خيمة اخت الجود

بسم الله الرحمن الرحيم
كل سنه والجميع بخير وصحه وسعاده انا تاخرت في نصب خيمتي لظروف خاصه قد اذكرها في احد مواضيعي الجايه وشكرا لكل من سأل عني وافتقدني
مشاركتي هنا لا احددها في نمط معين هي سوالف او قصه او راي او ذكرى او شيئ من النثر وقد لا تكون مواظيعي كلها ذات صله برمضان وتمنيت لو اجيد حركات الفتوشوب لاشرككم ببعض رسوماتي المهم اني اتمنا ان اكون خفيفه على قلوبكم خاليه من كرسترول الطرح غير المفيد (اسفه شكلي متاثره بزيت من كثر مااقلي به هاالايام)

الى الانفاس البرئيه


الى القلوب الحانيه


الى الارواح الصافيه


بهذه المناسبه الكريمه


اقول (( كل عام وانتم بخير ))

من الاشياء اللتي يحسدني عليها الناس هو سكني في مدينة الرسول صلى الله عليه وسلم وانا والحمدلله اشكر الله ليلا ونهارا على هذه النعمه وخاصه في هذا الشهر
فللحرم المدني اجواء عذبه جميله قمه في الروحانيه لا نجد مايساويها او يوازيها الاا لحرم المكي
هموم الدنيا تتركها عن مدخل باب المسجد فانا اسلم اغراضي الشخصيه للحارسه ومعها اسلم كل مايشغلني من امور الدنيا عالم ايماني كل شي له طعم هناك الافطار على حبة تمر وماء زمزم توازي مائده كامله خارجه حتى اننا لا نشعر بلجوع هناك
تنظر للجميع تجد الاشراقه والابتسامه على وجوه المصليات واطفالهن والمنظر الرائع ايظا هو تسابق الاخوات على توزيع التمر وكسب الاجر تنافس يشعرك بلسعاده اخلاق كريمه اجدها بذات من السعوديات حين يحرصن على اشراك غيرهن بلفطور من قهوه وتمر وعصير

ومن فضائل هذا الشهر الصدقات كلن بحسب مقدرته فحين دخولك الى ساحات الحرم تجد افراد وجمعات يوزعون صدقات افطار الصائم وتتنوع الحافلات الكبيره اللتي توزع الااف الوجبات والسفر الموزعه على ساحات الحرم وقد كتب على هذه الشاحنات حملة الامير الفلاني او الشيخ لكن من اشمل واعم حملات افطار الصائم هي كانت للملك فهد رحمه الله وجزء اولاده من بعده خيرا ومن عمومها وشمولها انه لا يترك لك مجال ان تجلب معك شيئا لتتصدق به فلكل مكتفي ويرفض حين توزع عن طريق شخصي ومن استغل هذا الشهر بأخراج صدقاته اللتي تضاعف الااف المرات فهو بأذن الله رابح رابح ليس بلأجر فقط بل بأشياء كثيره ولأوظح قولي اليكم بعض القصص عن فوائد الصدقات

------------------------------

قصص وعبر كانت الصدقة شفاء

يذكر أن رجلاً سأل عبد الله بن المبارك رضي الله عنه ..
عن مرض أصابه في ركبتيه منذ سبع سنين ..
و قد عالجها بأنواع العلاج و سأل الأطباء فلم ينتفع ..
فقال له ابن المبارك :
اذهب و احفر بئراً فإن الناس بحاجة الماء ..
فإني أرجو أن تنبع هناك عين ..
و يمسك عنك الدم ففعل الرجل ذلك فبرأ ..
( وردت هذه القصة في صحيح الترغيب ) .

و يذكر أن رجلاً أصيب بالسرطان ..
فطاف الدنيا بحثاً عن العلاج فلم يجده ..
فتصدق على أم أيتام فشفاه الله !

