الرد على القصيدة المهداه من قبل الأخ / عطاالله بن بركة البلوي - سمله الله -

بسم الله ، والصلاة والسلام على رسول الله


أما بعد

صبحتم بالخير / أو مسيتم بالخير يا قبيلة ( بلي )
ومرحبا ومسهلا بالكرام ابناء الكرام

هذه القصيدة رداً على القصيدة المهداه من قبل الأخ الكريم / عطالله بن بركة البلوي
ولشاعر القصيدة أخونا الشاعر / عبدالله بن محمود البلوي
وهذا الرد تشرف بكتابته أخوي الشاعر / عبدالله بن سعود بن شايع المحلفي السهلي
وقد شرفني بنقله مع دهن العود وعبق الورد الطائفي إلى منتداكم العامر



نص قصيدة الرد

بسم الله الرحمن في المبدأ وباقي ما يقال=الواحد الفرد الصمد محيي الديار الممحله
رب(ن) عليم(ن) ماجد(ن) من فوق عرش العز عال=يعلم دبيب النمل فالظلمات واللي يحمله
والحمد لله كلّ ما هب الهوا من عقب مال=غصن(ن) على جال الجنان المورقات المذهله
أمس انتفض فكري وجال البال بعلوم(ن) ثقال=والقلب ما يسلى ولا يهدا من اللي داخله
جاني وأنا جالس على المركى مع العصر اتصال=من صاحب(ن) قرم(ن) عزيز(ن) ما يفوت المرجله
رديت وقلت: العلم يالنادر وهات العلم؟ قال:=حضّر هجوسك واربط حزامك وما عندك قله
قلت: العلوم وقال: جاك العلم من يم الشمال=جتنا الطراقي بالعلوم الطيبات المرسله
قصيدة(ن) تبري من كبود الرجال الاعتلال=يمدح وهو للمدح في تال الزمان وأوله
وقال الرجال تشوش في سود الليالي والعيال=ومزارق العلم النقي طبع(ن) لنا وحنا هله
من بعدها زودت أنا فالنار وادنيت الدلال=ولا يستجم الفكر لين أشرب حداها مهيّله
ومن بعد شرب الكيف عدينا على شمّ الجبال=وازعجت أنا بالصوت انادي واندب الفكر وهله
يا هاجسي لقّح بنات الفكر عامين(ن) حيال=دام المشاعر في ضميري بالبطا مستفحله
وجني بنات الفكر مثل المزن بالعذب الزلال=غربية(ن) تمطر على (ديرة بلي) مستثقله
حيّ القصيد اللي من العذب النقي جاله مجال=جتني هنوف(ن) من عطا الله بالجمال مدللـه
منقية(ن) من ضامر اللي يلحق القول بفعال=من نسل قوم(ن) مجدها فالتاليه والأوله
سقم العدا يضربهم بين القبايل بالمثال =قضاعة اللي مجدها دايم رفيع(ن) منزله
من قبل عصر المصطفى والناس في غي ووبال=تاريخها معروف والتاريخ محد(ن) بدله
ومنهم صحابة خير خلق اللهِ مروّية الصقال=من روس قوم ابليس يوم إن الحروب مجلجله
(بلي) بلى عين العدو وأهل الهوى والانحلال=بنوا لهم بيت الشرف كلّ المراجل تدهله
(بلي) بلى عين الغشيم اليا بداهم باختلال=يا كمّ راس(ن) من شيوخ القوم جا من مفصله
لو أدري إن المدح مع كثر العلوم اللي تقال=لامدح (بلي) ما عشت لين القبر جسمي يدخله
ما دام منهم من يوافينا بعزّ وطيب فال=عطا الله اللي لو يغيب المجد غصب(ن) حصّله
الصاحب اللي خوته تشرى ولو هي بالريال=المال في خوته ما يسوى تراب المزوله
الصاحب اللي خوته مطعومها رايق وحال=يوم إن بعض الناس جزنا عن كلامه وعمله
وجلعود يزهاه المديح السمح محمود الخصال=بحر(ن) رست كل العلوم الطيبات بساحله
وما جاك من عبدالله الجلعود برد(ن) في ظلال=له عادة(ن) فالطيب بين الناس صنعة معمله
قرم(ن) على كل المراجل له مواقيف جلال=عون الرفيق اللي حداه الوقت غصب(ن) وقتله
من لابة(ن) يوم البشر تتبع عراقيب الجمال=والناس في حرب(ن) وكرب(ن) والعلوم مبلبله
تاقف مواقيف الرجال اللي يشيلون الثقال=صواعق(ن) فوق العداة المعتدين مزلزله
لي لابة(ن) يزهى لهم مدح العرب في كل حال=حال(ن) ينومس من يحل المشكلات المعضله
وربعي (محلف) بأمجادهم مثل الجواهر والآل=عقد(ن) من الأمجاد ربي بالمراجل كمَّله
قوم(ن) علت من فضل ربي فوق هامات الطوال=وعَقِّب صبي(ن) ما يمجّد لابته في محفله
جدي (عتيِّق) مثل نجم(ن) لاح في سود الليال=ما به مجال للمراجل غير غصب(ن) ياصله
وقفاتهم تعرف ولا هي من خفيات الفعال=ينطق بها التاريخ والأحداث للي يسأله
وأنا احمد اللي عزنا بالدين دين الاعتدال=يوم المذاهب في قلوب أهل الهوى متأصله
حنا (هل التوحيد) ضد الشرك ودروب الحثال=من جيش أخو نورة معزي والعلوم مسجله
وصلاة ربي عدّ ما نادى المنادي بالهلال=من كلّ عام(ن) بالشهور الفايته والمقبله
وعداد ما ينشى من المنشى مداهيم الخيال=وعداد ما كبّر مكبر للمجيد وهلله
على نبيّ(ن) (ينشر التوحيد) وحروبه سجال=بينه وبين الكفر لين الله نصَره وجَمّله
محمد الهادي كريم الوجه ذكره لا يزال=بين البرايا مثل نجم(ن) في عيوني ما اجمله

