الحلقه الاخيره من مسلسل عجاله

بسم الله الرحمن الرحيم

السلام عليكم ورحمة الله وبركاته


نظراً لظروف الابطال وأوضاعهم الراهنه
ولكثرة العروض التي أنهالت عليهم من عقب مسلسلي >> أخص يا عامر الحمود ... لجيتنا بقولة طاش ماطاش مسلسلي
تم تصوير أحداث حلقة الاخيره من عجاله على عجاله

وبعد ما أنمسك رشيد مع علباه .........
ألتفت للي أمسكه ولنه العميد البلدوزر وقال : الحين أنرقع صوتي
يا عسكري أنت وياه وانا أزهم عليكم ليه ما نفذتوا العاز؟؟؟؟
كم خدمتكم العسكريه ؟
رشيد : يا أستاد ما درينا أنك ودك أيانا
زيدان : وش أستاد يا رشيد !!! هذا ماهو باستاد هذا شرطي
قوقل : صدق !! طيب يوم انه شرطي وين صفيرته
زيدان : يعني ما انت مصدقيني ! أنا أساله الحين !!
شــــــــرطي شـــــرطي ...
البلدوزر : شرطي بعينك.. بلا بشكلك أنت وياه ... ثابت ثابت
واخذوا بألتفات فسألهم البلدوزر : يا واد أنت وهوا أيش بكم
بتلفوا حولين نفسكم كده ليه
فايز : أندور ثابت اللي أنت اتصوت له
البلدوزر : أيش هادا يا ابويا أنتوا منين طلعتوا ليا ...يا نقيب
تواصل أجمع ...
تواصل : أمرك
خد المجموعه دولا ودربهم أضافه حتى الدم يشرشر من كوعهم
أبغا أشوفهم لما أقول ثابت يصير الواحد منهم واقف
قدامي زي ألالف
ويقفي بهم تواصل الى ميدان التدريب واصبح ماله
شغله الا هم يبدا بهم من الفجر حتى غيبة الشمس ما يطيح
الواحد منهم على فراشه الا وهو تقل هِدم من التعب
وأنتظموا وتأقلموا مع وضعهم الا قوقل ما زال يحن ويرزم
كل ما صفوا بالميدان وهو جرها حسره وقال : أنا وش اللي غربلني
وجابني معكم لا يا حياة الشقى كنت أول جالس مبسوط
عند مريتي وعييلي متربع على دلالي ولا تسمع الا دنين
نجري كل فجريه ....... أااااااه الحين ما اسمع الا طحير
تواصل كل صبح وهو مرمطني بهالمراغه
رشيد : أقول ريحنا كل صبح وانت لك نغيط تقل ما بالميدان غير انت
ما بقى غير القليل كلها كم يوم واتخلص المستجد وناخذ اجازه
ونظهر لديره
زيدان : أليـــــــــــــــــــــــــــن قوقل صادق
فايز : من بغى الدح ما يقول أح ...... كيف وده يجيكم معاش
بدون تعب

وبعد مده وجيزه أنهوا دورتهم وتخرجوا برتب مختلفه
بحضور البلدوزر وتواصل وعايش سالم
المركزألاول ... طبعا بعد المئه والتسعون
وكيل أول فايز
المركز الثاني ...الوكاد أنه بينه وبين فايز ميتين
النايب رشيد
المركز الثالث ... ماقبل قوقل اللي هو الأخير
العريف زيدان
المركز الرابع ...ولقد حصل عليه بأعجوبه وحب خشوم
الجندي قوقل
اللي حتى البلدوزر عند تخرجه قاله : أنت يا .. يا جندي يا
قوقل أسمع هادي شهادة تخرجك بس حسك عينك أشوفك
أتوطوط بالقسم اللي أنا فيه والكلام هو نفسه بوجهه
لك أنت.. وهو.. وياه..صدقوني أني لا أعيد دورتكم من جديد
يااللا... أنصــــــــــــرف... أنت وياه بلا بشكلك أنت وهوا
قوقل بينه وبين أخوياه بهمس : حقك علي ان شفت وجهي
ورا اليوم بهالميدان ...