و قصة أخرى يرويها صاحبها فيقول :
لي بنت صغيرة أصابها مرض في حلقها ..
فذهبت بها للمستشفيات وعرضتها على كثير من الأطباء ..
و لكن دون فائدة ..
فمرضها أصبح مستعصياً ..
وأكاد أن أكون أنا المريض بسبب مرضها الذي أرق كل العائلة ..
و أصبحنا نعطيها أبراً للتخفيف فقط من آلامها ..
حتى يئسنا من كل شيء الا من رحمة الله !
إلى أن جاء الأمل و فتح باب الفرج ..
فقد اتصل بي أحد الصالحين و ذكر لي حديث رسول الله صلى الله عليه و سلم :
" داووا مرضاكم بالصدقة "
فقلت له قد تصدقت كثيراًُ!
فقال تصدق هذه المرة بنية شفاء ابنتك ..
و فعلاً تصدقت بصدقة متواضعة لأحد الفقراء و لم يتغير شيء ..
فأخبرته فقال : أنت ممن لديهم نعمة و مال كثير فلتكن صدقتك بحجم مالك ..
فذهبت للمرة الثانية و ملأت سيارتي من الأرز و الدجاج و الخيرات بمبلغ كبير ..
و وزعتها على كثير من المحتاجين ففرحوا بصدقتي ..
ووالله لم أكن أتوقع أبداً أن آخر ابرة أخذتها ابنتي هي التي كانت قبل صدقتي ..
فشفيت تماماً بحمد الله !
فأيقنت بأن الصدقة من أكبر أسباب الشفاء ..
والآن ابنتي بفضل الله لها ثلاث سنوات ليس بها أي مرض على الإطلاق ..
و من تلك اللحظة أصبحت أكثر من الصدقة خصوصاً على الأوقاف الخيرية !
و أنا كل يوم أحس بالنعمة و البركة والعافية في مالي و عائلتي ..
و أنصح كل مريض بأن يتصدق بأعز ما يملك ..
و يكرر ذلك فسيشفيه الله و الله لا يضيع أجر المحسنين !

و قصة أخرى ذكرها صاحبها حيث قال:
ذهب أخي إلى مكان ما و وقف في أحد الشوارع ..
و بينما هو كذلك و لم يكن يشتكي من شيء إذ سقط مغشياً عليه ..
و كأنه رمي بطلقة من بندقية على رأسه ..
فتوقعنا أنه أصيب بعين أو بورم سرطاني أو بجلطة دماغية ..
فذهبنا به لمستشفيات عدة و مستوصفات و أجرينا له الفحوصات و الأشعة ..
فكان رأسه سليماً لكنه يشتكي من ألم أقض مضجعه و حرمه النوم و العافية لفترة طويلة ..
بل إذا اشتد عليه الألم لا يستطيع التنفس فضلاً عن الكلام ..
فقلت له : هل معك مال نتصدق به عنك لعل الله أن يشفيك ؟..
قال نعم ..
فسحبت ما يقارب السبعة آلاف ريال و اتصلت برجل صالح يعرف الفقراء ليوزعها عليهم ..
و أقسم بالله العظيم أن أخي شفي من مرضه في نفس اليوم و قبل أن يصل الفقراء شيء ..
و علمت حقاً أن الصدقة لها تأثير كبير في العلاج..

