ياعبد الكريم ان ضقت وجّه على القبله

ياعبد الكريم

ياعبد الكريم ان ضقت وجّه على القبله = ويمّم كفوفك يمّ مولاك وارفعها
توكل على مولاك واستمسك ابحبلــه = ترا كل ضيقه يقدر الله يوسعـــها
طبيب القلوب اللي من الوجد منهبله = ولا واحدٍ غيره يخفف مواجعهـــا
ومن خلقت الدنيا على الكدر منجبله = وماتنومن في كل ساعه فواجعها
وانا مثل راع الابل يتعب ورى ابله = ويفرح لمنه شافها زان مرتعها
ولي نفس تذكر كل غالي وتطلبله = وتطمع عسى الله مايخيب مطامعها
ياعبد الكريم العلم لابـدّ تتعبلــه = وترا كل صنعه من مهارات صانعها
وكل التعب يابوك مخلوف في سبله = ليال التعب بعدين تلقى منافعهــا
ومن طاب لك وابدا لك الطيبه طب له = وسيات غير عنك بالحسنه ادفعها
ومــن لايودك لاتغنــي على طبــله = وقوم الضلاله لاتغرك زوابعها