وسلامتكم يالنشاما الغانمين


أخوكم الناقل


مساعد بن سعود بن شايع المحلفي السهلي

هلا وغلا ومسهلا بالاجاويد


حياك الله وبياك في منتديات قبيلة بلي على الشبكة العنكبوتيه


صح الله لسان الشاعر الجزل مساعد بن سعود السهلي


ونقوله جمل الله حالك يالجزل على هالقصيدة وماعليكم زود


ويعلم الله ان الحروف تخجل امامكم خوفاً لا توفيكم حقكم

صح لسانك ياعبدالله بن سعود السهلي

قصيدة جزله من شاعر جزل

وتستاهل قبيلة بلي

وبيض الله وجهك يا مساعد على النقل الرائع

اتمنى من الاخوان القائمين على هذا المنتدى بتنسيق القصيدة

تحياتي

مساعد السهلي

أهلاً وسهلاً وحياكــ الله بمنتدى قبيلة بلي


سعدنا بتواجدكــ بيننا


وسلمت وبيض الله وجهك على نقل هذه الرائعه والتي غير مستغربه من قبيلة عرف عنهم الكرم والطيب وأهلٍ الشعر

والف صح لسان الشاعر / عبدالله بن سعود بن شايع المحلفي السهلي


وياهلا بكــ

صح لسان عبدالله بن سعود .,., وبيض الله وجهه .,., وسلمت يمينك يامساعد .,., ذخر وفخر يامطانيخ الرجال .,.,

>قبيلة ن من ولد عامر من مضر وامش وتعال
على بني عم النبي نعم النسب والمنزله<
ولاعدمناكم يالأجاويد
وكفويالسهول وعليكم بياض الوجه جميع.

بيض الله وجيهكم يالسهول ورفع الله قدركم في عليين .. لكم تقديرنا ومحبتنا ...
نواف البلويـ