الزل

الزل
على زل ٍ من الماضي عليه من السنين الفانيات الباليه بصمات=جلست اسأل من اعجابي عن اللي فات وارسم صورته بالعين واسلابه
سألته وش بقى يا زل من عمرك أشوفك بالسنين المدبرات اشتات= أشوفك بالزمن عابر سبيل ٍ طال دربه والقدم زلت من اعتابه
تنهد واشتكى لي قال يالصاحب لك الله لي على مر الزمان إثبات= ينابيعٍ من الأول على التالي مع الأيام للأجيال منسابه
أنا رمز ٍ عليه من العلوم الطيبات الوافيه طول الزمن زافات = مثل زل الربيع ليا اختلط صبح المطر لون الزهر والورد باعشابه
أنا روعه من الماضي على شفاه السنين ارسم لها الأفراح والبسمات= أنا اليشموم والكادي أنا العنبر أنا الأمجاد والتاريخ واطيابه
زخاريفه تجر القلب جر السيل للأغصان من وسط الحشا بسكات= ثمين اثمن من الشيراز والتركي وزل الصين لو جابوه وش جابه
تجمّل بالنقوش اللي تجمّلنا لها بكف الزمن طول البقى ومضات= لها عند العرب لوهي مضت واقفت لها مقدار ٍ وقيمه وطلابه
وبه سيوف السنين الماضيه والمقبله وامجاد وقت ٍ بالمعالي فات= تجمل وقتنا الماضي وحاضرنا كما النخله على السيفين جذابه
عن حدود الوطن واهل الوطن فيها نرد المعتدين ونرفع الهامات= فداه الروح له نحيا ونموت ولا نخانا ننتخي ونقبل ترابه
تحت راية زعيم العُرب عبدالله سديد الراي تتبع رايه السادات = إلى منّه دعانا نستجيب من الملا كل الولا كسبه ويحضابه
مراهيف ٍ ليا سِلّت لها تخضع ولو طالت كبار القوم في لحظات =لها في معركة خيبر وبدر ومعركة حطين واجنادين سلابه
تسمى باسمها سيف الله المسلول خالد وادرك الغايات والطولات=لك الله يابطل كل الأعادي بالمعارك منك مخذوله ومرتابه
وبه عُكْف الشَلافي للمهازيم المقافي توثق الطعنات والضربات=تذل الطامع الطاغي بها يدحر عدو الدين والإيمان واسبابه
والأرماح الطواعن بالمعارك والملاقى تقضي الآمال والهقوات=من رجال ٍ تطول الطايلات ولاتهاب ومن حياض الموت شرابه
مواقفهم لنا فيها مع ايام ٍ مضت والمقبله وايامنا وقفات= شموس ٍ نور ذكراها يشرفنا ويسعدنا ونفخر به ونحيابه
وبه صفر الدلال تجمّل الزل الثمين رموز لأهل الطيب والعادات= رموز ٍ للضيافه والكرم عند العرب في صفحة التاريخ وكتابه
وبه بيض الصياني للمكارم جمّلت زل الفخر أثمن من الدانات= والأحجار الكريمه جمّلت لونه وزاد الوان فوق الوان خلابه
وبه الجُب العميق اسمع صدى صوتٍ يدوي به ومرات اسمعه صيحات= زَلال الماء وطياته من الأعماق يندب وافي الأزمان واصحابه
ومجرّات السواني صورت ٍ بالزل زادت عندها واكتظّت العبرات= تذكِرنا وتربطنا بماضينا المجيد نعيش لحظة شوق بغيابه
وبه بيت الشعر لوحه من الماضي لها بقلوبنا لوهي مضت هيبات= وقف صامد شموخه يرفعه طول الدهر وتشده الأوتاد واطنابه
وجدران ٍ من الطين الحمر تحكي لي الآلام الآمال والآهات= تقول الوقت غيرني وله سطوه تجر الآه والونات منصابه
ملامح طفل في حضن الألم والهم والأحزان والحسرات والويلات= على مهده فقد روح ٍ تحبه من بَعَدها عاف نومه ماتهنابه
ثمين ٍ زل ماضينا يمتعنا ونسلابه على المطلوب والمشهات= جمال الغيد يعطيه الوقار ويلبسه تاج المعزّه ويتحلابه
ألا ياصاحبي ياللي تقول انه زمان ٍ فات واقفى آقول لك هيهات= على سجع الحمام الراعبي اسلى ويطربني ولو فاتتني اسرابه
مبارك خليف البلوي

مبارك خليف البلوي
حايل

مبارك خليف البلوي (عـــزام)
حضور قوي بقصيدة رائعة..... اهلا بالشعر الجميل واسياده

السلام عليكم ورحمة الله وبركاته
صح لسانك يا ابو وجدان وحياك الله بين اخوانك
قصيده جزله استطعت فيها تصوير روعة الماضي نرجوا استمرار قصائدك ويا هلا فيك

[blink]مبارك[/blink]
حياك الله في منتدى بلي

وصــــــح لســــــــانكـ

على القصيده الرائعـــه

مبارك خليف البلوي (عـــزام)

حياك الله في منتداك

وصح لسانك

مبارك خليف البلوي

ياهــــلا بك ويا مـــــرحبا مليون

شرفت المنتدى حضر الشعر حضر الابد اع

وحضر شاعر عملاق يشرفنا وجوده بيننا

قصيده جزله وكلمات واسلوب اكبر من ان اقيمه فاانا تلميذك ايه الاستاذ المبدع

بــــدر سالم الالبد

دمت بخير