تصبحون على خير

كانت ايام قبل رمضان لم اذق فيها الراحه وكيف سارتاح وزهرتي الغاليه طريحت الفراش تنقلت من من بين مستشفيات حكوميه وخاصه وانا في حيره كبيره واستقر بي المقام في مستشفى احد
لم تكن تاكل واستفراغ واسهال متكرر مضا يومين وعيوني على ابنتي لا تفارقها اراقب طريقت تنفسها شهيقها وزفيرها كانت نائمه على الدوام ولا تتحرك الا لتتاوه وتقول لي ان معدتها تالمها مضى يومان وهي على هذا الحال اكلمها
ميما ماما قومي اشربي عصير الليمون اللي تحبينه
ميما اذا قمتي واكلتي تطيبين ونروح نقظي لك اغراض المدرسه مو انتي تبي تكبرين وتروحين اولى يله قومي
وحين لا ترد علي تظيق بي الدنيا ولا اعرف ماذا افعل لكني اخرج صديقي الدائم من حقيبتي فانا اصحبه في كل مكان في سفري في الحديقه في كل مكان فلا يدري الانسان متى يحتاج الى الكتابه هو بلطبع قلمي وبعض الورقات حينها تسالني كثير من الممرضات ماذا تكتبين فاارد ممازحه
اكتب رساله لزوجي
تبتسم برومنسيه اووووووووووووووو مدام فري نايس
ماذا اقول لهن اكتب عن اهمالكن اكتب عن ليالي المستشفى الممله او اكتب عن طفلتي الذابله
وعلى ذكر الاهمال لاحظت ان الكفائه السعوديه ليست بمثل الاجنبيه فلممرظات السعوديات كسولات جدا وبطيئات ومهملات الا من رحم ربي
فانا اناديهن اكثر من خمس مرات وحين تستجيب ياليتها تقوم بعملها بشكل صحيح تضع المحلول دون ان تكلف نفسها ان تتاكد انه يعمل مما يظطرني ان اذهب مره اخرى لاخبرها
لكن الاجنبيه تمارس عملها بكل اتقان ومهاره وتفاني تحرص على المرور كل ساعه ومع هذا تجد الابتسامه على وجهها وهي لابد ان تتجاذب معي اطراف الحديث
سبحان الله السعوديه راتبها اعلى بكثير من راتب الاجنبيه وساعات العمل اقل ونهاريه لكن قلما تجد الاخلاص في العمل
عندما كنت امارس مهنت تصميم الازياء كانت كثرت الزبائن ترهقني لكن يشهد الله اني كنت استمتع واستلذ بعملي واجد المتعه في ارضاء زبوناتي وتحقيق كل طلباتهن
لكن لا اعرف لماذا لايعرفن تلك اللذه اللتي نجدها من الاخلاص في عملنا فلم تكن الغرف مملؤه فقط ثلاث غرف وذلك لخوف الناس من انفلونزا الخنازير ومع هذا هن ملتصقات بلكراسي واحاديثهن وظحكاتهن تملا القسم
لهذا الشباب السعودي غير مستحب في قطاع العمل لعدم كفائته واخلاصه في عمله
المهم كنت وين وصرت وين بعد ثلاث ايام وجدت ابنتي تناديني
ماما لو اطيب بابا يجيبلي عصير ليمون
يمي مو ابوك يجيبلك انا اجيبلك كرتون وسويلك بنفسي بس حبيبتي قومي كولي عشان تحسنين
واشرقت ابتسامتها ولله الحمد وتحسنت لدرجت اشتكن منها الممرظات لكثر تنططها بلممرات
ويوم تطفش تجيلي تكلمني بس انا مارد عليها كثير لاني (اشخر) وتقول
والله انك تطفشين ماتسولفين علي ويوم ماتلقى رد تروح تاخذ القلم وباقي الاوراق وترسمني وانا نايمه والسرير والغرفه ربي يخليها لي ويحفظها وطلعنا قبل رمظان بيوم
ادري ظيقت صدركم بسوالفي بس اوعدكم بتظحكون مع قصه مناسبه لموضوعي اتركم معها

مريض بالمستشفى كل من يطلع من عنده يـضحك

((قصة طريـفة وواقعيـة))

يحكيها مريض منوم بجانب صاحب القصه

جلس ذلك الرجل على السرير الابيض في احدى المستشفيات في بلدنا الحبيبه
وكان كل جسمه شاش ورجلينه كلها جبس
وما تسمع الا تآآآآوهاااااااته:
مغير يون من الاوجاع اللي فيه
عاد انا قلت يمكن انه مسوي حادث قوي
او انه محترق او او او الخ

المهم جت الساعه 4 العصر
وبدا وقت الزياره

انا استغربت من شي غريييييييب مره
كل من جاء يزور هالشخص يطلع من عنده ميت من الضحك

انا جاني الفضول وقلت وش السالفه
وعلى هالحال كل من جاء وسلم عليه ما تسمع الا ضحكهم من ورا الستاير

