مجالس الرجال وسوالفهم بين الماضي والحاضر

كان ياما كان في سالف العصر والاوان سنين ليست ببعيده كان المتكلم في صدر

المجلس شخص واحد يسرد قصة ما ..من قصص الكرم اوالشجاعه او المغزى

حدثت له قديما أو لآبائه او احد اقربائه..

والجميع في المجلس منصت في اصغاء ليس له مثيل..الكبير والصغير..

وجميعهم في حماسة لهذه السالفه((وكأنهم يشاهدون مسلسل مكسيكي مدبلج الحلقه

146)) والتي يتم توثيق هذه السالفه تلقائيا من قبل كثير منهم لتتحدث بها الاجيال

القادمه,,


صحيح أنهم يتحدثون في أمور دنياهم وينشدون عن الربيع والمطر ...

لكن ليسوا مثل مانفعل الان وتحصل الواحد منهم يضحك ويسولف وهويمكن ماعنده

قوت يومه ..لكنه واثق بأن الله لايضيعه وسوف يرزقه..

أما الان ماالذي يدور في مجالسنا من سوالف؟؟؟

قبل بضع سنوات وفي ذروة الزراعه..1409الى 1417 طغت احاديثهم وما

يدور بينهم وكل على حده وكانها(( اصوات طلاب متوسط طالعين فسحه))

الاتي:

_وش زرعت ها السنه يابو فلان قمح والا شعير..

_لاوالله زرعت قمح ولكن جاه البرد هالحين وصفر شوي.

_كم طن انتاجك العام؟(يبي يقارنه بهالسنه)

_انتاجي زين العام لكن حطيت سماد وكلفني ..واجد..

_السماد اللي انت جربته رايك زين يزود الانتاج.....

وهكذا...احاديث يوميه مكرره :

وتجد من لاعنده مزرعه ينظر اليهم بطرف عين من الطفش (وده يغيرون السالفه)

اما الان وقتنا الحاضر..1426

_وش فيه اكتتاب جديد..يالربع..

_من عنده كروت يبيعه والا بالنص انا وياه,,(على شرط يكون ثقه)

_والله السوق نازل اليوم..المؤشر وصل 16300

_اسمنت تبوك عليه توصيه جتني من واحد خبره وتوصياته جامده..

_والمصافي يقولون راح تاصل خمس الاف..

((هذا اذا مايطقطق بجواله يبحث عن بلوتوث من حوله أوقاعد يلعب بلياردو والا لعبةالثعبان..))




هذه سوالفنا قبل وسوالف هالحين..

صدق اللي قال ((دوام الحال من المحال))

لكننا يجب ان نعلم اولادنا سوالف آبائنا واجدادنا..وادب المجلس للصغار ..

ونعلمهم حمسة القهوه بالمحماسه ودقها بالنجر .. وزلها بالمبهاره ..

لكن كثير من عيال هالوقت (خكاريه) مايعرفون شي,,طلعوا على

الكابتشينو ..(الحق على الطليان كما قال كاتبنا راع الذلول)

وتجيهم القهوه جاهزه من الحريم ..لا والشغاله مسويتها..

وعلى قولة اخواننا المصريين..

صحــــــــــــــــــــــــــيح ان اللي اختشـــــــــــــــــــوا ماتــــــــــــــــــــــــــــوا..