* (خاص ) جميع محاورات عايد السميري مع نخبة شعراء المحاوره

( 17 )


الشاعر / العاصــــــــــم و عايد السميري

محاوره بتاريخ 7 ـــ 1 ــــ 2006

.
.

العاصم

سلام الله على أهل الطيب وأهل الطيب فالمرقاب=سـلامٍ مـن هجـوسٍ فاللقـا نيرانهـا حـيـه
ياعايد قمّ تقـدم وأنتبـه حـذرا تصـك البـاب=ترى بينـي وبينـك سالفـه ماهـي بـمنسيـه

عايد السميري

هلا يامرحبا ترحيبةٍ تكمل زكـاة انصـاب=تكمل فاللزوم وتفرق الحسنه عـن السيـه
على صوت المنادي جاك عايد يفتل الاشناب=تحرك لك من احدود الجزيـره بالشماليـه

العاصم

يدوم إبك البقا خابرك شاعر مايجيك (إ)عتاب=لكـنّ الليلـه الليلـه نبـى نجـومٍ سماويـه
على وضح النقا ذيبٍ على دربه يحد النـاب=تمشّى في جميع ديارها مـن صافـي النيـه

عايد السميري

على حطت يمينك ياوسيـع العـرف لا ترتـاب= وناظـر فالنجـوم العاليـه ثـم التفـت ليـه
ترى اللي في يمينه سيف مايرجع على المشعاب=وراع السيف لا نادى المنـادي ينطـح الهيـه

( 18 )


محاوره مع بتاريخ 23 / 6 / 2006 مع الشاعر الكبير محمد الروقي العتيبي ( إبن الباديه )

محمد الروقي

ياهلابك يالسميري في ربوع الدار الاول=وين غيبتك الطويله ياعسى بالامر خيره
لك ثلاث اشهور ياعايد يقولون امتجول=هات علمك يالسمير ي هات منضوح السريرة

عايد السميري

البقاء بك يامحمد والمطر بالقاع حول = والسماء فوق الملاء والارض كوره مستديره
وانت صادق لي سنه ماغير اناظر وامتهول = وانت يابن الباديه ماغير من ديره لديره

محمد الروقي

خابر ٍ علمك واخبره ياعميلي من منول= مير رحت وراح غيرك مع صديق نستشيره
ابدويك بس يطلع ون طلع غنا وتحول=وانت مكسب يالسميري لا تهس عن العشيرة

عايد السميري

ماعلا الدنياء قرار ولو نطول مايطول = خـــير من لن غاب صاحبه العزيز يقل خيره
ادري انك محتزم بالمعرفه مانت أمتسول = وانت ماتجهل بمن في محزمه نار وذخيره

محمد الروقي

كيف ابا اجهل بس ابا اسمع لا تقول الي المقول=مابها عيب ان تظايق جار من شدة قصيره
السفير عن البلد في ديرة الغربة مخول= وانت ماقلنابك الا خير والدعوا صغيرة

عايد السميري

ياجماعة خير صاحبنا على ليلاه موول = يستشك من الصفير ونوب يجفل من صفيره
يامحمد ماكــذب من قال هالروقي مـــهول = نوب في دوحة قطر واحيان في شبه الجزيره

محمد الروقي

ماعليك الزود ياشيخ بما قلت امتمول=بس اضنك معك علم ناقله شيخ العميره
الدعاوي ماتجي بالهرج يالراس المزول= مير هات العلم عجل قصت الضايق مثيره

( 19 )

محاوره مع الشاعر الكبير ( المـــــاهر ) وكانت بتاريخ 11 ــــ 9 ـــ 2008

عايد السميري

يالماهر اقرب جاي اباخذ معك طاروقٍ جديد=لي كم شهر وانا اتعين فيك والمخرج ملي
يامرحبا بك قلتها لك واسمع العلـم الأكيـد=اسلم وسلم لي على بناخيك والمخرج ملي

الماهر

فـيك البقاء وانا تـراي اقـريباً ماني بعيد = وانكان ترعاني فانا آراعيك والمخرج ملي
هات العلوم اللي بصدرك لاتعيد ولا تزيد = بعض البنيخي وابله يوذيك والمخرج ملـي

عايد السميري

انا ادري إنك رجل بالمجلس تفيد وتستفيـد=لكن تقل مـاودك احاكيـك والمخـرج ملـي
الطرقي اللي جاء يهابد يقرض اطراف الجريد=عن ردتك له ربي يعافيـك والمخـرج ملـي

الماهر

حنا نشبنا وابتلشنا بالـمصرقـع والرشـيد= قبـله هـجدنا واحدن يوحيك والمخرج ملي
واللي يهابد يالسميري لاتحسب انه وحيد =عندي وعندك خير ماوصيك والمخرج ملي

