%قصيده*&*% الـــــــــــــــــحـــــــــــــــلم %*&*للشاعر% (( حامد زيد ))

الحلم


بوقت من البطا وبليل تتراقص شياطينه
بعد شفت الضيا ينزع من ثياب المسا ثلثين

تحايلت المنام اللي مثل بيتك تمرينه
وأنا اللي من تفارقنا وأنا ما غمضت لي عين

غريبة كل حلم برقادي تزورينه
والأغرب كيف احلم الحلم وارجع واحلمه بعدين؟

!قبل يومين شفتك بالمنام .. وقمت من حينه
ونمت امس ، ورجع نفس المنام اللي قبل يومين

أنا اللي قبل اسافر شلت قلبي من شرايينه
تركته في يدك مثل الأمانة ، واحفظيها زين

ترى حفظ الأمانة دين .. مجبورة تردينه
!أجل مافي أحد قالك حفظ الأمانة دين؟

مرد المقفي بيلفي .. ويستوفي ، وتوفينه
بعد ليله ، ثلاث ، أربعة ، عشرة ، شهر ، شهرين

إذا انتي ، ما انتي بقد الكلام اللي تقولينه
حرام استأمنك حاجه ، واذا جيت اطلبك تنسين

!تخونين وتبين ارضى ! وأحد يرضى تخونينه
أنا لاجيت أخونك ، مع حبيبة ثانية ، ترضين ؟

من أول ما رجعت من السفر ما شفت لك بينه؟
وأنا اللي كنت احسبك قبل لا ادوس أرض المطار تجين

تكونين أنتي أول شخص عيني تحتظن عينه
وكنت اتخيلك من زود فرحة رجعتي .. تبكين

واشوف بدمعتك حكيك .. واعرفه قبل لا تحكينه
واجيب لك أحلى من اللي بتحكينه ، واتركك تحكين

تقولين : الوطن نور .. واقول بنور مضوينه
تقولي لي : غديت أحلى ، وأقول : عيونك الحلوين

كلام نام بشفاهك .. وخفتي لا تصحينه
ذخرتيه لغرام اللي ينام .. ويتركك تصحين

تغانمتي غيابي .. لين رجحتي موازينه
تعلم من يدك لمس الكفوف وعلمك تجفين

وليتك لاقيه به شي .. فيني ما تلاقينه
مهو بغرور .. لكن خابرك مالك أمل تلقين

تغافلك بغلا .. ولا الحلا ما هو بمن زينه
تزينه الصور .. بس الصحيح ابن الحلال زوين

وأنا ماني بناقص عنه يوم انك تبدينه
نصيبي .. هو نصيبي لو يسددها من الصوبين

قنوع بمظهري .. والسم ما يذبح ثعابينه
على قول المثل : ماني حلو .. لكن ماني بشين

إذا اهداك الزهر مرة فأنا اهديتك بساتينه
وإذا الهاك بفرح ليلة .. فأنا تهت لبكاك سنين

واذا استضعفتك املاكه .. وشتتك ملايينه
أنا حتى فتات الخبز اقسمها معك نصين

طموحي ، بس اجي وأظفر بشي تستحقينه
تدينته .. تسلفته .. سرقته .. مو مهم منين



كأني من كثر ما ارضى بكل اللي تمنينه
لو انك تطلبين الله .. يعنيني ، بقول آمين

أنا مالعب على الحبلين ، وقت الطيش وسنينه
تبين الحين يوم اني كبرت العب على الحبلين ؟

ترى عند البدو بالذات عيب اللي تسوينه
حلاتك لا عشقتيني .. تعشقيني ليوم الدين

غرام نسكن ضلوعه .. حشيمه من مجانينه
جفا يجمع معزتنا .. ولا عشق يذل اثنين

كثار اللي تحدوني وقالوا لي : تحبينه
أمانه .. لا تخليني صغير بعينهم تكفين

لاني كل ما قالوا : تخون ، اقول : مسكينة
عليك الله وأمانه .. علميهم من هو المسكين

أنا خايف ليا طاح الجمل تكثر سكاكينة
وأنا ما عادت ضلوعي تحمل طعنة السكين

مثل ما قالوا المكتوب واضح من عناوينه
لو ارحل منك للغربة باسافر من ظلامك وين ؟


كفاية .. كل حلم يمر في رقادي تزورينه
كفاية .. من تفارقنا .. وأنا ما غمضت لي عين

قبل يومين شفتك بالمنام وقمت من حينه
ونمت امس ، ورجع نفس المنام اللي قبل يومين






أهدء لكل من يقرأ هذي القصيدة تحياتي لكم


الف شكر لكم و سموح لي علا القصور يا الغالين

طلال البلوي
/
سلمت يمينك .. على هذا الاختيار الرائع للشاعر لرائع حامد زيد ..
ودمت بود
,
وننتظر المزيد منك
.

اخوي طلال البلوي يعطيك العافيه علىآ نقلك ,

قصيدهـ اكثر من رائعه

تقبل تحياتي ودمت بود