ياوجد حالي

(اولى مشاركاتي في منتدى الشعر الشعبي اتمنى تنال إعجابكم)
هم تربع بالصدر وإستحله
اركى على حدب الضلوع يحطبها
عيا يفارق ثابتٍ في محله
وإن غادره زار العيون وهدبها
مع الجسد يمشي شبيهاًلضله
حتى الشرايين النديه شربها
وليا كسرت بحد الأفراح دله
قبل أشرب الفنجال قام وسكبها
مع كل هذا عاذلي مافطن له
والروح تخفي مابها عن عربها
أضحك واداري بالحشا كل عله
والز روحي تبتسم وأغصبها
أموت ماأشكي علتي غير لله
سبحانه اللي عالماً وش سببها
ياوجد حالي لاقبلت مستهله
وسمية من غرب يقدح لهبها
دفاق ماها بالفيافي تشله
تحدر بقيعانها من شعبها
معها الحشا مقفي وراها تتله
وخيالها شاق العيون وجذبها
مع خوة اللي كل دربٍ يدله
وعمامته بأعلى جبينه عصبها
يمشي بمقياس النجم والاهله
ماهو بجوال المواقع حسبها
بين الجبال وبالتلاع المضله
جلسة رجال خاليه من نشبها
كل الخواطر رايقه مسفهله
وصدورهم وسع الديار ورحبها
نطبخ من البن الجديد ونسله
وليا فهقناها قدعنا رطبها
هاذا علاج الروح دقه وجله
وهاذي مناة النفس وآخر طربها

#وازن أبو شامه

أموت ماأشكي علتي غير لله
سبحانه اللي عالماً وش سببها
قصيده في قمة الرووعه
سلمك الله

سلمت أخوي مسند الروعة مرورك وشهادتك اعتز بها

لك مني أعذب وأطيب تحية

حضور جميل نتمنى لك التوفيق

قصيدةجميلة ورائعةشكرا

يعطيك العافية وبداية مميزة..............