جايب لكم سندوش مشكل

موضوع حبيت اكتبه لكم للتسلية فقط بالرغم أن بعض أحداثها موجوده بشكل يومي أتمنى أن تكون خفيفه عليكم وأن تعجبكم

اليوم الخميس ليلة الجمعه خوينا طفشان صحى ومعروف وش أول شئ سواه أكيد قام من فراشه وأكيد الأغلبيه بس ماهو الكل يتجه للمغسله ويغسل وجهه بعدين يشرب ماء اذاكان عطشان وبعدها شاي نزل خوينا لسيارته أووووو ؟؟؟؟؟؟
نسى له حاجة لاهو جوال ولا المحفظة ولا دخانه !!!!!!!!!!
نسى لايمشط شعره ألي واقف تقول منخرع من شئ ويطالع فوق .... الله يعينه ساكن بالدور الثاني تعب عليه المهم أجتهد وطلع مره ثانية طبعاً يبغى يظهر قدام المجتمع بشكل مرضي دخل البيت وشاف طاقيته ألي رماها بالصاله أمس لما جاء من البر مغبره أخذها ولبسها المهم ماحد يشوف شعره وبنفس الوقت أسرع وأسهل من التمشيط .............
وراح خوينا للبوفية يبي فطووووووووور طبعاً ماهو عشان إنه جيعان عشان الدخاااااااان ما يضبط إلا بعد الفطور ويازين أول سيجارة بعد الفطور مايعرفها إلا ألي يدخن مثلي الله يفكني منه المهم دخل البوفيه
وسأل البنقالي السؤال المعروف (وش عندك ساندوش؟؟؟؟؟)
طبعاً بلمح البصر رد البنقالي بالجواب المعروف أيضاً
( ساندوش فلافل جبنه شكشوكه كبده لحم بيض مسلوق بيض مقلي مشكل)
طبعاً الأخ دوبه صاحي من النوم وما استوعب كل الي قاله له الهندي معليش قصدي البنقالي ولو مانفرق بينهم يقولون الناس بريحتهم المهم احتار وش ياكل واختصر خوينا طفشان الموضوع وقال عطني ( ساندوش مشكل)
بالرغم من البوفيات ماعندها غير الأصناف الي ذكرتها لكم فوق ما أدري وش جديد السندوشتات المهم خلص له السندويش وراح العامل بإصبعه السبابه مرطبها بلسانه عشان يسهل عملية إخراج ورقة لف واحدة ولف السندوش وخوينا يتفرج عليه وراضي بعمل البنقالي مادري ماهو منتبه وطرح سؤال جديد ( وش عندك عصير)
ورد العامل بشكل أسرع من الأول ( ميراندا ببسي ديو سفن عصير ربيع عصيرات طازجه)
قال له خوينا طفشان( مافيه عصير مشكل)
طلع البنقالي أحسن منه
وقال ( لا صديق مافيه عصير مشكل فيه كوكتيل)
وقال له طفشان( طيب سوي لي واحد كوكتيل )
وبعد ما أفطر خوينا السندوش مع ورقتها ألي لفها البنقالي لفه ماقدر يفكها راح للبيت ماهو عارف وش يسوي أخذ الريموت وقام يقلب القنوات الفضائية ولا هو عارف أي قناة أو أي برنامج يختار مره على الأفلام مدة خمس دقايق ومرة على الرياضية دقيقتين ومرة على الشعر خمس دقايق ومرة على توم وجيري على قنوات الأطفال طبعاً توم وجير لازم يشوفها كامله عشان تكتمل القصة وبعدها على الأخبار ألي كلها
( خبر عاجل بالأحمر وتحته خط زي ماني مسويه لكم وفيها/ فجر وقتل ودمر وذبح وخسرت جميع شركات الأسهم )
المهم الأخبار كلها مصايب طفش خوينا طفشان من هالحالة وراح يقلب جواله يبي يسهر عند أحد زملائه بس ماهو عارف مره يشوف اسم خوي له دايم في مقاهي الشيشيه بس طفشان مايشيش مكفيه الدخان ومرة يشوف اسم خوي معروف حق طلعات وقنص بس طفشان أمس جاي من البر ولايحب التكرار وفجأة يدق عليه زميل وقال له
(تراك معزوم عندي عشاء الليلة )
طبعاً خوينا مايحب الرسميات وأعتذر وحلف ان عنده شغل في الدوام بعد ماقفل السماعه تذكر خوي له عنده مشب ودايم الشباب متجمعين عنده ومايحتاج يخسر نفسه ويتصل عليه لأن الوضع عنده فري يجيه بأي وقت وكله عشان ورقة البالوت ألي عنده رووووووووعه عليها شعار الخطوط السعودية
وقيمتها (25 ريال)
المهم اجتمعوا الشباب وكان عددهم خمس أربعه يلعبوا
ولهم صراخ .........
(لا حكم /لا صن ليه مافهمتني انت الغلطان لا انت غشيم )
والخامس في الزاوية رموا عليه الريموت عشان يسلي نفسه
لين يجي السرا وبعد إنتهاء سهرته
رجع للبيت الساعة (3 صباحاً) لو إنه راح بدري المفروض
(4 صباحا)بس خوينا طفشان خسر اللعبة
ونام بعد يوم مزدحم بالأعمال الشاقة المرهقه .........

وإلى اللقاء عندما يستيقظ إن شاء الله خوينا طفشان راح أعلمكم وش صار المهم كتبت الموضوع وأنا طفشان وعساكم ماطفشتم مني ومع ألف سلامه ..