انا قلت لازم اعرف وش السالفه

انتهى وقت الزياره
وانقز له على طول
واتشافا له واقوله الحمد لله على السلامه
عسى ماشر ومن هالكلام
وانا كل همي اعرف ليش يضحكون:

المهم قلت له: انا اشوف اللي يجونك ما يرحون من عندك الا و ضحكهم واصل اخر المستشفى ... قال لي : هههههههههه ليـش عاد أنت حاسدنا على الضحكه . قلت له : لا يـا أخوي مهوب كذاك السالفه والله لو عندك مليون كان يمكن أحسدك! بس اضحكوا عادي خذوا راحتكم بس بغيت اعرف السر يعني . اذا ما عندك مانع قال لي : طيـب ولا يهمك انت مثل ما تشوفني مكسر ومربط بالشاش
قلت له : أيـوه والله الله يشفيك.

قال لي : يا طويل العمر انا ساكن في شقه في الدور الثاني وعندي بلكونه مامن زيـنها واذا نمت فتحت باب البلكونه .. وطفيـت النور وتسدحت على السرير
ويوم نمت على السرير ... وغصت في اعماق اعماق نومي حلمت اني في يوم القيامه ... وحلمت مثل ما تقول ان الناس في مكان مثل موقف الباصات وفيه باصات رايحه للجنه وباصات رايحه للنار !!! المهم الجماعه ينادون بالاسامي فلان بن فلانه باص النار فلان بن فلانه باص الجنه .. وهكذا
فلان بن فلانه هه هذا اسمي وقلبي يـدق و يـدق رووح باص الجنه اووووووووووووه الحمد لله ارتحت
ومشيـت ادور على الباص اللي مكتوب عليه الى الجنه وحصلته ودخلت فيه مشيـنا بالباص وبعد فترة جاتنا لوحه مكتوب عليها (الجنه 50 كيلوا) (النار 100 كيلوا)
وهذا وحنا مع اللوحات والله ونتعدى الجنه قلت يمكن السواق يـعرف مكان لباب ثاني
شوي وشفت النار 15 كيلوا وبعد شوي النار 10 كيلوا وكل شوي نقرب من النار ... يا رجال وش السالفه .. المشكله الناس ساكتيـن وما حد قلق في الباص الا انا قلت بدخل عالسواق وشفته معطيني ظهره إيـه إإإيـه أنت وين رايح ؟؟؟!!!!!!!!! قال لي بدون ما يلتفت : رايح النار يا حبيبي قلت له : ويـش انا من اهل الجنه .. وليـش توديني النار يا وجه النحس!!!.
والتفت لي ... طلع هو ابليس !!! الله يلعنك انا من اهل الجنه يا ملعون لا توديني النار انا من اهل الجنه .... والله العظيم اني من اهل الجنه تو من شوي قايلين اسمي وقف يا ملعون وقف يا ملعون وهذا انا
أصورخ... وهو بانواع الضحكات الشريره هاهاهاهاها . هاهاهاهاهاهاهاها هاهاهاهاهاهاهاهاهاهاهاهاها قلت له يا ملعون وقف !!! أبي انزل !!! قال : والله الباص هذا مبرمج على انه ما يوقف الا في النار تبي تنزل أقفز منه وركضت على الباب وفتحته وهوووووووووووووووووووووووووووو ووووووووووووو وووب

ولا وعيت الا في المستشفى ... قافز من البلكونه ... في الحوش !!!!