المشهد الثاني
والمنظر نهاري

والمجموعه جالسين في مقهى المنشيه يتقهون وزانت الجلسه لقوقل
ولا عنده طاري ترويحه لاهله ومغير يطالع بالرايح والجاي
قال فايز : أشوف طابت لك الجلسه يا قوقل وأنت بالدوره
متباطي طلعتك مع الباب ودك الديره !
زيدان : على طاري الديره وش نتقضى لاهلنا ؟
رشيد : يعني وش ؟ مثل ما يجيبون العسكر اللي يطلعون
فايز : وش ياخذون ؟
رشيد : يا اخوي ياخذون طاقة قماش مقوطع ثياب حريم
وطاقه معاصب ومغاشي وكم درزن مطاوي على كم فتخه
على كم شماغ وكيس قهوه وكرتون هيل وقطمة رز وقطمة سكر
وخريطة طحين
زيدان : ترى موعد الحماليه حقت الرقيقيص الليله مير
تقضوا بسرعه والموعد عند القلعه
المشهد الثالث
وصلت الحماليه وعندما شافهم السواق وهم بلبسهم الرسمي
نزل مرحبا بهم الا أنهم شافوا نفسهم عليه وقالوا :
ياخي خل عنك الهنوصه وخذ كروتك وانت ساكت
الحين يوم شفت معنا فلوس قمت تقمر لنا وانت أول ما تهرج
معنا غير بالليور وعقبت لنا الخرع كل ما نتر رجال وحنا
قمصنا
وحملوا عفشهم ومشوا تسبقهم أشواقهم لرؤية الديره
وأهلها
وعند أقترابهم من مضارب ديرتهم كان أول من شاهدهم
نورة بلي وبلويه اللي كانن سارحات بغنمهن
واحتارن واختلفن مين اللي تقعد مع الغنم ومين اللي
تركض تبشر العرب أن الخطار جو
فقالت نورة لبلويه : أجلسي مع الدبش وانا ودي أبشر المزيونه
بان قوقل لفى مسكينه هالمريه علمها به يوم أنزعج للعلا
ولا جتها علوم عنه هي دايم تقول اذا انه طيب رايح يجي الحي
من الحي قريب بس البلا كانه بعد هالبطى جاب ليا ضره
ومن جذلتي وانا بنت ابوي لا اطش عقبه بوجهه واخليه للفقر والنقر
أما ان كان غيبته أنه تعسكر مثل ما يقولون فالله يحيه
من مقفاه الى ملفاه
قالت بلويه : وانكييري أنا ألومها غاديه مثل العود !!
أضان روحي بشريها ولا تنسيني من البشاره
المهم وصلوا الطرقيه عربهم وكلن فرح بجيتهم وتداورهم العرب
بين غدا وعشا ومضت الايام الحلوه سريعا ولم يشعروا الا والاجازه
أنتهت فحزموا حقائبهم للعوده ....
الا قوقل قال : أبدن ما اني زاحط من عند أضعيفيني
ولا اني خويكم أنا أنسان مرهف وحساس وما اقوى على
الغربه مير سلموا على تواصل وعطوه بدلتي وقولوا له يرسل
لي حقوقي !!!

أنتهت بحمد الله

نرجو السموحه ممن وردت أسمائهم حيث أنهم أخوه أعزاء
لهم عندي كل تقدير وأحترام
أخوكم أوسكار الهرفي

الله يعطيك العافيه

يعطيك الف عافيه اخوي اوسكار
نهاية جميلة وحزينه
ههههههههههه
لاهنت اخوي
ننتظر جديدك مع قصة جديدة

رشيد : يا أستاد ما درينا أنك ودك أيانا
زيدان : وش أستاد يا رشيد !!! هذا ماهو باستاد هذا شرطي
قوقل : صدق !! طيب يوم انه شرطي وين صفيرته
زيدان : يعني ما انت مصدقيني ! أنا أساله الحين !!
شــــــــرطي شـــــرطي ...
مشهد لمجموعة من البسطاء <<<<<على السليقة
اضحك الله سنك ياوسكار لاتقطعنا من ابداعاتك

اوسكار الله يعطيك العافيه يالغالي
مشهد ممتع ومحاكي لما يحصل بطريقة ممتعه ومشوقه تسلم يمينك وفكرك النير ودام ابداعك مع حلقات نتمنى ان لا تطول علينا .
بوسة محبة على جبينك

هههههههههههههههههههههههههههههههههههههههههه


اوسكاااااااااااااااار مبدع مبدع مبدع

يعطيك العااااااااافيه........
بس تررررررراهم ذبحووووووني انبح صوتي واناا ادربهم واخرتها قوقل يقووووووول مااااااني رررررااااجع...!!
الا والله لأخليه يرجع واخلللللللليه ينضف الميدان ببدلته..واخليه يتغدا ووووواشربه لبن ثم أستلمه دحرجه.......!!
وخل تنفعه الرومانسيه ابو قلب رهيف..!!



الف الف الف شكر للمبدع اوسكااااااااااااار