الى أخي الذي لم تلده أمي...( ناصر الجبيل)

صاحبي يسعد صباحك عد ماهبت نسايم=وعد ماترزم رعود وعد ماهلت سحابه
مزنةٍ غرا تباهي ببرديتها غمايم=أرتكت باقصى الشعيب وسيلت عالي هضابه
ثم فيض للخمايل واصطفق طامي وزايم=حط حره في جفافاً كم تلذذ في عذابه
واعشبت ذيك الفياض وغردت ورق الحمايم=فوق ذاك الروض غنت هايمه عشق وصبابه
روضةٍ خضرا نديه جوها سحري وغايم=ازهر النوار فيها والنفل عطره شذا به
صاحبي والشوق يمك هزني صاحي ونايم=ذكرياتك..والقصايد..والمواقف..والنجابه
المسافه نختصرها في قويات العزايم=والنوى نقطع دروبه والسفر.. لا.. مانهابه
جيت والغيت الفوارق ثم حطيت الدعايم=صرت اعز من العزيز واقرب من اقرب قرابه
دون شرواك وجنابك صرت عن ملفاه شايم=مالقيت اللي يسلي واعتزي حضرة جنابه
مثلك الايام شحت والزمن يافلان صايم=قلتها حق وحقيقه مابها شك وغرابه
ماكسبنا في زمنا لاتجارات وغنايم=غيرك.. وباقي علومه كلها هم ورتابه
اشتريت العشره اللي دونها ماجيت سايم=في حراج خبول ولا في دكاكين القصابه
فدوتك كل الرخوم وماتبعهم من هلايم=تكرم بطيبك عليهم والموده واللبابه
انت قدوه للشهامه مايردك قول لايم=بالبحر ترمي جميل ولاتأثر من عتابه
الوفا لاجله وفيت وصرت به مغرم وهايم=والجحود انكرت دربه ثم طول باغترابه
الوصل عندك شريعه والجفا عندك جرايم=حافظاً درساً موثق بالقرايه والكتابه
قلتها وانا بعيد وخاطري عمساً وضايم=والطعون السرمديه زادت أصرار وصلابه
قلتها والجرح نازف لو ربطناه بعمايم=مايفيد الكي فيه ولاتطببه الطبابه
قلتها والصبر عندي بالثريا والنعايم=خابراً دربه وعندي لأسئلة وقتي أجابه
والجروح الموسميه للوجع سوت ولايم=واعزفت ناي المواجع وقطعت قوس الربابه
عاصيه ماروضتها لادروس ولاشتايم=عاثت بروحي فساد وكنها شلة نهابه
والخفوق اللي توقد وسط تنوره هشايم=صاح مره.. طاح مره.. واحترق محدن درابه
اعتذر لك يارفيقي ماشتكي عندك ظلايم=باح سدي وانفجرت وهاجسي شدت ركابه
اسرج حروف القصيد وجاك من صف القوايم =شايلاً شوقه وهمه مع عذابه واغترابه
ياعسى عمرك طويل وياعسى خاطرك دايم=منشرح منساح باله لاهموم ولاكآبه

.

ينصر ديــنــك

.

هذا الشعر والا بلاش

.

فداك مسودة آخر قصيدة بيدي

بقطعها لعيون شعرك

.

راااااااااااااااااااااااااااااااااااااااااقي ورب محمد

حتى في نزفــــــك

صح قلبك

وناصر الجبيل

ما بقيت لنا شي نقوله فيه

يعني اللي بيمدحة بعدك ( تـورّط )

.

مشتاق لك والله يابويوسف

ومشتاق لأبــو ريـمـا

والله يجمعنا من جديد
.

بصراحة بداية القصيدة ودتني لـ الحفر وايام زمان ../.. ورجعتني بدموع

دمت لمن تحب يا استاذ / شعر

.

سلمت ايه الشاعر والغائب الحاظر
مشهور يوسف

دوم وانت مخلص لشعرك ولاصدقائك

دمت ايه العذب

وتقبل خالص مودتي

اخوي ابوشاهر
لازال مكانك بالقلب شاغرا حتى اشعار آخر
والذكريات الحفراويه مازالت محفورة بالذاكره
والشعر أطرائك زاده روعه
دمت لمن تحب
وتعود انا بالسلامه ايها البعيد القريب

ألاخ عبدالله الوحيشي
مشكور على كلماتك العذبه
ولك مني كل الود والتقدير
ايها المشرف الرائع

مشهـــــــــور يوســـــــــــف



ولا زال للإبــــــــــــــداع وطـــــــــــــــــــن يلجئ إليه ..



نـــــــــــــاصر . . يستحق كـــــــــــل ما ذكرته


وله في قلب أخوه الصغير كل التقدير والإحترام والمحبه




بالفعل كنت هنا مع الشعــــــــر


محبتي


.