يقال أن القصة صحيحه ... وحصلت لواحد كان منوم في مستشفى المجمعه العام

الله يمدكم بصحه والعافيه ويرزقكم با الاحلام الزينه وتصبحون على خير

ياربي ماعندي وقت
مظلومات نحن الحريم فنحن في جري مستمر منذ ان نصحو من النوم حتى ساعة الافطار ومابعد الافطار ومابعد التراويح القهوه والشاي وعشاء خفيف وقبل السحور ومواعين مابعد السحور ولا تكاد المسكينه تخرج من المطبخ الا لساعات قليله تقضي بها ماتستطيع من العباده
وخاصه اللي ماعنده شغاله او له وغدان عشر
(لاحظو اني ابدى بفصحى واقلبها عامي)
وحتى لو حاولنا ان نضع جدول نرتب به يومنا ماشاء الله الزوار والضيوف زادهم الله واعطانا اجر تفطيرهم لا يتركون لنا فرصه
لكن توجد نماذج سوبر ومن (حريم خارقات) تكون شامله توفق مابين كل شيئ جميع معالم رمضان ماتفوته لكن السؤال اللي دايما يدور في بالي وانا استمع لحديثهن هي من توفق بين الطبخ وشغل البيت والعباده والتلفزيون فتلقاه تتكلم عن ماطبخت من اصناف وبعده تحسي عن صلاة التراويح واي سوره قرء وماشاء الله باي جزء وصلت ولاحكن الحريم عن المسلسلات
الا حاضره كل الحلقات وتاصفه بتفصيل ولاجبنا سيرة المجمعات والاسواق قالت ايه والله هكليوم رحت للمجمع الفلاني يابوه تخفيظات تجنن
يعني بصريح العباره بتاعت كلوه (متى يمديها!!!)
وبلاخير يوم تشوفني منبهره منه تخاف على نفسه وتبي تطرد العيون عنه وتقول
الله يعين ماعندنا وقت الوقت ظيق (دهاء الحريم)
مالي الا اقول ماشاء الله تبارك الله
ربي يعطيها الصحه والعافيه
اليوم انا كنت معزومه على فطور وهذه مناسبت موضوعي
اما قصتي اليوم عن الحريم وعن الدهاء والحكمه وخاصه العجايز
اترككم معها

كان يا ما كان في قديم الزمان

كان فيه أمراة عجوز قاعدة بروحها

وفجأة طلع لها ابليس

العجوز خافت وسمت بالرحمن

…قالها ابليس :أنتي يا عجوز هل تعتبرين نفسك داهيه

العجوز: نعم أنا داهيه ….. والنساء عموما كيدهن عظيم

أبليس: أنا أتحداك…..وبنشوف مين كيده أعظم ..المرأة ولا أبليس

العجوز :خلاص أنا بسوي مشكله وأنت راح تحلها واذا ما قدرت أنا راح أحلها

وراح أفوز بالرهان.

O.k :أبليس

راحت العجوز حق واحد من هالبطاليه اللي ما عندهم

شغل ويا كثرهم

وقالت أنا بشغلك عندي فترة معينه بس…

اذا تبي فلوس لا تتدخل ولا

تتكلم وافق الشاب لأنه طفش من البطاله ويبي فلوس

راحت العجوز ومعاها الشاب لمحل قماش وقالت له أتنتظرني عند باب المحل

…دخلت المحل وخذت قماش غالي وراحت تفاصل تاجر القماش

العجوز: رخص يا بن الحلال …

التاجر :اذا أنتي ما عندك فلوس خوذي شيء أرخص

العجوز : ما أقدر ….لازم ولا بيصير شي ء ما صار

التاجر :ليش ..لها لدرجه ..شسالفه

العجوز:شفت الشاب اللي واقف عند باب المحل ..هذا ولدي

..يحب له وحده متزوجه وهي تحبه ولما تتطلق من زوجها …ولدي بيتزوجها

وهو قال لي أن عارضتي الزواج أطردك من البيت وأمرني أني أشتري قماش

غالي عشان يعطيها حبيبته ولا راح يطردني من البيت مع

أن البيت بالأساس

بيتي ولكني غلطت وكتبته باسمه العجوز تبكي

التاجر: خلاص هونيها وتهون والله كسرتي خاطري ….خلاص أنا أعطيك القماش

ببلاش….وعسى الله يأجرني

العجوز طلعت مستأنسه وقالت حق الشاب روح البيت

بعدها راحت العجوز لبيت زوجة تاجر القماش وطقت الباب وطلعت الزوجة

العجوز:آه يا بنيتي أنا تعبت بالطريق و ما أقدر أكمل ممكن أقعد عندك أرتاح

خمس دقايق .

