مع الشعار اباخذ دور

إخواني الأعزاء جرت هذه المحاوره بيني وبين الأخ الشاعر الكبير(الماهر)في منتدى العصابين الرسمي وحبيت أنقلها لكم أتمنى أن تحوز على رضاكم

أبوتركي

سلام الله بردية وفـــا منها يشــــــــــع النور= عدد وبل المزون اللي لها بارق ورعـــادي

حضرت الملعبه شاعر مع الشعار اباخذدور= ومن يبغى يخاويني يجي في ساحة المادي

الماهر

الايامرحبا في شاعراً بالمنتدى مشهور= عسى عقب الرعد والبرق نصبح جونا هادي

تراك انت المبدى كانها بالدور يادكتور=ل لاجيت بساحة النادي يصير اللعب وقادي

أبوتركي

عسى فيك البقا ياشاعر(ن) من شوفته مسرور=على شوفـه بعثنا فالبلد مليون نشـــــادي

تقوله وانت شاعر فالملاعب ماعليك قصـــور= لاجيت بساحة الملعاب حبل العلم ينقادي

الماهر

عسانــــا لاحضرنا يابوتركي نمتع الجمهور= ولايخفـــاك عنواني مقري روضة النـــــادي

أقول الحق دون مجامله ما اشهد شهادة زور= ولو ما انصفت بامثالي يقولون العرب غادي

أبوتركي

بفضل الله لقيت بعد غيبه فوق خمس شهور= أثرك اللي يصبح في بلاد ويمسي بلادي

أنا مااقول فيك قصــــــور لكن قدم الميسور = وخل الحكم ما بيني وبينك عند الاجوادي

الماهر

أبوتركي يباني في مكاني دايم(ن) مسمور= ولاهمي بها الدنيا ياكود الشرب والزادي

خطرته قام يسأل ما تيسر كني المخطور= سلوم ياجماعه تختلف عن سلم الاجدادي

أبوتركي

أنا ما اقــــول خلك في مكانك دايم(ن) محشور = ولكن بين المنزال لاجل تجيك روادي

سلومي وافيه وصلك صحن فيه الشحم مزبور= بعدها ودي اكيفك من دله وبـــــــرادي

الماهر

مكاني يابو تركــــي لابغيته باول الطابور= ورواده يعرفونه يجـــــــون اجموع وافرادي

ولكن انقلب راسك بعد ذيك النمور العور= حبايب صاحبك في وادي(ن) والكل في وادي

أبو تركي

على كيفك تميدح وانت تعطي للوعد وتبـــور = تواعدنــــي بذاالحجـــــه ولاتوفـــي لميعادي

انا راسي سليم ولا ابدي الهرجه بدون شعور = ولا اجيب الهروج اللي بدون اثبات واسنادي

الماهر

لك الله ما اتميدح وانت لو غلطتني معذــــــور= مواعيـــــدي مرتبها على هجري وميلادي

أنا مقصودي اللي ضيعوها والرجال احضور= عطاهـــــم من شقا عمره لكن المد ما فادي

أبوتركي

تعرف ان الوعد مثل العهد واللي وعد مجبور= يوفي بالوعد وليا اعتذر قلنا الوعد فادي

ترى ما كل زارع زرع يحصد ثمرة المبذور = ولونه ما حصدها يعتبرها كبوة جوادي

الماهر

عطيتك علمي الصامل على المسحوب والمجرور = لكن أذنيك طرشا ما تجيب اللي لك ينادي

عليه ينقي البـــــذره ويصلح بالاراض البــــور= وانا اضمن ناتجه يعجب ويطري كل حصادي

أبوتركي

علومك ما بها صمله ولاجت في سند ممهور= تشابه نشرة الصحاف حزة حرب بغدادي

علوم الغيب بامر الواحد اللي يعلم المستـــور= تحرص لاتعديك السوالف منهج الهادي

الماهر

اصرح لك والمح لك وتنهشني كما المسعور= تبي يفـــــــرح بنا يالقـــرم حسادك وحسادي

عليك انك تركد لايزل الخيل بالمحظــــــور= ترى توك صغير واحسبك مثل اصغر اولادي

أبوتركي

عليك الله وامانه لايجيك الخوف يالمذعور= وحسادك وحسادي تموت بغش الاكبادي

تركد لايزل بك القدم يالشاعر المغـــــرور= قبل نشعبك في شعبان ونجمد ك بجمـادي

الماهر

عوافي كان ذعري من عديم المعرفه والشور= مااعرف الذل واحسب كل مصداري وميرادي

غروري من شئوني والتجني حجة المدمـــور= شبعت من الفخر ما كني الا بساحــــــة جهادي

أبوتركي

تحــــاول تخفي الذلــــه ولكن القدم معثـــــــــور = لمحتك وانت تمشي مع طريق الناس متحادي

غرورك من شئونك ياعميلي والصقور صقور = تبا تاكــــل وتشبع لكن تو القرص ما جـــــادي

الماهر

انا رجلي تدق القاع ما طمر سور واترك سور= واحشم اصحابي الغالين لو كانوا من اضدادي

وكاد انك من اللي يشتـــــوون الحر بالتنـــــور= ترى المسيود مهمـــا يجتهد بالناس ما ســـادي

أبوتركي

خبطت الضلع في رجلك وعود عظمها مكســــــور= وجانا علمها في نشرة التلفاز والـــــرادي

اعرف الحر الاشقر من مطيره واعرف العصفور = وكم واحد يريد الصيد لكن صار منصادي

الماهر

على هونك وقف دونك تراك بحضرتي مكبور= ترى التكسير شغل اللي على النكبات معتادي

عجايب كيف تعرفهن وتفرقهن وهن طيـــــور= وصياد الفهود يصـــاد لوكان ابن شـــــــدادي

إنتهت المحاوره وكان بودي أنها إستمرت ولكن الجايات أكثر إن شاء الله