرجال اللي تسمى والحمول اثقال = هلا يامرحبا ترحيبةٍ باسمى معانيها
هلا يامرحبا ترحيب كنه صادق الهمال = تحت ضو البروق اللي تحرك من مناشيها
هلا هلا يدوم الود فيها وياصل الجمال = لوحة شرف على صدر الزمن ويعيش قاريها
تجمل ياقصيدي بالرجال اللي تسر البال = صفت صوره على صوره تجاريني واجاريها
اوردها القليب اللي عليه من القديم حبال = هداج من الوفاء طول الزمن ماحال ضاميها
وانا اكتبها على سطر الورق واجرها موال = على صوت الحروف اللي تغنيني واغنيها
تمكن ياقلم من جر بيت الشعر والتجوال = على صفحة وفا ( عايد ) رسمها واعتنى فيها
واليا ضفت السميري يكتمل كل الوفاء بالحال = نهج نهج الرجال اللي تشرفني هقاويها
ودخل سوق المعرفه واكتسبها والصحيح يقال = شهادة من هجوس الشعر اربعها واثنيها
وضمنها جزيل الشكر واسرج مهرة الخيال = خصوصيه لعايد بين بايعها وشاريها
على شاشة عربسات العرب له موقف الأبطال = خدم كل القبيله بالتراث وعز طاريها
على مبدا الرجال اللي تسمى والحمول ثقال = هلا يامرحبا ترحيبةٍ بأسمى معانيها

* الشاعر / حمود سلمان بن مخيلي السميري
10 / 9 / 1429 هــ