عايد السميري

ركز معي وأسمع كلامي زين ياعبـد المجيـد=واركد وحقق رميت البلجيك والمخـرج ملـي
انا ادري ان الأرض طول وعرض مليانه هريد=ناسٍ تحسب الشعر ببس وكيك والمخرج ملـي

الماهر

الـحق مـايجزع منـه عـبد المـجيد ولا سـعيد=يـارامي البـلجيك وش يرضـيك والمـخرج مـلي
ارفق على عمرك تراك اقبال زيزوم القصيد=واللي يحسب الشعر كيك ايجيك والمخرج ملي

عايد السميري

مايجزع من الحق غير الناقص الـلاش البليـد=تسلم عسى رب الملا يغنيـك والمخـرج ملـي
قال المثل ياصاحبي مـال الحديـد الا الحديـد=وان كان جاء نسحب عليه الشيك والمخرج ملي

الماهر

الحق واضح للملا مرسل ولا عنده رصيد=هاذي حقيقه مـابها تـشـكيك والمخرج ملي
مـاهوب لامـني ولانـي مـنه جـعلـه مـايفيد=بكره تجيك اعلوم من ينبيك والمخرج ملي

عايد السميري

المفلس اللي يختبط من حيد يطمر فوق حيد=يحسب علوم الربع تلفريك والمخرج ملـي
ياكنترول ارجوك حوّل لا تزيـد ولا تعيـد=الحرب لا زم خطه وتكتيك والمخرج ملـي

المــــــــاهر

المفلس ادواه اخصره لوهو على قومه عقيد=واصغر صبي ابدارنا يشفيك والمخرج ملي
كـلــــــن يـريـد الـطـيـبـه والله يـفـعـل مـايـريـد=والـحـرب لادارت تبي تفنيك والمخرج ملي

عـــايد الــــسميري

صدقت ياوجه السعد وفراق بعض الناس عيـد=وشمس الضحى ماهي كما الاتريك والمخرج ملي
الطيبـه نتعـب لهـا والثانيـه عنهـا نحيـد=والفرق واضح بين ذيك وذيك والمخـرج ملـي

المــــــــاهر

الصدق يبقى بيني وبينك عسى عمرك مديد =ومقاشرة بعض العرب ترديك والمخرج ملي
اتعب قدر ماتسـتطيع من الوريد الى الوريد=شـربـك بـغـير ايديك مايرويك والمخرج ملي

( 20 )


محاوره عام 2005 مــــــــع الشاعره : وعد العبدالله
والشاعره ( وعد ) شاعره متمكنه ومبدعه بالقصيد والمحاوره
وكان هذا الطاروق في احد المنتديات وهو عباره عن تحدي للشعراء وشرارة ( غضب ) ولكن ما أحد رد الى ان وصلت الشاعر وعد وردت نيابه عنهم

وكانت هذه النتيجه وهذا الطاروق
_________________

عايد السميري

من هو اللي وقفته تحسب ومحسوبن كلامه = ودي أعلمه في حلمن حلمته قبل عامي
شفت لي براق وارعود ارعدت على تهامه = زلزلت ذيك الجبال وبعثرت مال التهامي

وعد العبد الله

حلمك اللي قبل عامٍ في نهار او في ظلامه = قول خير يقوله الله قدرته تحيي العظامي
لا تقول حلوم حذرا كان ودك بالسلامه = ازهل الطاري لربك لا تنشد وش علامي

عايد السميري

ياهلا يامرحبا بأسمٍ فرض غصب أحترامه =يوم طل بنوره المشرق جلا كل الظلامي
ياوعد حلمي يطير كل رجلٍ من منامه = ماقدرت أصبر ولاكن لك تحيه واحترامي

وعد العبدالله

المهلي مايولي ياكبيرٍ في مقامه = والنجوم تشوف نورك ضي من بين الغمامي
يعجز الحرف بحضورك يا بدر وافي تمامه = وان لقيت الوعد حاضر لا تزايد في ملامي

عايد السميري

ياوعد دام ان مابه فارسٍ تقوا عظامه = وشفت فريس الجزيره اقفو سوات النعامي
اشهد ان تستاهلين الثوب الأبيض والعمامه = واشهد ان بماقفك ماتاقف كبار الأسامي

وعد العبدالله

ان سقاك الوقت دمعه لا تلومه وش علامه = وان غدر بك من توده مايفيد الأنتقامي

( 21 )


طاروق مع الشاعر الكبير / أحمد عايد البلوي

15 ــ 5 ـــ 2006

عايد السميري

نادو لي ( أحمد عايد) وقولو له البارق سـرى=والعلم ما بينه وبيني واسمع العلـم أسمعـه
وادي حنيفه قالو إنه سـال فـي واد القـرى=هي كيف صارت يالبويني وأسمع العلم اسمعه

