حبي لشوف البر مجتاز حده

السلام عليكم ورحمة الله وبركاته

كل عام وانتم بخير

ابيات مرسلة الى الشاعر /حمود سلمان السميري

بمناسبة قرب العيد والشوق الى طلعة الديرة

وهذه الأبيات اول حرف من صدر البيت واول حرف من عجزالبيت تنازلي تحمل اسم صاحبها
.................................................. ......

فنجال دله مع صديق(ن)توده =في ديرة(ن)قفراء على حاجر السيل
اجمل من التسويق باسواق جده=اللي تفتح سوقها لآخر الليل
لا لاح برق البر جهزت عده=للبر اجهز عدتي والمعاميل
حبي لشوف البر مجتاز حده= حب ابدوي لشبة النار والهيل
عساه في غيث(ن)يجي له برده=على مرابيعه تهل المخاييل
ان كان بك ياحمودللبر شده=انا ترى جاهز ومشتاق بالحيل
ياحمود مابه عن مرافقك صده= ياشيخ لا عدو صعول الرجاجيل
ضحكتك في وجه المسير تسده=ضحكة غلا ورثتها جيل عن جيل
المجلس انته فيه عطره ونده= انته كذا ماتعشق القال والقيل
لك موقف(ن)بالخير والشر ضده=لك موهبة في حل عقد المشاكيل
سجيتك ماهي بهاته ووده= سجيتك طبع النشاما الحلاحيل
من يزرع المعروف خيره يجده=ماخاب من نقى بذور المحاصيل
ياحمود لك بالقلب عز وموده=ياحمود لك مقدار اكبر من النيل
رب الملا يحفظك من كل لده= ربي عليم الخافيات المقابيل
ياحمود جاك القول ياحمود رده=ياحمود قول لصاحبك جهز الشيل

__________________