عجاله عجاله وبظهور الخيل أنتجاله

بسم الله الرحمن الرحيم



هذه القصه من وحي الخيال
فمن يجد اسمه فما هو الا تشابه
>> اقول هين لا يكثر



مقدمة المسلسل
موسيقى تصويريه

مع الزمل الاول مع الزمل الاول ... ويا راعي الاوضح مع الزمل الاول
ومن يوم حول ومن يوم حول ..... وياراعي الاوضح مع الزمل الاول


وتظهر بالصوره عرب ضعين على زملهم ومن ضمن الزمل جمل أوضح بحلقه
دبدوب وعليه حويه بها حرمه واضعيفينها متقدم على زمل الضعن قرطة عصا
ومتقفي الضعين مجموعة رجال لابسين سبت ومتحيزمين بشباري
ومفوسرين عن ذرعانهم والبنادق بيديهم يديرونها من يد اليد والدرابيل بجنوبهم

المنظر الاول
نهاري قبل الغروب والدنيا قيظ
العرب نزيل بسليلة وادي فيه ثميلة ماء يوجد حولها شجر البردي وتحيطه الجبال من جميع
الجهات مختلط صوت رغا الابل مع خوار ونغيط الغنم والبهم ولجة العرب
وصوت حرمه تصوت على ولدها اللي من حيث نزل العرب لقى البطين يطرد صيصان
الحجل : يا جليل البذر أرجع الشمس دمًست لا تاكلك الدواريج وانت تدسس
وسط الرضم .......... يا بلد انت ليه ما تجي تربط البهم
قبل ما توجه الغنم

شوي ولا الورع ينادي : يا ياه يا ياه أنا توكرت مقدر انزل
الام : خلك الى ما يجي ابوك وينزلك
وفي هالوقت لفى الاب اللي هو قوقل وقال:
ول يا متبرمتن عليك يا كوبان مرًح والصباح فلاح
من اللي به حيل وده يحدرك أنا يا الله وجهت الزمل
الام : اقول خل عنا الونونه واطلع وجب ولدك تراه مهو بعيد عنك بالكسل


المنظر الثاني
ليلي
رشيد يحدى ويجز له انعجه على ضو النار وزيدان منبطح عنده ويجاوبه بالحدى
ولا دروا غير فايز لابقن عليهم قال : يا عيال مين يخاويني ودي أنحدر
بكره لتبوك .... جاني تركي يقول فيه كتب بالعسكريه
وزيدان يعتدل من مجضعه وعلى فم واحد هو ورشيد : ألينا أخوياك
بس منين لنا سياره
فايز : الليله محاري جيت الحماليه ( شاحنه )
رشيد : منهي له الحماليه
زيدان :لرقيقيص أنا العام بصفري أنحدرت بها
رشيد : زين خلونا كل واحد يجهز زهابه وياخذ تابعيته ولا يضوح الصبح غير
وحنا بالماقف اللي عند قلعة المعظم

المنظر الثالث
نهاري

فايز وزيدان ورشيد في الموقف كل ما سمعوا رزيزه وهم اركضوا
ولا جاهم الرقيقيص غير الضحى الطويل ويوم وقفت الشاحنه ولا غير قوقل
جبهته تلمص من الشمس متربع بالسله ويوم شافهم من الفرحه طبح
من السياره وهي تمشي وهو يهلي ويقول : يا هلا بريحة عربنا بشروني
وش لون حال العرب من عقبي علمي بهم قبل انحدر للعلا
مير انتم وين ادكم ؟
قال رشيد : ودنا ننزعج لتبوك يقولون في كتب بالعسكريه ونوينا انتعسكر
قوقل : أجل أنا خويكم
وركب الجميع في حوض الشاحنه متجهين لتبوك تسبقهم أحلامهم
وأمانيهم >>> الله على الاماني
وفي الطريق غرست الشاحنه والكل نزل اللي يدف واللي يحفر
ما عدا قوقل جا له بظل طلحه وانجضع وقال لا طلعت السياره
أقعدوني من البارح وحنا شاينن فالنا أحس نيطي منمصع من كثر
ما أتكرب بدف هالقرنبع ! حلفت ان الكروه ما تطب يده غير من معاشي
لا كتبت
زيدان : الا على طريا الكروه ليه ما تخلصني النيره اللي سلفتك أياها
قوقل : الله من البلشه وين ادي اطريت الدراهم !!
يا بن الحلال انخلصك انخلصك ما حنا منكرين
طبعا زيدان وقوقل لقوها فرصه يتلهون بالهرج الى ما تطلع السياره
من الغراس
الا والرقيقيص يصعك عليهم : أنتم علامكم يا هالاثنين هذول كل ما حتجناكم
وهي بدت طلايبكم ترا بنزًلكم من السله واحطكم باخر الصندوق
ترى السله ما يركب بها غير العيال النشاط
قوقل : واهدم بيت القاله انا لو مشيت على رجلي من العلا يمديني
واصل تبوك سبقتك انت وسيارتك
الرقيقيص : اقول لا يكثر هرجك انزًلك بهالسبت ما حولك الوالي

وهنا زرط العافيه قوقل ورن الارض وقال :

عجاله عجاله ... وبظهور الخيل أنتجاله



أن حاز المسلسل على رضاكم تابعنا سرد حلقاته


مع تحيات أخوكم أوسكار الهرفي

حضور

اوسكار
عادت ابداعاتك من جديد
لنا كم يوم مغير انفرفر على ها المنتدى بدون نتيجه
والله كنا كدادين خطوط
(بأولك ايه متشوف لي دور عندك يله)
سر والى الامام

بلويه

شكرا لك على هذا الحضور

دمت بخير وعافيه

البلدوزر

أعذرني أن كنت أطلت الغياب لكن ما باليد حيله
مررت بظروف عمل أجبرتني على الأنقطاع
شاكر لك أخي تتبعك لمواضيعي وأبشر لك بدور
بالحلقه الثانيه يسعدك
دمت كما تحب ان تكون أخوك أوسكار الهرفي

افضل جملة :وادي فيه ثميلة ماء يوجد حولها شجر البردي وتحيطه الجبال من جميع
الجهات مختلط صوت رغا الابل مع خوار ونغيط الغنم والبهم ولجة العرب