احمد عايد

نادو لي" طوالي كذا .. هو ناسي ولا ما درى= تحيـةٍ للمسلمينـي واسمـع العلـم إسمـعـه
ما مثلها لا صارت العربان فالخيـر أخشـرى=ماتشوف مرقاب القريني واسمع العلم إسمعـه

عايد السميري

الغايب إناديه .. والطاري على بالـي طـرى= أرحب مدامك شوف عيني واسمع العلم أسمعه
اليا أختلط خيرٍ بخيـر وخالـط العـز الـزرى=الذيب جاك مع الحصيني وأسمع العلم أسمعه

احمد عايد

شفتك وأغض الطرف وأمسَح من خيالي ما جرى=فيك البقـى لا تبتلينـي وإسمـع العلـم إسمعـه
المسأله ماهي كـذا .. المسألـه جـرح وبـرى=وتركه هالأمر بيدينـي وإسمـع العلـم إسمعـه

عايد السميري

أرفع نظرك الملح ثار وكل رجـل ومايـرى=وانا أعرفك رجلٍ فطيني وأسمع العلم اسمعه
ياسيدي / نص العرب ماذاق لـذات الكـرى=وانته مسريها هجيني وأسمع العلم أسمعـه

.

.

( 22 )

عايد السميري

بعد شفت القصيّر قلت مرحـب يالله تحييـه=على الطيب وعلى جزل المعاني.. والفلك دوار
يضيقن الصدور ولا يضيق الكون باللي فيـه=ولكن لا تتقا العمـر فانـي .. والفلـك دوار

القصير

عسى فيك البقا ياشاعرن عند العرب طاريه=على صم الحجر شد المباني والفلـك دوار
يضيقن الصدور إن راحت الدنيا على ما فيه=وانا حاضر ليا الصاحب دعاني والفلك دوار

عايد السميري

تعبنا يالقصيّر والأوادم بيـن ليـت / وليـه=مع أحداث الزمان المقلبانـي والفلـك دوار
ترى من لا يعرف الحر الأشقر محرياً يشويه=حقيقه : بعدها به علم ثانـي والفلـك دوار

القصير

ترى بعض الأوادم لو عطيته كل مايبغيه=تنكر قال عايد ما عطاني والفلـك دوار
أكيد الحر الأشقر ما يعرفه غيرمن يقنيه=حقيقه:بعدها ينطق لساني والفلـك دوار

عايد السميري

احد عاقل يميز في حلول الفرض ويصليه=وجاهل عشره تعود ثماني والفلـك دوار
بعد ذيك الرساله سو كل اللي تبا تسويه=عرفتك زين يالحر العماني والفلـك دوار

القصير

احد عاقل ليا منه عرف له سر مايبديـه=واحد جاهل يبيحه مكلماني والفلـك دوار
بعد ذيك الرساله من يجي في دربنا نرميه=ولا ياخذ معي خمسه ثواني والفلك دوار

عايد السميري

صديقي لا تحسوس لين تكشف سر أنا مخفيه=توقـع يافـلان ابـن فلانـي والفلـك دوار
انا داري بك إنك لو رميت الضلع ماتخطيـه=تصيد الشارده والليـل دانـي والفـك دوار

القصير

صديقك ماتحسوس يعرف ان الخال وابناخيه=مواقفهم سوى والعلم بانـي والفلـك دوار
اشوف السيل يوم انه تحدر ماج عن واديه=عسى ربي يخارج يوم جاني والفلـك دوار

عايد السميري

اجل مد اليمين وكل علمٍ يرجـع لراعيـه=وأنا والله لعديها الطمانـي والفلـك دوار
لا تستغرب مادام السيل حدر والرعد قافيه =يبا يظفي على كل المحاني والفلـك دوار

القصير

تقول ان الخبر يمديه و أنا اقول ما يمديه=وصارالعلم من شانك وشاني والفلك دوار
لا تستغرب مادام السيل حدروالبحر يغديه=غدى وسط البحروالطعم شاني والفلك دوار

عايد السميري

ياشيخ الله يبارك فيك هات العلم لا توديه=قبل يدري بها كوفي عناني والفلـك دوار
ياشين المهره اللي تطمر وتزقح بلا توجيه=وراعيها مفلـت بالعنانـي والفلـك دوار

القصير

مضى كوفي وجاغيره ومن جاه الخبر ينفيه=كلام الصدق ماهو ليل داني والفلـك دوار
و لا ياشين حظ اللي طعام اثنين ما يكفيـه=يجيه اللوم من قاصي وداني والفلـك دوار

28 / 8 / 1429 هــ