رحبت الزوجة ودخلتها وأكرمتها وجابتلها شاي

العجوز: مشكوووووورة ما تقصرين إن شاء الله أردها لك (تعمدت تنسى القماش ) وطلعت.

الزوجة:حرام نست قطع ة القماش …أكيد بترجع بعد شوي وتأخذها

بروح أحطها بالدولاب..القماش رد لبيته وتغذى ذاك الغدا السنع ونام شوي .

قام العصر وفتح الدولاب بيغير ملابسه عشان يروح محله

مفاجأة قطعة القماش

وعرف أن المرأة اللي يبيها ولد العجوز هي زوجته يعني تخونه

قام عليها وطقها وطردها بالشارع بالهدوم اللي عليها.

العجوز كانت تنتظر هاللحظه في أخر الشارع فراحت لها تركض

العجوز: وش فيك يا بنيتي ليش تبكين

الزوجه : زوجي طردني …وما أعطاني فرصه أتكلم .

العجوز: خلاص أنا بأوديك بيتي وأنا بروح أحل المشكلة

راحت العجوز لبيتها ودخلت الزوجه في غرفة بينما الشاب كان في

غرفه ثانيه وأمرته أنه ما يطلع منها

راحت العجوز للشرطه تبكي وتقول :كنت قاعدة في بيتي وفجأة دخل ومعه مرأة وقعدوا ببيتي حاولت أطلعهم ما قدرت

(أحتلوا بيتي )

ذهبت الشرطة وقبضت على الشاب والزوجه ….وطشوهم بالسجن.

العجوز: ها ها وش رايك يا أبليس دورك اللحين حل المشكله

أبليس : لا لا ما أقدر أحلها السا ل فة تشربكت مرررررررة

العجوز: أنا راح أحلها وكأن شيء لم يكن ..

وراح أربح الرهان

راحت العجوز تزور الزوجه بالسجن وقالت لها :أنتي ساعدتي مرة

وأنا اللحين بأساعدك …..يلا ألبسي عباتي وغطي نفسك وأطلعي من السجن كأنك أنا وأنا بأقعد

مكانك.

الزوجة:مشكووورة ….لكن أنتي

العجوز: مالك شغل مثل ما طلعتك بطلع نفسي.

تمت عملية الهروب بنجاح….الوالي أمر الحراس يحضرون المسجونين عشان يحكم عليهم

حضرت العجوز والشاب وقال لهم الوالي :ليش قابضين عليكم وشو مسوين

ردت العجوز:احنا ما سوينا شيء كنا قاعدين ببيتنا أنا وولدي ولا الشرطه

طابه علينا وماخذينا السجن .

عصب الوالي وهزأ الشرطه وما عطاهم فرصه يتكلمون ويقول: غلطانين

وتبون تتكلمون. شين و قوات عين

طلعت العجوز من الوالي مستانسه وعطت الشاب فلوس وأنهت خدمته عندها.

راحت العجوز لتاجر القماش وقالت له أنها تعبت بالطريق وأن زوجته أصيله وأكرمتها وهي من

كثر التعب نست القماش عندها وأن زوجته بريئه

وقالت خذ قماشتك لأن ولدي سافر هو و ز وجته الجديدة.

رجع التاجر زوجته وتأسف منها و راضاها بعد.

العجوز : وش رايك يا أبليس أنا فككت السالفه سهله

أبليس : أنتي ربحتي ….

أن كيدهن عظيم

انحاش منها وهو خايف

الله يكفيكم كيد النساء ولا حد يستهون بذكاءهن

تصبحون على خير

ملاحظه جميع القصص اللتي حكيتها هي مما سمعت وقرات ولم اكتب شيئا لي